Ekinywe Kya Nyamuhanga Kikweghesaye
Ni Byahi Ebikendi Syabya oko Kiro ky’Eritswera?
Omwatsi ono akakanaya okwa bibulyo ebya wangabya iwabiriyibulya n’erikukangania aho wangabana eby’erisubirya omwa Biblia. Abema ba Yehova ibakendi tsema erikania nawu okwa by’erisubirya ebi.
1. Ekiro ky’Eritswera Niki?
Ngoku kikanganibwe omwa kisasani ekiri okwa mali, abandu banene bakalengekanaya bathi okwa Ekiro ky’Eritswera esyobbiliyoni sy’abandu bakendi syalethwa embere sy’ekithumbi ky’obwami kya Nyamuhanga nuku abatswere erikwamana n’ebyo bakolha kera—abandi erihebwa engebe omwa lhubulha n’abandi erighuswa omwa muliro wa kera na kera. Aliwe e Biblia yakakanganaya ngoku ekighendererwa ky’Ekiro ky’Eritswera ly’erilhamya abandu okwa buthe bulingirirania. (Esyonyimbo 96:13) Nyamuhanga abirisombolha Yesu eribya mutsweri oyukendi syalethera abandu b’obulingirirania.—Soma Isaya 11:1-5; Emibiri 17:31.
2. Ekiro ky’Eritswera kikendi syaletha kithi obulingirirania?
Omundu w’erimbere ya Adamu, omw’ikighenderera abere akayisamambulha oku Nyamuhanga, mw’ingirya ab’ekihanda kiwe omwa kibi, eriaghalhwa, n’olhuholho. (Abanya Roma 5:12) Erilethaho obulingirirania obo, Yesu akendi syasubya, kutse erilhubukya esyobbiliyoni sy’ababiriholha. Ekitabu ky’Eribisulirwa kikabisulha ngoku eki kikendi syabya omwa buthuku bw’erithabalha ly’emyaka rukumi ya Kristo Yesu.—Soma Eribisulirwa 20:4, 11, 12.
Abakendi syalhubukibwa bakendi syatswerwa, butsira erikwamana n’ebya bakolha bathe baholha, aliwe erikwamana n’ebya bakendi syakolha ebiri omwa “bitabu” ebikanibweko omwa Eribisulirwa sura 20 bikabisulhwa. (Abanya Roma 6:7) Abaghuma b’okwa abakendi syalhubukibwa n’erihebwa akaghisa k’erigha oku Nyamuhanga ni “abathunganene n’ababi [“abathathunganene,” NWT],” omukwenda Paulo athya.—Soma Emibiri 24:15.
3. Ekiro ky’Eritswera kikendi syaberereryaki?
Abaholha isibali bathaminya Yehova Nyamuhanga n’erimukolera bakendi syahebwa akaghisa k’erikolha esyombinduka n’erikolha ebibuya. Bamakolha ekyo, erilhubuka lyabu irikendi syabya ‘eriIhubukira okwa ngebe.’ Aliwe abandi b’okwa bakendi syalhubuka sibendisyanza erigha esyonzira sya Yehova. Erilhubuka lyabo likendi syabya ‘erilhubuka ly’eritswera.’—Soma Yoane 5:28, 29; Isaya 26:10; 65:20.
Okw’ihwererera ly’Emyaka Rukumi ery’Ekiro ky’Eritswera, Yehova akendi syabya iniamabirisubya abandu abowa omwa mibere eyihikene erikwamana n’ekighendererwa kiwe. (1 Abanya Korinto 15:24-28) Abandu abowa ka balindirire ebibuyanga! Omw’ilengesibwa ly’erighunzerera, Nyamuhanga akendisy’iha Sitani Diabolo y’omwa buhya obw’akendi syabya iniabiriboherwamo habw’emyaka rukumi. Sitani kandi akendi syalengesya erilhusya abandu b’oku Yehova, aliwe abakendi syamughana bakendi syatsemera engebe okwa kihugho kera na kera.—Soma Isaya 25:8; Eribisulirwa 20:7-9.
4. Ni kindi kiro kyahi eky’eritswera ekikendi syaghasira abandu?
E Biblia kandi yikakolesaya ekinywe “ekiro ky’eritswera” erikania okwa bikendi syabya erighunzaho omughulhu mubi ono. Ekiro ky’eritswera eki kikendi syasa kitsumbukirania ng’Erighunga ly’Amaghetse ly’ebiro bya Noa, eryaghunzaho abandu babi abosi. Eky’obutseme, erithoghothya linene ly’abandu babi likendi kyungulha enzira y’ekihugho kihya-kihya “aho ekithunganene kikasiba.”—Soma 2 Petero 3:6, 7, 13.