ERISOMO 16

Ni Byahi Ebya Yesu Akolha Iniane Okwa Kihugho?

Ebiprintingirwe

Abandu bangyi bakalengekanaya oku Yesu ng’olhumekeke, omuminyereri w’amenge, kutse ng’omulhume oyuwaholha. Aliwe ibbwa, mbwino thwangana mw’ighako bingyi omw’iyithendya okwa ngebe yiwe ey’okwa kihugho? Omw’isomo lino, thukendi kania okwa bighuma by’okwa bindu bikulhu ebya Yesu akolha kandi ngoku bikakuhambako.

1. Omubiiri mukulhu owa Yesu akolha w’owahi?

Omubiiri mukulhu owa Yesu akolha lyabya ‘iry’erithulha engulhu yuwene y’Obwami bwa Nyamuhanga.’ (Soma Luka 4:43.) Mwathulhughania engulhu yuwene athi Nyamuhanga angahirireho obwami, kutse egavumente, eyanga ghunzireho ebitsibu byosi by’abandu.a Yesu mwakolha kutsibu eribwira abandi oko mwatsi oyu habw’emyaka isathu n’embindi.—Matayo 9:35.

2. Ni kyahi ekyaleka Yesu iniakolha ebithiko-thiko?

E Biblia yikakanaya okwa ‘bithiko-thiko, n’eby’eriswekya, n’ebiminyisyo bingyi ebyo Nyamuhanga akolha omo byalha bya Yesu.’ (Emibiri 2:22) Busana n’obuthoki bwa Nyamuhanga, Yesu mwathoka erisondolha eby’obuhangwa, amalisya esyongumi sy’abandu, amalhamya abalhwere, n’erilhubukya abaholi. (Matayo 8:23-27; 14:15-21; Mariko 6:56; Luka 7:11-17) Ebithiko-thiko bya Yesu mubyakangania ndeke-ndeke ngoku Nyamuhanga yuwamuthuma. Kandi mubyakangania ngoku Yehova awithe amaaka w’erighunzaho ebitsibu byethu byosi.

3. Engebe ya Yesu yikathweghesayaki?

Yesu mwabya akowa Yehova omwa mibere yosi. (Soma Yoane 8:29.) Nomwanahakanisibawa, Yesu mwakolha buthaleghulha ebyo Thatha wiwe abugha athi akole erihika okwa lhuholho lhwiwe. Mwakangania ngoku kithokekene abandu erikolera Nyamuhanga, nibya n’omwa mibere eyikalire. Busana n’ekyo, Yesu mwathusighira ‘olhughobe olho thwanga kwama.’—1 Petero 2:21.

THASYIGHA BINGYI

Lebaya ngoku Yesu abwira abandi okwa ngulhu yuwene n’erikolha ebithiko-thiko.

4. Yesu mwabwira abandi okwa ngulhu yuwene

Yesu mwaghenda ebikumi n’ebikumi by’esyokilomita omwa syonzira esiri mw’etsutsu, eribwira abandu bangyi okwa ngulhu yuwene ngoku angathoka. Soma Luka 8:1, mwanakania okwa bibulyo bino:

Mbwino Yesu abya akathulira ababya bakahindana haghuma basa erimuhulikirira?
Ni kaghalha kahi ako Yesu ahiraho eribana abandu?

Nyamuhanga mwalhaghulha athi Masiya akendi syabwira abandu okwa ngulhu yuwene. Soma Isaya 61:1, 2, mwanakania okwa bibulyo bino:

Yesu mwaberererya athi obuminyereri obu?
Wukalengekanaya mbwino munabwire abandu banayithaghire eriowa engulhu yuwene eyi?

Yesu amahika omwa kyalu iniane n’abughuma b’okwa bigha biwe.

5. Yesu mwakangirirya amasomo w’omughaso

Eryongera okw’ithulha engulhu yuwene ey’Obwami bwa Nyamuhanga, Yesu mwakangirirya amasomo aw’omughaso. Thalhangira eby’erileberyako bike ebiri omw’Ikangirirya liwe ery’okwa Kithwe. Soma Matayo 6:14, 34 na 7:12, mwanakania okwa bibulyo bino:

Ni habulha lyahi eryuwene erya Yesu aha omwa milhondo eyi?
Wukalengekanaya erihabulha eri likine ly’omughaso?

Yesu anemukangirirya endeko y’abalhume, abakali, n’abaana okwa kithwe.

6. Yesu mwakolha ebithiko-thiko

Yehova mwaha Yesu y’obuthoki bw’erikolha ebithiko-thiko bingyi. Erithalhangira eky’erileberyako kighuma, soma Mariko 5:25-34 kutse mubughaye EVIDIYO. Mwanakania okwa bibulyo ebikakwamako.

EVIDIYO: Omukali Omulhwere Akalhamibawa (5:10)

Omo vidiyo, omukali omulhwere abya akakasiryeki?
Ni kyahi ekyamakutsemesya okwa kithiko-thiko eki?

Soma Yoane 5:36, mwanakania okwa kibulyo kino:

Ebithiko-thiko bya Yesu mubyakanganiaki okw’iyo?

Yesu anakukamire inianemukania n’omukali oyukwire engitsi enyuma w’erilhamibwa omo nzira y’ekithiko-thiko oko ndwalha yiwe ey’erilhuako omusasi.

Wunalhue wasi?

Ebingyi by’okwa bya thwasi oku Yesu biri omwa bitabu bbini bye Biblia ebikahulhawamo Enjiri—Matayo, Mariko, Luka, na Yoane. Obuli muhandiki w’Enjiri mwahiramo emyatsi muthina-muthina eyihambire oku Yesu. Emyatsi yosi eyi haghuma yikaleka ithwayitheghererya ndeke engebe yiwe.

MATAYO

yuwatsuka erihandika Enjiri yiwe. Yikahira omuwatho okwa syongangirirya sya Yesu, kutsibu-tsibu ebya Yesu akangiriraya ebihambire oko Bwami bwa Nyamuhanga.
MARIKO

yuwahandika Enjiri enyikuhi. Yikakanaya okwa bindu bingyi ebikasisimulha.
LUKA

akakanaya kutsibu okwa mughaso w’erisaba n’okwa mibere Yesu abya akathwaliramu abakali.
YOANE

akabisulha bingyi okwa mibere ya Yesu omw’ikania okwa myatsi mingyi eya Yesu akaniraya banywani biwe ab’okwa ndungu n’abandi.

ABANDI BAKABUGHA BATHI: “Yesu yana Nyamuhanga.”

Iwe wukabugha wuthiki?

OMWA BIKUHI

Yesu mwathulhughania Obwami bwa Nyamuhanga, amakolha ebithiko-thiko, n’eriowa Yehova omwa mibere yosi.

Eriyibukya

Yesu iniane okwa kihugho, omubiiri wiwe omukulhu abya ini wahi?
Ebithiko-thiko bya Yesu bikakanganayaki?
Ni masomo wahi aw’omughaso agho Yesu akangiriraya?

Erisomo lino lyamahwa ebiro:

Ekilhubirirwa

Mulebaye omusathu ‘Nyamuhanga Mwayira Yesu Mwa Mukama Kandi Kristo’—Ekitsweka II kutse soma Matayo sura 5 erihika 7 eriminya bingyi ebihambire okw’ithulira lya Yesu.

Ekindi:

Your other goal

MINYA BINGYI

Ni mwatsi wahi ogho Yesu akanayako kutsibu?

“Obwami bwa Nyamuhanga—Ekya Bukamanyisaya oku Yesu” (The Watchtower, Okwerikumi 1, 2014)

Lebaya ekyanga leka ithwaligha ngoku kwenene ebithiko-thiko bya Yesu mubyabya.

“Ebithiko-thiko bya Yesu—Byanga Kweghesyaki?” (The Watchtower, Okwomusanju 15, 2004)

Soma erilebya eky’erileberyako kya Yesu eky’eriyihayo nga mukyahamba kithi okwa mulhume mughuma.

“Ingayitsomene Ingyuwene” (The Watchtower, Okwerikumi 1, 2014)

Lebaya erithondekania ly’ebindu bikulhu-bukulhu ebya Yesu akolha omwa mubiiri wiwe w’Obwami erikwamana ngoku bisubungukene.

“Ebikulhu-bikulhu Ebyabya Omwa Ngebe ya Yesu Okwa Kihugho” (New World Translation of the Holy Scriptures, Appendix A7)

a Amasomo, 31-33, akendi syakania buuli oko Bwami bwa Nyamuhanga.