E Biblia Yikahindulha Esyongebe
NI KYAHI ekyaleka omulhume w’abakali banene kandi oyuwabya akahakanisya Abema ba Yehova iniathwamu eribya Mwema? Ni kyahi ekyaleka omupasta w’edini y’Abapentekoti iniathwamu erihindulha enyikirirya yiwe? Ni kyahi ekyawathikaya omukali oyuwabana ebitsibu ebikalire iniakine mulere erirwanisya amalengekania w’eriyipona, amathoka eriyithunda hakuhi na Nyamuhanga? Ni kyahi ekyaleka oyuwabya anzire omuziki ow’akabugha kutsibu iniabya Mwema wa Yehova? Soma emyatsi eyi eriminya eby’erisubirya.
“Nabiribya iba mubuya.”—RIGOBERT HOUETO
ABUTHAWA: 1941
EWABU: BENIN
EBY’ENYUM: OW’ABAKALI BANENE, OYUKAHAKANISAYA ABEMA BA YEHOVA
ENGEBE YAGHE ENYUMA:
Ewethu ye Cotonou, etawuni nene omwa Benin. Munakulha ingali Mukatuliki aliwe isindighenda okwa Kelezia mughulhu wosi. Abakatuliki banene ibawithe bakali bangyi, kundi kyabya kilighirwe omwa bilhaghiro okwa buthuku obo. Erighunzerera munathahya bakali bbani.
Habere hakabya embinduka omwa by’ekipolitiki omo myaka ya 1970, munalengekania indi yikendighasira ekihugho kyethu. Munasighika embinduka eyo ya kutsibu kandi munayihwerya omwa by’ekipolitiki. Abakaletha embinduka eyo isibalyendana Abema ba Yehova kundi Abema isibawithe lhuhandi omwa by’ekipolitiki. Nabya mughuma w’okwa b’endereraya Abema. Abamisyonare Abema babere bakathibithwako omwa kihugho kyethu omwa 1976, munalengekania indi sibendi syasasubulha.
NGOKU E BIBLIA YAHINDULHA ENGEBE YAGHE:
Eby’embinduka ebyo mubyahwa omwa 1990. Ekyanyiswekaya, abamisyonare Abema mubalhuaho ibasubulha. Neryo munatsuka erilengekania indi obundi Nyamuhanga abya iniane n’abandu aba. Okwa buthuku obo, munabana owundi mubiiri. Omughuma w’okw’abakoli bahyaka abo nabya ingakolha nabu abya Mwema, kandi aho n’aho mwatsuka erinyithulira. Mwanyikangania amasako we Biblia aw’akakanaya oku Yehova nga Nyamuhanga w’olhwanzo kandi ow’obulingirirania. (Eryibuka Ebihano 32:4; 1 Yoane 4:8) Emibere eyo muyanyitsemesya. Munanza eriminya bingyi oku Yehova, neryo munaligha erigha e Biblia.
Buthuku buke-buke munatsuka erihindana okwa mihindano y’Abema ba Yehova. Munatsema busana n’olhwanzo lhw’okwenene olho nalhangira—eyo siyabya akathondolho kutse erilhangira abandi ng’abalengire abandi. Nabere ing’ongera eribya n’Abema, ku nan’ongera nyithya erilhangira ngoku aba b’abigha ba Yesu ab’okwenene.—Yoane 13:35.
Munathwamu indi namabya w’erikolera Yehova, ingatholere ingasighania Ekikatuliki. Ekyo sikyabya kyolho erikolha, kundi nabya inganasaghire abandi nga bakendi lengekania bathiki. Enyuma w’obuthuku buuli kandi busana n’obuwathikya bwa Yehova, munathunga obuthubaha neryo munathoka erilhua omwa Kikatuliki.
Habya ihane eyindi mbinduka nene eyo nayithagha erikolha. Omw’igha lyaghe lye Biblia munaminya ngoku Nyamuhanga syalilighira eky’eribya n’abakali banene. (Enzuko 2:18-24; Matayo 19:4-6) Omwa meso wiwe obutheke bwaghe bw’erimbere busa ibwabuhikire. Neryo munahandikisya obutheke bwaghe obu n’erithibitha okwa bandi bakali baghe, n’erilhangira nga bakendibya bakabana bathi ebiyithawa byabu. Endambi muyahika, ababiri b’okwa babya bakali baghe bamabya Bema ba Yehova.
NGOKU NABIRIGHASIRWA:
Nomwakine indi mukali waghe akine Mukatuliki, akasikaya erithwamu lyaghe ly’erikolera Yehova. Ithwe bosi babiri thukayowa ngoku nabiribya iba mubuya.
Nabya ingalengekania indi nangan’uwania obulhambu bwethu erilhabira omwa by’ekipolitiki, aliwe ekyo mukyalhangirika ku ni nubira busa. Lino ngalhangira Obwami bwa Nyamuhanga eky’ekindu kisa ekyanga ghunzaho ebitsibu by’abandu. (Matayo 6:9, 10) Ngasima Yehova busana n’erinyikangania enzira eyikalholhaya okwa ngebe eyirimo etseme.
“Si kyabya kyolho erikolha esyombinduka”—ALEX LEMOS SILVA
ABUTHAWA: 1977
EWABU: BRAZIL
EBY’ENYUMA: PASTA WE KIPENTEKOTI
ENGEBE YAGHE ENYUMA:
Nabuthirawa eyihya w’etawuni ye Itu, omw’Ihanga lye São Paulo. Ekitsweka eki ikyasibwe busana n’obubi bwakyo bunene.
Inganzire kutsibu eby’amalhwa n’obutswatswa. Kandi nibya munayingirya omwa by’erighulya ebibatsi ebikathamiraya. Endambi muyahika, namaminya ngoku engebe eyi yangana leka ingaghenda omwa ngomo kutse iyanyihikya okwa lhuholho, neryo munabikyako. Neryo munayiyunga okwa dini y’Ekipentekoti, n’erighunzerera namabya pasta.
Munayowa indi nangana wathikya abandu erilhabira omwa mubiiri waghe w’ekanisa. Nibya iningahira endegheka y’edini okwa rediyo y’omwa bulhambu kandi ekyo mukyaleka ingaminywa kutsibu. Nomwabine, lyolho-lyolho munasa ingalhangira ngoku ekanisa siyitsomene abali muyo—nibya siyitsomene eriha Nyamuhanga y’olhukengerwa. Munayowa indi ekilhubirirwa kisa eky’ekanisa ly’eribana esyosente. Munathwamu erihwa okwa by’ekanisa.
NGOKU E BIBLIA YAHINDULHA ENGEBE YAGHE:
Nabere ingatsuka erigha e Biblia n’Abema ba Yehova, iningalhuaho ingalhangira ngoku bali mbaghane okwa sindi dini. Okw’ingye, hali ebindu bibiri ebyanyitsemesaya. Eky’erimbere, Abema ba Yehova sibalikwama kya kania okwanza Nyamuhanga n’abaliranwa; bakakikanganaya. Ekyakabiri, sibaliyingiraya omwa by’ekipolitiki kutse amalhwa. (Isaya 2:4) Esyonzumwa ibiri esyo musyanyilighisya ku nabiribana edini y’okwenene—enzira nge eyikakolhaya okwa ngebe y’erikotha.—Matayo 7:13, 14.
Munaminya ngoku namabya inganzire eritsemesya Nyamuhanga, ingatholere erikolha esyombinduka nene-nene. Nabya ngatholere eryongera eritsomana eka yaghe. Kandi nabya ngatholere eryongera eribya oyukayikehaya. Sikyabya kyolho erikolha esyombinduka esyayithaghisibawa, aliwe busana n’obuwathikya bwa Yehova, munathoka. Mukali waghe mwatsema busana n’esyombinduka esi. Iyo abya iniabiritsuka erigha e Biblia, neryo mwongera erikulha-kulhana lhuba omw’igha liwe. Buthuku buke-buke muthwaminya ngoku thwanzire eribya Bema ba Yehova. Muthwabatizibwa okwa kiro kighuma.
NGOKU NABIRIGHASIRWA:
Ingye na mukali waghe thutsemire eriwathikya abaana bethu basathu eribya n’obughuma obughumire na Yehova. Eka yethu yitsemire. Ngasima Yehova habw’erinyikangania ekwenene eyiri omwa Kinywe kiwe, e Biblia. Omo kwenene yikahindulha esyongebe sy’abandu! Ngali ky’erileberyako.
“Ngayowa ingahenirye, inganeho, kandi ingalhughirirene.”—VICTORIA TONG
ABUTHAWA: 1957
EWABU: AUSTRALIA
EBY’ENYUMA: MWABANA EBITSIBU EBIKALIRE OMWA BULERE
ENGEBE YAGHE ENYUMA:
Nabuthirawa e Newcastle, New South Wales. Ningye mwana mukulhu omwa baana bethu musanju aba thatha wethu omutsurumi kandi omunywi w’obwabu na mama omutsurumi. Mama waghe iniakanyinubaya kinyamubiri n’omwa binywe. Iniakabera erimbwira athi ngali mubi kandi athi ngendi syahirwa omwa muliro wa kera na kera. Emihayo ng’eyo eyikanyitha obuba.
Mughulhu mungyi ebironda ebyo mama abya akanyihuthalya ibikaleka ingusa okwa sukuru. Nabere ingahikya emyaka 11, eb’egavumente mubanyilhusya okwa babuthi baghe erimbere bamanyithwalha okwa sukuru y’egavumente n’enyuma waho eyikabya abasisita. Nabere nahikya myaka 14, munatswa eyikabya abasisita. Munathanza erisuba eka, neryo munabya omwana w’okwa syombalhu sy’omwa tawuni eye Kings Cross, omwa Sydney.
Ingane okwa syombalhu, munayingirya omwa by’erinywa ebibatsi ebikathamiraya, obwabu, eponografe, n’obumalhaya. Hali ekyalholirweko kighuma ekyanyubahisaya. Nabya ingan’ikere okwa nyumba y’omwinye disiko. Kiro kighuma, abalhume babiri mubasa mulebya. Mwabugha athi ngaghende omwa ngyingo, aliwe ngabya inganowire ebya bakabugha. Omwinye disiko abya akathegheka erinyighulya abalhume abo. Babya ibakendi nyibisa omo bwathu bw’emisiko n’erinyithwalhwa e Japan nuku ngayakolereyo omwa bbara. Munakwa obuba, namayitsyada okwa nyumba, n’erithibitha erisondya obuwathikya.
Munasanga omulhume oyuwabya akaghenda e Sydney, neryo munamusoborera emibere yaghe, inganawithe amaha indi akendimba esyosente. Omwakanya k’ekyo mwanyithwalha eyo abya ikere nuku ambe amaghetse w’eryowa n’eky’erirya. Emyatsi muyahinduka, munathalhwayo. Enyuma w’omwaka mughuma, muthwathahania.
NGOKU E BIBLIA YAHINDULHA ENGEBE YAGHE:
Nabere ingatsuka erigha e Biblia n’Abema ba Yehova, munatsuka eriyowa nabi. Munahithana ingaminya ngoku Sitani yukathulethera ebitsibu; mughulhu wosi iningakangiriribawa indi Nyamuhanga yukaleka ithwaghalhwa. Munathekana ingaminya ngoku syalisuyira abandu omwa muliro wa kera na kera, engangirirya eyabya iyabirinyubahisya habw’emyaka mingyi.
Munatsema busana n’emibere Abema bakathwamu erikwamana ne Biblia. Ibakaghendera okwa bya bakakangiriraya. Ingali mundu oyukalire, aliwe mbulha namabugha kutse erikolha ekiri kithi, Abema ibakakolongana naghe omo lhwanzo n’erisikya.
Ekyanyikalira kutsibu lyabya ery’erirwanisya eriyowa m’owa bbule. Ingabiriyipona kutsibu, kandi eriyowa eryo mulyanyighaniriramu nibya n’enyuma w’eribatizibwa. Inganasi ngoku nganzire Yehova, aliwe ing’ikirirye indi syanganza omundu ng’ingye.
Emyatsi muyahinduka enyuma w’emyaka nga 15 ngali batizibirwe. Omwa mukania mughuma okwa Kisenge ky’Obwami eky’Abema ba Yehova, embuyi muyakania oku Yakobo 1:23, 24. Emilhondo eyi muyalinganisya Ekinywe kya Nyamuhanga n’ekiyo ekya thwangayilhangiramo ngoku Yehova akathulhangira. Munatsuka eriyibulya ebya ngayilhangiramu nga biri mbaghane okwa bya Yehova akalhangira. Erimbere, munaghana amalengekania ayo. Munatsuka erilengekania indi Yehova syanganyanza.
Enyuma w’ebiro bike, munasoma erisako eryahindulha engebe yaghe. Ini Isaya 1:18, aho Yehova akakanibawako ng’oyukabugha athi: “Mwase lino, thukanaye haghuma. Nomo ebibi byenyu byangabya ng’engulha, byasyabya byeru ng’enzururu.” Munayowa Yehova ng’akambwira athi: “Vicky, asa thukanaye haghuma. Nganakwasi, nganasi ebibi byawu, nganasi omuthima wawu—kandi ngakwanzire.”
Munabulha othulho omwa kiro omo. Nabya ingakinathika-thikira eky’eribugha indi Yehova angana nyanza, neryo munatsuka erilengekania okwa kihongo ky’endongolya ya Yesu. Neryo kitsumbukirania, munatsuka erilhangira ngoku Yehova abirinyighumisirizya habw’emyaka, erinyikangania ngoku abirinyanza omwa nzira nyingyi. Aliwe, nabya ng’oyukamubwira athi: “Olhwanzo lhwawu silhunyihikireko. Ekihongo kya Mughalha wawu sikirighunza eriswika ebibi byaghe.” Munabya ng’oyukasubuliraya Yehova y’endongolya omw’imughusirayo. Aliwe lino, erighunzerera, ngabya ingaghanirya okwa kihembo ky’endongolya eki, ngatsuka eriyowa Yehova inianyanzire.
NGOKU NABIRIGHASIRWA:
Ngayowa ingahenirye, inganeho, kandi ingalhughirirene. Obutheke bwaghe bwabiryuwana, kandi ngatsemire kundi nangana kolesya ekyalholirweko kyaghe eriwathikya abandi. Ngayowa ku ngane muyithunda hakuhi na Yehova.
“Eki kyabya ky’erisubirya okwa musabe waghe.”—SERGEY BOTANKIN
ABUTHAWA: 1974
EWABU: RUSSIA
EBY’ENYUMA: OYUWANZIRE OMUZIKI OW’AKABUGHA KUTSIBU
ENGEBE YAGHE ENYUMA:
Nabuthawa e Votkinsk, eyo omwimbi oyuwasibwe ya Pyotr Ilich Tchaikovsky abuthirawa. Eka yethu yabya nyinakwa. Thatha waghe aby’awithe emibere mingyi mibuya, aliwe ini muthamiri, neryo eka emibere iyikalire.
Isindi lhaba ndeke okwa sukuru, kandi obuthuku bwabere bunemulhaba munatsuka eriyowa m’owa bbule kandi nga singendi syabya ng’abandi. Munayighabulha okwa bandi kandi isindi bayikethera. Erighenda okwa sukuru ikikaleka ingatuntura kutsibu. Ng’eky’erileberyako, ingamabya w’erikanirya embere sy’abandi banya sukuru, mughulhu mungyi isindi thoka erisoborera n’ebindu bya buli kiro ebya nangana soborera okwa bundi buthuku. Nabere naghunza ekitebe ky’omunani, okwa ripoti yaghe kwabya kuhandikire kuthi: “Awithe binywe bike, syalithoka eriha amalengekania wiwe.” Ebinywe ebyo mubyanyiponesya kandi mubyaleka ingathasy’ongera eriyilhangira m’owa bbule. Munatsuka eribulha engebe nga yiwithe kighendererwaki.
Omo myaka y’obulengwa bwaghe, munatsuka erinywa obwabu. Okw’itsuka, erinywa irikaleka ingayowa ndeke. Aliwe iningabya inganywa bunene, obunyamuthima-thima bwaghe ibukanyihandikirira. Engebe yaghe muyabya nga siyiwithe kighendererwa. Obwongo bwaghe mubwatsuka erighana, n’okwa bundi buthuku inaghunza omwa nyumba mw’ebiro nga by’ebyo. Munatsuka erilengekania okw’iyitha.
Nabere nahikya myaka 20, munabana erithekana habw’obuthuku buke. Munabumbura ahali omuziki ow’akabugha kutsibu. Omuziki oyo mwanyisubya mw’amani kandi munatsuka erisondya abakahulikiriragho. Munakothya esyonzwiri, namathobolhwa amathwe, n’eritsuka eryambalha ng’abimbi abo ngayighomba. Lyolho-lyolho, munabya mubi kandi mutsurumi, iningabera eritoka n’ab’eka.
Munalengekania indi erihulikirira omuziki ow’akabugha kutsibu kikendi leka ingabya n’etseme, aliwe ku byathabya bithya. Nabya ingali kubya owundi mundu! Neryo nabere n’igha okwa mibere mirebe mibi y’abimbi abo nabya ingayighombe, munayowa nga nabirighoberibwa.
Aho kandi munatsuka erilengekania okw’iyitha—lero kutsibu. Ekindu kisa ekyaleka ingathayitha lyabya iry’erilengekania nga kyangahamba kithi oko mama waghe. Abya anyanzire kutsibu, kandi abya iniabirinyikolera bingyi kutsibu. Emibere muyakalha kutsibu. Munathanza erilholha embere eribyaho, aliwe kandi isinganzire erighunzaho engebe yaghe.
Erithoka eribuzya-buzya obulengekania, munatsuka erisoma emyatsi eyihambire okwa banya Russia. Omwatsi mughuma abya akakania okwa mundu mulebe embangyi oyuwakolera omwa kanisa. Kitsumbukirania munayisunza erikolera Nyamuhanga n’abandi bandu b’ekindu kilebe. Munabwira Nyamuhanga y’ebyosi ebiri okwa muthima, ekindu ekyo nabya isindi nathakolha. Munasaba Nyamuhanga indi anyikanganaye ngoku nangabana ekighendererwa omwa ngebe. Inganemusaba, munasweka ingayowa ingali okw’ithekana. Kandi ibbwa ekyanyiswekaya kutsibu, ky’ekyakwamako. Enyuma w’esyosaha ibiri sisa, omughuma w’okwa Bema ba Yehova mwakongotha okwa lhuyi lhwaghe n’eritsuka erigha naghe e Biblia. Munaligha ngoku eki lyabya isubirya okwa musabe waghe. Ekyo ky’ekyabya ekiro ky’erimbere eky’engebe yaghe embyaka kandi eyiri mw’etseme.
NGOKU E BIBLIA YAHINDULHA ENGEBE YAGHE:
Nomwakine indi sikyabya kyolho, munayihako ebyosi ebyo nabya ngwithe ebihambene n’omuziki ow’akabugha kutsibu. Nomwabine, omuziki mwathahwa omwa muthwe mwa lhuba. Obuli erilhaba ahali emiziki eyo, iningalhuaho ing’ibuka ngebe yaghe ya kera. Mundanza eritswangania amalengekania awathuwene ayo n’ekindu kyosi-kyosi ekyuwene ekyabya ikiri okw’ingira omwa bulengekania n’omwa muthima waghe. Neryo omw’ikighenderera munayihighulha oko myanya ng’eyo. Kandi engebe yaghe ya kera iyikabya yikasa omwa bulengekania, iningasaba erilhua okwa muthima. Erikolha ekyo mukyaleka ingayilhangirira “obuholho bwa Nyamuhanga, obulhabire amenge ghosi.”—Abanya Filipi 4:7.
Nabere nganemw’igha e Biblia, munaminya ngoku Abakristayo bawithe olhukwamirwa lhw’eribwira abandi okw’ikirirya lyabu. (Matayo 28:19, 20) Ing’ikirirye indi sinanga kolha ekyo. Okwa ndambi iyan’eyo, emyatsi mihyaka eyo nabya ing’igha iyikanyilethera etseme n’erithekana. Munaminya ngoku n’abandi batholere ibaminya ekwenene eyi. Nomwanganabya mw’obuba, munatsuka eribwira abandi okwa bya nabya ing’igha. Ekyanyiswekaya, eribwira abandi okwa Biblia ibbwa mukyaleka ing’ongera erisika. Kandi mukyongera erighumya esyonyikirirya syaghe mbyaka omwa muthima.
NGOKU NABIRIGHASIRWA:
Lino ngawithe obutheke obutsemire kandi ngatsemire busana n’eriwathikya abandu nga babu erigha okwa Biblia, imwamune mwali wethu na mama waghe. Erikolera Yehova n’eriwathikya abandi erimw’ighako kyabirileka ingathunga engebe eyiwithe ekighendererwa.