E BIBLIA ERISUBIRYA OKWA BIBULYO

Ni kyahi ekikaleka abangyi ibaligha bathi hane Omuhangiki?

Emyaka nga 3,000 eyihwere, omusakangyi mughuma mwahandika athi: ‘Nabirihangikwa omo nzira y’eryubahya.’ (Esyonyimbo 139:14, e Biblia y’Ekinandi eya 1996) Wukabya wamathalengekania ngoku omwana akakulira omwanda, mbwino sikiri kuswekaya kutsibu? Abangyi bakaligha ngoku hali Omuhangiki oyuwakolha obuli kindu.​—Soma Esyonyimbo 139:13-17; Abaebrania 3:4.

Oyuwahangika obuli kindu n’erikolha ekihugho eribya ikyangan’ikalhwamu yuwahangika n’engebe. (Esyonyimbo 36:9) Abiribwira abandu b’ebimuhambireko.​—Soma Isaya 45:18.

Mbwino thwanalhua omwa bisoro?

Omwa mibere mingyi, emibiri yethu yine ng’ey’ebisoro. Aliriryo eki kikabya kundi ebisoro n’abandu, ebyosi byakolhawa n’Omuhangiki eribya okwa kihugho. Mwakolha omundu w’erimbere omwa muthaka butsira erilhua omwa kisoro.​—Soma Enzuko 1:24; 2:7.

Abandu ni ba mbaghane okwa bisoro omwa nzira ngulhu ibiri. Ey’erimbere, abandu bangana thoka eriminya, eryanza, n’erisikya Omuhangiki. Eyakabiri, abandu mubahangikwa ini b’eribyaho kera na kera isibaliholha, aliwe ebisoro eyihi. Aliwe lino abandu nabu bakaholha kundi omundu w’erimbere mwathaghendera okwa busondoli bw’Omuhangiki.​—Soma Enzuko 1:27; 2:15-17.