Thulhole Embere Erikulha-kulhana—“Ekiro Kinene ky’Omwami Mukulhu Kiri Hakuhi”
“Thughende embere omo myatsi eyihikene.”—EBR. 6:1.
1, 2. Ni kaghisa kahi ‘ak’erisaghira okwa bithwe’ ako Abakristayo b’omwa kighana ky’erimbere abe Yerusalemu ne Yudea babana?
OMUGHULHU Yesu abya okwa kihugho, abigha biwe mubamuhikako n’erimubulya bathi: ‘Ekiminyikalho ky’erihika lyawu ni kyahi, n’erihwererera ly’emighulhu eyi ni kiro kyahi?’ Eribererera ly’erimbere ery’obuminyereri obo Yesu abaha akasubirya ekibulyo kyabu lyabya omwa kighana ky’erimbere. Yesu mwakania okwa kindu ekithe kya buli kiro ekyanga kanganirye ngoku enduli yiri hakuhi. Babere balhangira ekindu ekyo, ‘abali e Yudea [babya batholere] ibasaghira okwa bithwe.’ (Mt. 24:1-3, 15-22) Mbwino abigha ba Yesu bangana minyerere ekiminyikalho n’erighenda okwa busondoli bwiwe?
2 Enyuma w’emyaka ng’amakumi asathu, omwa 61 E.K., omukwenda Paulo mwahandika omwatsi owahengulha eriyitheghererya ly’Abakristayo Abaebrania ababya bikere eYerusalemu n’ababathimbireko. Aliwe Paulo n’abikirirya balikyabo babya isibasi ngoku ekiminyikalho ky’erimbere ekyo “obulighe bunene” kyabya ikikisiya ikyabya myaka ithano enyuma waho. (Mt. 24:21) Omwa 66 E.K., Cestius Gallus mwasondolha amahe we Roma awabya iniakisiya iniabambira e Yerusalemu. Aliwe kitsumbukirania mwabikyako, kyamaleka Abakristayo ibabana akaghisa k’eriyibatsira kughulhu.
3. N’ihabulha lyahi eryo Paulo ahana Abakristayo Abaebrania, kandi busana naki?
3 Abakristayo mubayithagha obuyitheghererya n’eriso ly’obunyakirimu erithoka eriminya ngoku emyatsi yangabere nuku bathibithe. Aliwe, abandi babya ‘ibabiribya n’obuthowa.’ Babya ng’abaana balere bunyakirimu abanzire “amabere.” (Soma Abaebrania 5:11-13.) Nibya n’abandi ababya ibabirilendera omwa nzira y’ekwenene habw’emyaka mingyi mubatsuka erikangania ehiminyikalho ‘hy’erilhua oku Nyamuhanga oyuliho.’ (Ebr. 3:12) Abandi mubabya ‘n’emibere’ y’eribulha okwa mihindano y’Ekikristayo omughulhu ekiro ekikalire ekyo kiri hakuhi. (Ebr. 10:24, 25) Paulo mwabaha erihabulha eriri okwa buthuku, akabugha athi: “Thughende embere omwa myatsi eyihikene, thusighanaye erikangirirya ly’eritsuka ly’engulhu ya Kristo.”—Ebr. 6:1.
4. Busana naki ni kikulhu erisighalha ithunabukire bunyakirimu, kandi ni kyahi ekikendi thuwathikya erikolha ekyo?
4 Thuli omwa biro by’erighunzerera by’eribererera ly’obuminyereri bwa Yesu. ‘Ekiro kinene kya Yehova’—ekiro ekikendi syaletha enduli y’omughulhu mubi wa Sitani owosi—“kiri hakuhi.” (Zef. 1:14) Kwilhaba kera, thutholere ithwasighalha ithunabukire bunyakirimu kandi ithunatheghirye. (1 Pet. 5:8) Mbwino kwenene thunemukolha ekyo? Erikulha bunyakirimu likendi thuwathikya erisighalha ithunahirire amalengekania w’okwa buthuku obo thulimu.
Ekya Erikulha Bunyakirimu Likamanyisaya
5, 6. (a) Erikulha bunyakirimu mwamuliki? (b) Erikulha bunyakirimu kikayithagha akaghalha omwa nzira syahi ibiri?
5 Paulo mwathasubulira okw’ibwira Abakristayo b’omwa kighana ky’erimbere athi bakulha-kulhane bunyakirimu aliwe kandi mwababwira erikulha-kulhana bunyakirimu eryo nga mwamuliki. (Soma Abaebrania 5:14.) “Abandu bakulhu” sibali subulira okw’irya amabere kutse amathe. Bakalya “akalyo.” Busana n’ekyo, basi “emyatsi y’erimbere” kuthya “n’emyatsi y’omwakathi” ey’ekwenene. (1 Kor. 2:10, NWT) Kandi nibya, eribya ibabirikolha n’eryeghesibwa omwa myatsi mingyi—n’erighendera okwa ebyo basi—kikabawathikaya erighabulha ekibi n’ekibuya. Bamabya b’erikolha erithwamu, erithendeka eri likaleka ibathoka eriminya nga ni misingyi yahi y’Amasako eyikayithayisibawa kandi ngoku banga ghendera kuyo.
6 Paulo mwahandika athi “litholere ithwatheya ndeke ebyo thwabiriowa, thukasyayihengeka, thukalhua oko kwenene.” (Ebr. 2:1) Eriyisununulha okw’ikirirya ng’eryo lyanganabya isithwasi. Thwangana yihighulha okw’ekyo ‘omw’itheya ndeke’ omughulhu thuk’igha ekwenene y’obunyakirimu. Kwesi, obuli mughuma w’okwithwe atholere iniayibulya: ‘Mbwino nga kina y’eghesaya emyatsi y’erimbere? Mbwino nganakwama kyaghendera okw’iyowa buyira kutse eriberererya mukoro, omuthima waghe isyamakirire ndeke ekwenene? Nanga kulha-kulhana nyithi ndeke bunyakirimu?’ Erikulha-kulhana bunyakirimu likathuyithaghako erihiraho akaghalha omwa nzira ng’ibiri. Thutholere ithwayitheghererya ndeke Ekinywe kya Nyamuhanga. Kandi thutholere ithw’igha eribya bowa.
Yitheghereraye Ndeke Ekinywe kya Nyamuhanga
7. Thwanga ghasirwa thuthi omw’iyitheghererya ndeke Ekinywe kya Nyamuhanga?
7 Paulo mwahandika athi “oyukalya amabere akine mwana, isyali abeghera ebinywe by’erithunganene.” (Ebr. 5:13) Erithoka erikulha, thutholere ithwayitheghererya ndeke Ekinywe kya Nyamuhanga, omwatsi wiwe busana nethu. Kundi omwatsi oyo ali omwa Kinywe kiwe, e Biblia, thutholere ithwabya bigha babuya b’Amasako kuthya n’ebitabu ‘by’omughombe oyuthaleghulha n’ow’amenge.’ (Mt. 24:45-47) Erigha amalengekania wa Nyamuhanga omwa nzira eyi kyangana thuwathikya erithendeka amaaka wethu w’erilengekania. Lengekanaya okwa ky’erileberyako ky’Omukristayo oyukahulhawa mwa Orchid.a Akabugha athi: “Eryibukibwa eryabirihamba kutsibu okwa ngebe yaghe ly’erisoma e Biblia mughulhu wosi. Mukyanyithwalira myaka ng’ibiri erighunza e Biblia eyosi, aliwe mukyabya ngamunabanangana n’Omuhangiki waghe omurundi w’erimbere. Munigha okwa mibere yiwe, ebyo anzire n’ebyo athanzire, olhulengo lhw’amaaka wiwe, n’obunene bw’amenge wiwe. Erisoma e Biblia buli kiro kyabirinyitheya omwa mibere eyikalire omwa ngebe.”
8. Ni maaka wahi agho Ekinywe kya Nyamuhanga kyanga thuha?
8 Erisoma akatsweka k’Ekinywe kya Nyamuhanga obuli kiro kikaleka omwatsi w’akyo ‘iniathukoleramu.’ (Soma Abaebrania 4:12.) Erisoma ng’eryo lyangana hamba okwa mundu wethu w’omwakathi kandi ithwongera eritsemesya Yehova. Wunawithe ekiyithawa ky’eryongera obuthuku okwa endegheka y’erisoma n’erighanirya okwa bya yikabugha?
9, 10. Eriyitheghererya Ekinywe kya Nyamuhanga mwamuliki? Iha eky’erileberyako.
9 Eriyitheghererya e Biblia sikiri subulira okw’ithaminya ebyo yikabugha. Sibugha indi ababya ibakine abaana bunyakirimu ab’omwa biro bya Paulo babya isibasi ebiri omwa Kinywe kya Nyamuhanga. Aliwe, mubathakikolesya n’eriyileberya omughaso wakyo omw’ikighenderako. Mubathayitheghererya omwatsi omw’ilighiragho eribasondolha nuku bathwemu ndeke omwa ngebe syabu.
10 Eriyitheghererya Ekinywe kya Nyamuhanga ly’eriminya ebyo kikabugha n’eribihira omwa mikolere. Ekyalholirweko kya mwali wethu oyukahulhawa mwa Kyle kikakanganaya ekyo nga kyanga kolhwa kithi. Kyle mwakakalhukana n’oyo babya bakakolha nayu. Ni kyahi ekyo akolha erighunzaho ekitsibu? Akasubiraya athi: “Erisako eryatsuka eryasa omwa bulengekania lyabya Abanya Roma 12:18, ahakabugha hathi: “Kyamathokekana, okwa lhuhandi lhwenyu, mubye n’obuholho oko bandu bosi.” Neryo munahiraho endegheka y’erikania n’omukoli mulikyethu oyo.” Erikanirania mulyuwana, kandi mukoli oyo mwatsema busana na Kyle erikolha ekyo. Kyle akabugha athi: “Mun’igha ngoku erighendera okwa misingyi ye Biblia ky’ekindu ekihikire ekyo thwanga kolha.”
Igha Eribya Mwowa
11. Ni kyahi ekikanganaya ngoku kyangana kalha eribya mwowa omwa mibere eyikalire?
11 Kyanganakalha erighendera okwa ebyo thwam’igha omwa Masako, kutsibu-tsibu omughulhu emibere yikalire. Ng’eky’erileberyako, buthuku buke Yehova alilhusirye abaana be Israeli b’omwa bunyewa e Misiri, mubathwamu ‘erineghena na Musa n’erilenga oku Yehova.’ Busana naki? Ahabw’eribulha amaghetse w’erinywa. (Eri. 17:1-4) Isihali halhaba myezi ibiri balikolire endaghane na Nyamuhanga n’eriligha erikolha ‘ebinywe byosi ebyo Yehova abugha,’ mubathwa ekihano kiwe omw’iramya esyosanamu. (Eri. 24:3, 12-18; 32:1, 2, 7-9) Mbwino eki kyabya kundi Musa mwasibayo akahebwa obusondoli okwa Kithwe Horebu neryo kyamaleka ibubaha? Mbwino bangabya imubalengekania bathi Abaameleki kandi bangabithire neryo bathi Abaisraeli bangabere isibawithe kiwathikya Musa atheho, oyo erilhabira omwa byalha biwe mukyanaleka ibasingura? (Eri. 17:8-16) Ekyo kithokekene, aliwe mbulha ky’ekyahi, Abaisraeli “mubaghana eriowa.” (Emib. 7:39-41) Paulo mwahana Abakristayo athi ‘bayitsinge’ n’eriyihighulha okw’ithendyowa eryo Abaisraeli bakanganaya bakasagha eryingira omwa Kihugho Ekyalhaghanisibawa.—Ebr. 4:3, 11.
12. Yesu mwigha athi eribya mwowa, kandi mwaghasirwa athi?
12 Erikulha-kulhana bunyakirimu kikayithagha erihiraho akaghalha eriowa Yehova. Ngoku Yesu Kristo anakanganaya omwa ky’erileberyako kiwe, mughulhu mungyi obowa bukasa busana n’ebitsibu ebyathwalhabiremo. (Soma Abaebrania 5:8, 9.) Athali asa okwa kihugho, Yesu abya akowa Thatha wiwe. Aliwe, erikolha erisonda lya Thatha wiwe okwa kihugho mwabya eriaghalhwa kinyamubiri n’omwa bulengekania. Eribya mwowa iniane omwa bitsibu ebikalire, Yesu ‘mwayirwa mw’oyuhikene’ busana n’ekitsumbi kihyaka ekyo Nyamuhanga abya awithe omwa bulengekania busana nayu, eky’eribya Mwami kandi Muhereri Mukulhu.
13. Ni kyahi ekikakanganaya nga thwabir’igha eribya bowa?
13 Kandi ibbwa ithwe? Thwanabirithwamu eriowa Yehova nibya n’omughulhu thuli omwa bitsibu ebikalire? (Soma 1 Petero 1:6, 7.) Ebihano bya Nyamuhanga ebihambire okwa by’esyongeso, eribya mw’okwenene, erikolesya olhulimi lhwa ndeke, erisoma e Biblia n’eriyeghesya Amasako, erihindana okwa mihindano y’Ekikristayo, n’erisangira omwa mubiiri w’erithulira bilhangirikire ndeke. (Yos. 1:8; Mt. 28:19, 20; Efe. 4:25, 28, 29; 5:3-5; Ebr. 10:24, 25) Thunebowa oku Yehova omo myatsi eyi n’omughulhu kikalire? Obowa bwethu bukakanganaya ngoku thwabirikulha-kulhana bunyakirimu.
Erikulha Bunyakirimu—Busana Naki ni ly’omughaso?
14. Iha eky’erileberyako ekikakanganaya ngoku erikulha-kulhana bunyakirimu lyanganabya butheya.
14 Ni butheya Omukristayo eribya n’amaaka w’erilengekania awabirikangiriribwa ndeke erighabulha ekihikire okwa kibi omwa kihugho ‘ekithekwa esisoni.’ (Efe. 4:19) Ng’eky’erileberyako, mughalha wethu oyukahulhawamo James, oyukasoma ebitabu ebiseghemere okwa Masako mughulhu wosi kandi oyubyanzire, mwaligha omubiiri ogho abosi abo akakolha nabu ni bakali. James akabugha athi: “Nomwakine indi abangyi b’okw’ibo sibyabya bawithe esyongeso, omukoli mughuma mwabya ngawithe emibere eyuwene kandi mwakangania erianza ekwenene ye Biblia. Aliwe omughulhu thwabya ithwibene omwa kisenge okwa mubiiri, mwatsuka erikolha ebikakanganaya olhuthetho. Munalengekania indi akasatha kandi mukyanyikalira erimuthanga. Aho naho mun’ibuka ekyalholirweko ekihambene n’ekyo ekiri omwatsi wa Kaleberyo ekihambire oku ndugu oyuwabana erilengwako ng’eryo okwa mubiiri. Omwatsi oyo mwakolesya eky’erileberyako kya Yozefu na muka Potifa.b Ahathe erilindirirya munamusukuma, neryo mwathibitha eyihya.” (Enz. 39:7-12) James mwatsema kundi muhathabya ekikabya kandi mwasighalha iniane n’obunyamuthima-thima obuhenirye.—1 Tim. 1:5.
15. Erikulha-kulhana bunyakirimu likaghumaya lithi omuthima wethu w’omusyo?
15 Kandi erikulha bunyakirimu ni ly’omughaso kundi likaghumaya omuthima wethu w’omusyo n’erithutheya “okw’ithwalhwa omw’ikangirirya ly’emisindo-misindo n’ery’ehandi.” (Soma Abaebrania 13:9.) Thukabya thukalengaho erikulha-kulhana bunyakirimu, obulengekania bwethu bukabya okwa “bibuya.” (Fil. 1:9, 10) Busana n’ekyo thukongera erisima Nyamuhanga n’ebyosi ebyo akathuha nuku thughasirawe. (Abar. 3:24) Omukristayo oyukulire ‘oyuhikene omwa malengekania wiwe’ akabya n’erisima ng’eryo kandi akatsemera obunywani na Yehova.—1 Kor. 14:20.
16. Ni kyahi ekyawathikaya mwali wethu mughuma eribya ‘n’erisika omwa muthima’?
16 Mwali wethu oyukahulhawamo Louise akaligha athi buthuku bulebe enyuma w’eribatizibwa, ekindu ekikulhu okw’iyo lyabya iry’erianza eritsemesya abandi. Mwabugha athi: “Sinabya ngwithe kibi ekyo nakolha aliwe omwa muthima waghe simwabya eriyisunza linene ly’erikolera Yehova.” Munaminya ngoku ngatholere erikolha esyombinduka namabya w’eriyowa inganemuha Yehova y’ebyosi ebyo nanga thoka. Embinduka nene yabya iry’eriyihwerya omw’iramya liwe.” Omw’ihiraho akaghalha kanene, Louise mwabya ‘n’erisika omwa muthima,’ kandi mukyalhangirika ndeke omughulhu alhwalha obulhwere obukitha obulighe. (Yak. 5:8) Louise mwabugha athi, “Munaghalhwa kutsibu, aliwe okwenene kuli kuthi munayithunda oku Yehova.”
‘Ibya Mwowa n’Omuthima Wosi’
17. Busana naki obwowa bwabya b’omughaso kutsibu-tsibu omwa kighana ky’erimbere?
17 Erihabulha lya Paulo ery’erilholha embere erikulha-kulhana mulyalhamya esyongebe sya Bakristayo omwa kighana ky’erimbere ababya bikere e Yerusalemu ne Yudea. Abaghendera okw’ihabulha eryo babya bawithe obuyitheghererya bw’obunyakirimu obukayithaghisibawa eriminyerera ebiminyikalho ebyo Yesu abya iniabiribaha nuku “basaghire oko bithwe.” Babere balhangira “ekikalire ky’eriherya . . . ikihangane ahabuyirire,” ni bugha ambu, amahe we Roma inianathimbire kandi iniane mwingira omwa Yerusalemu, mubaminya ngoku ni ndambi y’erithibitha. (Mt. 24:15, 16) Omw’ighendera okw’ikunga lya Yesu ly’obuminyereri, Abakristayo mubalhua omwa muyi we Yerusalemu athali athoghothibwa, kandi erikwamana n’ebinywe by’oyusomire eby’edini ya Eusebius, mubayikalha omwa muyi we Pela omwa bithwe bye Gileadi. Busana n’ekyo, mubabalha okwa kabi akakalire kutsibu ako e Yerusalemu yabana.
18, 19. (a) Busana naki obwowa bukayithaghisibawa omwa biro byethu? (b) Thukendi syakania okuki omo mwatsi owakakwamako?
18 Obowa obukasa busana n’erikulha bunyakirimu bukendi thulhamya hakabya eribererera ly’obuminyereri bwa Yesu obwa “hasyabya obulighe bunene” obuthe bwathabyaho. (Mt. 24:21) Mbwino thunemwendi syaghendera okwa busondoli obwa lhuba-lhuba obo thukendi syathunga erilhua okwa “omw’imaniri oyuthereghulha ow’amenge”? (Lk. 12:42) Kwesi ka ni kikulhu erigha eribya ‘mwowa n’omuthima wosi’!—Abar. 6:17.
19 Thukayithagha erithendeka amaaka wethu w’erilengekania imuthwakulha-kulhana. Thukakolha ekyo omw’ihiraho akaghalha k’eriminya ndeke Ekinywe kya Nyamuhanga n’erigha eribya bowa. Erikulha-kulhana eribya Mukristayo oyukulire bunyakirimu kikakalira eminyethu. Omwatsi owakakwamako akakanganaya e bitsibu ebyo nga byanga singurwa bithi.
[Omwatsi ahikwa]
a Awandi mena abirihindulhwa.
b Lebaya omwatsi owawithe omuthwe “Amaaka w’Eribugha Wuthi Eyihi okw’Ikolha Ekibi,” omwa Watchtower ey’Okwerikumi 1, 1999.
Wam’ighaki?
• Erikulha-kulhana bunyakirimu niki, kandi thukakikolha thuthi?
• Eriminya Ekinywe kya Nyamuhanga kikathuwathikaya kithi erikulha-kulhana?
• Thuk’igha thuthi eribya bowa?
• Erikulha-kulhana likathughasira omwa nzira syahi?
[Ekisasani]
Erighendera okw’ihabulha lye Biblia likathuwathikaya erighumira ebitsibu kikulhu-kulhu
[Ekisasani]
Erikwama erihabulha lya Yesu mukyalhamya Abakristayo b’erimbere