Sighalha Omo Lhwanzo Lhwa Nyamuhanga

1, 2. Ni kyahi ekya thwanga kolha erisighalha omo lhwanzo lhwa Nyamuhanga?

ITHWE bosi thwanzire ithwabya ithunaghumire n’eribya n’amaghalha awuwene. Neryo thukalengaho eriyirisya ndeke, erikolha ebisasaizi, n’eritsomana ndeke emibiri yethu. Nomwakine indi kikayithagha akaghalha, thukatsemera ebikalhwiririramu, neryo sithuli lhuhirira. Aliwe kandi thutholere erighuma n’eribya n’amaghalha awuwene omwa yindi nzira.

² Nomwakine indi thwabirithaminya Yehova, thutholere ithwalholha embere erighumya obughuma bwethu nayu. Omughulhu Yuda abwira Abakristayo athi, “Muyibike omo lhwanzo lhwa Nyamuhanga,” mwasoborera ngoku banga kikolha. Mwababwira athi: “Muyihimbe okw’ikirirya lyenyu eribuyirire kutsibu.” (Yuda 20, 21) Ibbwa kwesi thwanga himba thuthi erikirirya erighumire?

LHOLHA EMBERE ERIHIMBA ERIKIRIRYA LYAWU

3-5. (a) Sitani anzire iwalhangira wuthi ebya Yehova akathuyithaghako? (b) Wukalhangira wuthi ebihano bya Yehova n’emisingyi yiwe?

³ Ni kikulhu iwe ahabwawu eriligha ndeke-ndeke ngoku esyonzira sya Yehova sya sihikire. Sitani anzire iwalengekania wuthi kikalire erighendera okwa bya Nyamuhanga akathuyithaghako n’erilengekania wuthi iwukendi tsema wamayithwiramu ekitholere n’ekithatholere. Eritsuka omw’irima lye Edeni, Sitani abirilengesya erilhangira athi abandu bakaligha eki. (Enzuko 3:1-6) Kandi namunabwire kw’akinalengesaya.

⁴ Sitani anahikire? Mbwino ebihano bya Yehova bikathukakiraya kutsibu? Eyihi. Ng’eky’erileberyako, thubughe thuthi wune muyibungya-bungya omwa kibira ekyuwene. Iwalhangira olhughuthu lhuuli ilhunathimbire okwa mwanya mulebe. Obundi iwayibulya, ‘Busana naki hali olhughuthu olhu?’ Aliwe neryo iw’owa endale iyinemururumira omwa lhughuthu. Endambi eyo iwukendibya n’amalengekaniaki okwa lhughuthu? Iwukendi sima kundi olhughuthu lhwamakutheya okw’iribwa n’endale! Emisingyi ya Yehova yiri ng’olhughuthu olho, na Sitani ali ng’endale. Ekinywe kya Nyamuhanga kithi: “Mulebaye, muyitheghaye! Kusangwa enzighu yenyu Sitani, yikaghenda-ghenda ng’endale, eyikaruruma n’erisonda-sonda oyo yangalya.”​—1 Petero 5:8.

⁵ Yehova anzire ithwabya omwa ngebe eyuwene. Syanzire Sitani akathuthebya. Busana n’ekyo abirithuha ebihano n’emisingyi yithutheghaye n’erithuha etseme. (Abanya Efeso 6:11) Yakobo mwahandika athi: “Omundu oyukalhangira ndeke omughambo owahikene, ow’obwiranda, iniakakwamagho ndeke, asyabana obutseme . . . omwa mubiiri wiwe.”​—Yakobo 1:25.

6. Thwanga kakasya thuthi ngoku esyonzira sya Yehova sya sitholere?

⁶ Thukabya thwamakwama obusondoli bwa Yehova, esyongebe syethu sik’uwana n’obunywani bwethu nayu ibwaghuma. Ng’eky’erileberyako, thukaghasirawa thwamaligha erikokya liwe ly’eribya ithunemumusaba buthumbya. (Matayo 6:5-8; 1 Abanya Tesalonika 5:17) Thukatsema thwamaghendera okwa kihano kiwe ky’erihindana haghuma erimuramya n’erihimbangana n’omughulhu thukasangira ndeke omwa mubiiri w’erithulira n’erikangirirya. (Matayo 28:19, 20; Abanya Galatia 6:2; Abaebrania 10:24, 25) Thukabya thukaghanirya ebindu ebi nga byabirithuwathikya bithi erileka erikirirya lyethu iryabya irinaghumire, thuk’ongera erikakasya ngoku esyonzira sya Yehova sya sitholere.

7, 8. Ni kyahi ekikendi thuwathikya erithendi yilhalikirira busana n’ebitsibu ebyanga thwasira?

⁷ Ithwangana yilhalikirira thuthi omwa buthuku bw’embere thukendi syabana ebitsibu ebikalire. Wamabya iwukanayowa wuthya, ibuka ebinywe bya Yehova bino: “Ingye indi Mwami Mukulhu Nyamuhanga wawu, oyukakukangiriraya wubane endundi, oyukakusondolha omo nzira eyo wanga lenderamo. Kumbe wahulikirira ebihano byaghe! Neryo obuholho bwawu nga bwabiribya ng’olhusi, n’erithunganene lyawu ng’ebisunda by’omwa ngetse.”​—Isaya 48:17, 18.

⁸ Thwam’owa Yehova, obuholho bwethu ibukendibya ng’olhusi olhuthyuma, n’erithunganene lyethu iryabya ng’ebisunda by’engetse ebikabya mughulhu wosi ibinemuyighusa okwa musike. Engebe nomuyangakalha yithi, thwangana sighalha bathaleghulha. E Biblia yikathulhagha yithi: “Wughusire Omwami Mukulhu y’amalighe wawu, nayu akendi kuhanganira; Syendisyaleka omundu mubuya akakindwa na kera.”​—Esyonyimbo 55:22.

“THUGHENDE EMBERE OMWA MYATSI EYIHIKENE”

9, 10. Kikamanyisayaki eribya mundu oyukulire?

⁹ Wukendibya wunemughumya obughuma bwawu na Yehova, wukendi lholha embere erikulha. (Abaebrania 5:14; 6:1) Kikamanyisayaki erikulha?

¹⁰ Eribya Mukristayo oyukulire siry’erikulha omo myaka. Erikulha bunyakirimu, ambi ithwakolha Yehova mwa munywani wethu w’ahakuhi n’erilengaho erilhangira emyatsi kw’akalhangirayo. (Yoane 4:23) Paulo mwahandika athi: “Abo abakakwama emyatsi y’omubiri bakaghaniraya emyatsi y’omubiri. Nikwa abakakwama omulimu bakaghaniraya emyatsi y’omulimu.” (Abanya Roma 8:5) Oyukulire syalihweraya engebe yiwe okwa by’eriyitsemesya kutse ebindu by’ekinyamubiri. Omwakanya k’ekyo, akahweraya amalengekania wiwe okw’ikolera Yehova kandi akathwamu ndeke. (Emisyo 27:11; soma Yakobo 1:2, 3.) Syalilighira akahathikano k’erikolha ekithuwene. Oyukulire akaminya ekihikire n’erithwamu erikolhakyo.

11, 12. (a) Ni kyahi ekya Paulo abugha okwa “maaka w’obulengekania”? (b) Eribya Mukrisitayo oyukulire liri lithi ng’eribya muthibithi?

¹¹ Erikulha kikayithagha akaghalha. Omukwenda Paulo mwahandika athi: “Ebyalya ebikalha-kalire ni by’abandu abakulire, ni by’abo ababirikangirirya amaaka wabu w’obulengekania omw’ibegheresyagho erithoka erighabulha ekibuya n’ekibi.” (Abaebrania 5:14, NW) Ekinywe ‘eribegheresyagho’ kyangana leka ithwalengekania okw’iyibegheresya ly’omuthibithi.

¹² Thukabya thukalhangira omuthibithi y’omwa mathibitho, thukaminya ku mukyathwalha obuthuku n’eriyibegheresya nuku athoke. Mwathabuthwa ini muthibithi. Omwana akabya akabuthwa, akabya isyasi erikolesya amaboko n’amaghulhu wiwe. Aliwe endambi yikahika, in’igha erihamba ebindu n’eribbasulha. Amayibegheresya, inianganabya muthibithi. Kuthya, kikathwalha buthuku n’eriyibegheresya ithwe eribya Bakristayo abakulire.

13. Ni kyahi ekikendi thuwathikya erigha erilengekania nga Yehova?

¹³ Omwa kitabu kino, thwabirilhangira ngoku thwangabya n’amalengekania wa Yehova n’erilhangira emyatsi ngoku akalhangirayo. Kandi thwabirigha erisima n’erianza ebya Yehova akathuyithaghako. Omughulhu thukathwamu, thukayibulhaya: ‘Ni bihano byahi kutse emisingyi ye Biblia yahi ey’erighenderako omwa mibere eyi? Nanga bighenderako nyithi? Yehova iniakendianza ngakole kyahi?’​—Soma Emisyo 3:5, 6; Yakobo 1:5.

14. Thutholere ithwakolhaki thwamabya b’erihimba erikirirya lyethu?

¹⁴ Sithwanga leka erihimba erikirirya lyethu omu Yehova. Ngoku erirya ebyalya by’ekirisya likahimba emibiri yethu neryo iyaghuma, erigha oku Yehova likathuwathikaya erihimba erikirirya erighumire. Thwabere thukatsuka erigha e Biblia, muthw’igha ekwenene y’omusingyi eyihambire oku Yehova n’esyonzira siwe. Aliwe obuthuku bunemulhaba, thukayithagha eriyitheghererya emyatsi y’omwakathi. Ekyo kya Paulo amanyisaya akabugha athi: “Ebyalya ebikalha-kalire ni by’abandu abakulire.” Omw’ikolesya ebya thuk’igha, thukabana amenge. E Biblia yikathubwira yithi: “Amenge ni mwatsi w’embere.”​—Emisyo 4:5-7; 1 Petero 2:2.

15. Busana naki ni kikulhu erianza ndeke Yehova n’abalikyethu?

¹⁵ Omundu anganabya iniaghumire n’eribya n’amaghalha awuwene, aliwe eribya athya mughulhu wosi, anasi ngoku atholere inialholha embere eriyitsomana ndeke. Kuthya, oyukulire bunyakirimu akabya inianasi ku atholere erikolha kutsibu obughuma bwiwe na Yehova eribya ibunaghumire. Paulo akathw’ibukaya athi: “Muyirengeko nga mukakwama omw’ikirirya; muyitswere!” (2 Abanya Korinto 13:5) Nomwabine, sithwendi subulira okw’ibya n’erikirirya erighumire. Olhwanzo olho thuwithire Yehova n’abalikyethu lhutholere ilhwalholha embere erikulha. Paulo mwabugha athi: “Nomonangabya . . . n’eriminya lyosi, kandi nomonangabya n’erikirirya lyosi erikathoka erilhusya ebithwa, nikwa isingwithe lhwanzo, inyiri busa.”​—1 Abanya Korinto 13:1-3.

HIRA AMALENGEKANIA W’OKWA MAHA WAWU

16. Sitani anzire ithwayowa thuthi?

¹⁶ Sitani anzire ithwalengekania thuthi si thuli okwa lhulengo lhw’eritsemesya Yehova. Anzire ithwahwa mani n’erilengekania nga sihali ekyanga ghunzaho ebitsibu byethu. Syanzire thukayikethera Abakristayo balikyethu, kandi syanzire thukatsema. (Abanya Efeso 2:2) Sitani anasi ngoku eriyithungako amalengekania awathatholere kyangana thutsandya n’eritsandya obughuma bwethu na Nyamuhanga. Aliwe Yehova abirithuha ekyanga thuwathikya erirwanisya amalengekania awathuwene. Abirithuha amaha.

17. Amaha ni w’omughaso athi?

¹⁷ Omu 1 Abanya Tesalonika 5:8, e Biblia yikalinganisaya amaha wethu n’akakira kutse esapeho y’ekyuma eyikatheghaya omuthwe w’omusirikali, eryahulha esapeho eyo mwa “maha w’omulhamu.” Eribya n’amaha omwa milhaghe ya Yehova kyangana theya obulengekania bwethu n’erithuwathikya erirwanisya amalengekania awathatholere.

18, 19. Amaha mwaghumya athi Yesu?

¹⁸ Yesu eribya n’amaha mukyamughumya. Omw’ithumbi liwe ly’erighunzerera okwa kihugho, mwabana ebitsibu ekindi omwa kindi. Omunywani mwamughoberya. Owundi mwabugha athi syamwasi nibya. Abandi mubamusighania n’erithibitha. Abandu b’ewabu mubamuhandikirira, n’eribugha bathi ahanikawe okwa muthi. Ni kyahi ekya muwathikaya erighumira ebindu by’obulhumi ebi? “Mwayiyinirya omuthi w’amaghali, n’esisoni mwathalhangirasyo nga kindu, kandi abirikalha okwa lhuhandi lhw’amalya lhw’ekithumbi kya Nyamuhanga eky’obwami.”​—Abaebrania 12:2, NW.

¹⁹ Yesu abya inianasi ngoku eribya muthaleghulha, kikendi lethera Thatha wiwe y’olhukengerwa n’erikangania Sitani ku ni mubehi. Amaha aya mwamulethera etseme nene. Kandi abya inianasi ngoku omwa buthuku bwa hakuhi-kuhi akendi thasyabya haghuma na Thatha wiwe omwa lhubulha. Amaha aya mwamuwathikya eriyiyinia. Nga Yesu, nethu thutholere ithwahira amalengekania w’okwa maha wethu. Ikikendi thuwathikya eriyiyinia nomuhangabyaki.

20. Ni kyahi ekyanga kuwathikya eribya n’amalengekania awuwene?

²⁰ Yehova akalhangira erikirirya lyawu n’eriyiyinia lyawu. (Isaya 30:18; soma Malaki 3:10.) Akalhagha erikuha “ebya muthima wawu anzire.” (Esyonyimbo 37:4) Neryo amalengekania wawu siwulhusayegho oko maha wawu. Sitani anzire iwahwa amaha n’eriyowa emilhaghe ya Yehova nga siyendi syabererera. Aliwe isiwalighira amalengekania awathatholere erikughunza amani! Wamalhangira iwuli muhwa maha, saba Yehova y’obuwathikya. Wibuke ebinywe ebiri omu Abanya Filipi 4:6, 7: “Simuhanga-hangaye emithima yenyu, nikwa omo buli mwatsi mubwire Nyamuhanga obwagha bwenyu, imukamusaba n’erimuhathikana, imunemuha ewasingya. N’obuholho bwa Nyamuhanga, obulhabire amenge wosi, bwasyatheya emithima yenyu n’amaghaniryo wenyu omwisi wa Kristo Yesu.”

21, 22. (a) Ekighendererwa kya Yehova busana n’ekihugho ni kyahi? (b) Wamathwamu erikolhaki?

²¹ Mughulhu wosi ibya iwunemughanirya okwa buthuku bubuyanga obuli embere. Omwa buthuku obuthe bwahali, obuli mundu akendi ramya Yehova. (Eribisulirwa 7:9, 14) Thalengekania okwa ngebe omwa kihugho kihya-kihya. Sithwanga thoka erilinganisya obuwene bwayo n’ekindi kindu! Sitani, esyombinga siwe, n’obubi ebyosi bikendi syabya isibikiriho. Siwendi syalhwalha, kandi siwendi syaholha. Omwakanya k’ekyo, buli kiro wukendi syabuka iwoswire n’akaghalha n’eritsema busana n’eribyaho. Abandu bosi bakendi syakolera haghuma erikolha ekihugho mwa paradiso. Abosi bakendisyabya n’ebyalya ebyuwene n’omwanya w’erikalhamo owuwene. Abandu sibendisyabya batsibu, aliwe owundi akendi syatsomana owundi omo lhwanzo. Endambi yikendi syahika, abandu abosi okwa kihugho ibingira “omwa bwiranda bw’olhukengerwa lhw’abaana ba Nyamuhanga.”​—Abanya Roma 8:21.

²² Yehova anzire iwamukolha mwa Munywani wawu w’ahakuhi. Neryo wukole ekyosi-kyosi ekya wanga thoka eriowa Yehova n’eriyithunda hakuhi nayu buli kiro. Kwesi, ithwe bosi thusighale omo lhwanzo lhwa Nyamuhanga erihika kera na kera!​—Yuda 21.