Ekikaleka Ebihambire oku Edeni Ibyabya Ibikakuhambako

ERIHAKANISYA lighuma erikaswekaya eryo abasomire balebe bakaha erihambire oko mwatsi we Edeni liri lithi bakabugha bathi awandi masako omwa Biblia syali sighika ekyo. Ng’eky’erileberyako, Profesa oyukasomesaya eby’edini ya Paul Morris akabugha athi: “Sihali eyindi myatsi omo Biblia eyikakanaya ndeke-ndeke oko mwatsi we Edeni.” Nomwakine indi abakahulhawamo “abasomire” bakalighirana nayu, ebya bugha bikahakanisaya ekwenene.

E Biblia yikakanaya kutsibu okw’irima lye Edeni, Adamu, Eva, n’enzoka.a Aliwe esobya y’abasomi balebe ni nyike yamalinganisibwa n’esobya enene kutsibu. Kundi omw’ighania omwatsi owali omwa Nzuko owahambire oko byabya omw’irima lye Edeni, abakulhu b’edini n’abakatsambulikanaya e Biblia bakabya ibakahakanisaya e Biblia eyosi. Bathi?

Ni kikulhu eriyitheghererya ebyabya omu Edeni erithoka eriyitheghererya ebindi ebiri omwa Biblia. Ng’eky’erileberyako, Ekinywe kya Nyamuhanga kiriho erithuwathikya eribana eby’erisubirya okwa bibulyo bikulhu ebya bandu bakabulhaya. Mughulhu mungyi, eby’erisubirya bye Biblia okwa bibulyo ebyo bikakanaya oko byabya omw’irima lye Edeni. Thulebaye eby’erileberyako bino.

● Busana naki thukakekelhuha n’eriholha? Adamu na Eva babya b’eribyaho kera na kera ku balholha embere eriowa Yehova. eriyisamambulha lisa ly’eryanga lekire ibaholha. Ekiro bayisamambulha, mubatsuka eriholha. (Enzuko 2:16, 17; 3:19) Mubaherya engebe eyihikene kandi mubasighalirya abaana babu b’ekibi n’erithendi hikana. Busana n’ekyo, e Biblia yithi: “Ebibi mobyahika munakihugho busana n’omundu mughuma, n’olhuholho mulhwingira busana n’ekibi kiwe, neryo lithya olhuholho molhwahika oko bandu bosi, kusangwa abosi mubakolha ebibi.”​—Abanya Roma 5:12.

● Busana naki Nyamuhanga akalekereraho obubi? Omw’irima lye Edeni, Sitani mwahulha Nyamuhanga mwa mubehi oyukabisa ebihangikwa biwe by’ebibuya. (Enzuko 3:3-5) Busana n’ekyo mwahakanisya ehamuli ya Yehova ey’erithabalha. Adamu na Eva mubathwamu erikwama Sitani; neryo nabu mubabya ibamaghana ehamuli ya Yehova ey’erithabalha, ni bugha ambu, babya ibamakangania bathi omundu angana yithwiramu ekibuya n’ekibi. Omwa bulingirirania n’amenge wiwe ebihikene, Yehova mwaminya ngoku hali nzira nguma nyisa ey’erisubirya ndeke okw’ihakanisya eryo​—erileka obuthuku bulhabe, eriha abandu b’akaghisa ak’eriyithabalhako ngoku banzire. Busana n’ekyo, enguma okwa syonzumwa esikaleka ihabya obubi yiri yithi abandu bakayithabalhako aliwe ibanemusondolhwa na Sitani kandi ekyo kyabirileka ekwenene ngulhu eno iyalhangirika: Omundu syangathoka eriyithabalhako ahathe Nyamuhanga.​—Yeremia 10:23.

● Ni kyahi ekyaleka Nyamuhanga iniahangika ekihugho? Yehova abere akahangika eririma lye Edeni, mwakangania ngoku anzire ekihugho kyosi ekyuwana ng’eririma eryo. Mwabwira Adamu na Eva athi basulhaye ekihugho mw’abaana babu ‘n’erighondyakyo,’ nuku kyuwane ng’eririma lye Edeni. (Enzuko 1:28) Neryo Nyamuhanga ahangika ekihugho nuku kibye paradiso eyikeremu abaana ba Adamu na Eva abahikene,kandi abali bughuma. Ebingyi ebiri omwa Biblia bihambire okw’iberererya ekighendererwa kya Nyamuhanga eky’erimbere ekyo.

● Ni kyahi ekyaleka Yesu Kristo iniasa okwa kihugho? Eriyisamambulha ly’omwa Edeni, erighunzerera mulyakolya oku Adamu na Eva n’abaana babu bosi kw’olhuholho, aliwe omo lhwanzo Nyamuhanga mwaleka habya amaha. Mwathuma Mughalha wiwe okwa kihugho nuku aheyo ekya Biblia yikahulha mwa ndongolya. (Matayo 20:28) Ekyo kikamanyisayaki? E Biblia yikabugha yithi Yesu ni “Adamu w’enyuma,” aliwe erithendibya ng’Adamu, Yesu mwasighalha ini mwowa embere sya Yehova. Neryo mwahayo engebe yiwe ng’ekihongo, kutse endongolya, erileka abandu abosi abathaleghulha ibabya ibangana ghanyirwa ebibi byabu n’erighunzerera ibasyabana engebe eyiri ng’eyo Adamu na Eva babya bawithe bathe bahalya. (1 Abanya Korinto 15:22, 45; Yoane 3:16) Busana n’ekihongo kya Yesu, thukakasirye ngoku ekighendererwa kya Yehova eky’erisubya ekihugho mwa Paradiso nge Edeni kikendi syabererera.b

Ekighendererwa kya Nyamuhanga busana n’ekihugho kilhangirikire ndeke kandi kikayitheghereribawa. Ni ky’okwenene. Ngoku eririma lye Edeni lyanabyaho okwa kihugho imune ebisoro n’abandu hene-hene, kuthya omulhaghe wa Nyamuhanga busana n’obuthuku obukasa ni w’okwenene, akendi bererera omwa buthuku obuthe bwa haali. Wunanzire iwasyalhangira emilhaghe eyo yikabererera? Ekyo kikendi syasighikira okw’iwe. Nyamuhanga akasunzira abandu bosi b’engebe eyo, imwamuli n’abo ababirikolha ebithuwene.​—1 Timoteo 2:3, 4.

Yesu akayaholha, mwakania n’omulhume oyo engebe yiwe yabya iyabiriyithwa lhwangu. Omulhume oyo abya ngoli y’ebibi; abya inianasi ngoku atholere in’ithibwa. Aliwe mwanza Yesu amuhumulikanaye n’erimuha amaha. Yesu mwasubirya athiki? “Wukendi syabya naghe omwa Paradiso.” (Luka 23:43, NWT) Yesu amathabya iniananzire iniasyalhangira oyuwabya ngoli y’ebibi oyo​—iniabirilhubuka kandi inianawithe akaghisa ak’erisyabyaho kera na kera omwa paradiso eyiri nga Edeni—​mbwino nawu syalikusunzira omughisa iwan’oyo? Kwa bine bithya! Thatha wiwe nayu akakusunzira ekyo! Nawu wamabya iwunanzire ekyo, kolha ngoku wangathoka erigha oku Nyamuhanga oyuwakolha eririma lye Edeni.

[Omwatsi ahikwa]

[Akasanduko/​Ebisasani]

OBUMINYERERI OBUKAHAMBANAYA HAGHUMA E BIBLIA

“Kandi nasyahira obuyighu mwa kathi-kathi kawu n’omukali, n’omwakathi-kathi k’ekihanda kyawu n’ekihanda kiwe. Iyo asyabbanda omuthwe wawu, nawu wasyabbanda akasinziro kiwe.”​—Enzuko 3:15.

Obo bw’obuminyereri bwe Biblia obw’erimbere, obo Nyamuhanga abugha omo Edeni. Ni bindu byahi bbini ebikanibweko: omukali, ekihanda ky’omukali, enzoka, n’ekihanda kyayu? Ni mwanziraki hali “obuyighu” ahakathi-kathi kabyo?

ENZOKA

Sitani Diabolo.​—Eribisulirwa 12:9.

OMUKALI

Ekithunga kya Yehova eky’ebihangikwa by’elhubulha. (Abanya Galatia 4:26, 27) Isaya mwakania okwa “mukali,” akalhaghulha athi omukali angabuthire ekihanda ky’obunyakirimu omwa buthuku obukasa embere.​—Isaya 54:1; 66:8.

EKIHANDA KY’ENZOKA

Abakathwamu erikolha erisonda lya Sitani.​—Yoane 8:44.

EKIHANDA KY’OMUKALI

Ekitsweka kikulhu ni Yesu Kristo, oyuwalhua omwa kitsweka ky’ekithunga kya Yehova eky’elhubulha. Kandi omwa “kihanda” mwamuli baghalha bobu Kristo ab’obunyakirimu, abakathabalha nayu elhubulha. Abakristayo abahakabibwa abo ky’ekihanda ky’obunyakirimu, “abandu ba Nyamuhanga,” e Israeli ya Nyamuhanga.​—Abanya Galatia 3:16, 29; 6:16; Enzuko 22:18.

EKIRONDA KY’OKWA KASINZIRO

Obulhumi obwahika oku Masiya aliwe obuthe bwakera na kera. Sitani mwathoka erileka Yesu ahole hano okwa kihugho. Yesu mwalhubukibwa.

OMUTHWE ERIBBANDWA

Sitani erithoghothibwa. Yesu akendi syathoghotherya ighuma Sitani. Ekyo kithe kyabya, Yesu akendi syaghunzaho ebya Sitani atsuka omwa Edeni.​—1 Yoane 3:8; Eribisulirwa 20:10.

[Ekisasani]

Ekibi mukyakolya oku Adamu na Eva kw’erinuba erikalire