Ekikaleka Ithwibuka Ekihulho ky’Omukama eky’Erigholho

1, 2. Ni kyahi ekya Yesu akolha omw’igholho-gholho lye Nisani 14, 33 E.K.? (Lebaya ekisasani ekiri okw’itsuka.)

OBUTHUKU ni kiro, aliriryo okwezi okwamabiribya kighoma kunemukolerya e Yerusalemu. N’igholho erye Nisani 14, 33 E.K. (Ekighanzire Kino.) Yesu n’abakwenda biwe bamabirikolha omukonga w’Erikyuruka, bak’ibuka ekiro Abaisraeli balhusibawa omwa bunyewa, emyaka nga 1500 enyuma. Yesu amabya abirisighalha n’abakwenda abathaleghulha 11, amatsukisya omukonga w’ekihulho ky’embaghane, ekikendisyabya kikakolesibwa eryibuka olhuholho olhwabya ilhukayamuhikako ekiro ekyo.a​—Mt. 26:1, 2.

² Okwa ndambi eyo, Yesu amimya omuggati, amatsumulhagho n’erihagho abakwenda, athi: ‘Mwimayegho, mulye.’ Ak’imaya olhuthehi lhw’ebinyu, kandi akathasyaha ewasingya, n’eribugha athi: ‘mupulhaye kulho, inywe bosi.’ (Mt. 26:26, 27) Ekyo kikendibya kikahwa, Yesu awithe bingyi eby’eribwira abakwenda biwe omwa kiro omo.

3. Ni bibulyo byahi ebya thukendi kaniako?

³ Aho, Yesu abya iniamatsukisya omukonga ow’Eryibuka olhuholho lhwiwe, ow’akanahulhawa mo ‘Emeza y’Omukama,’ kutse Ekihulho ky’Omukama eky’Erigholho. (1 Kor. 11:20) Abandi banganayibulya bathi: Busana naki ithw’ibuka olhuholho lhwa Yesu? Omuggati n’ebinyu bikamanyisayaki? Thwanga yitheghekera thuthi Eryibuka? Ni bahi abatholere erirya n’erinywa? Kandi Abakristayo bakayowa bathi okwa maha wabu agho Masako akakanayako?

EKIKALEKA ITHWIBUKA OLHUHOLHO LHWA YESU

4. Ni kyahi ekyabiri thokekana busana n’olhuholho lhwa Yesu?

⁴ Kundi thwalhua omu Adamu, thwabirisighalya ekibi n’olhuholho. (Abar. 5:12) Omundu oyuthahikene syangaha Nyamuhanga y’embanulho busana n’engebe yiwe kutse ey’abandi. (Esy. 49:6-9) Aliriryo omwa lhuholho lhwiwe, Yesu musa yuwaliha embanulho eyikalighawa. Abere ahika embere sya Nyamuhanga elhubulha, Yesu mwabya iniamaberererya omughaso w’embanulho yiwe erileka ikyathokekana ithwe erilhamibwa okwa kibi n’olhuholho n’erisyabana ekihembo eky’engebe y’erikotha.​—Abar. 6:23; 1 Kor. 15:21, 22.

5. (a) Thukaminya thuthi ngoku Nyamuhanga na Kristo banzire abandu? (b) Busana naki isithwabulha okw’ibuka olhuholho lhwa Yesu?

⁵ Embanulho erihebwa, kikakanganaya ngoku Yehova anzire abandu. (Yn. 3:16) Na Yesu eriyihayo, kikakanganaya ngoku nayu athwanzire. Kandi kwenene Yesu athali asa okwa kihugho, iniane elhubulha ‘ng’omukoli mukulhu’ wa Nyamuhanga, ‘obutseme bwiwe bwabya haghuma n’abaghalha b’abandu’! (Emi. 8:30, 31) Erikangania ngoku thukasima Nyamuhanga na Mughalha wiwe, sithutholere thukabulha okw’ibuka olhuholho lhwa Yesu. Eki ikikendi kangania ngoku thukaghondera ekihano kino: ‘Mukole muthya busana n’erinyibuka.’​—1 Kor. 11:23-25.

EKYA BIMINYISYO BIK’IMANIRA

6. Thutholere ithwalhangira thuthi omuggati n’ebinyu?

⁶ Abere akatsukisya omukonga w’Eryibuka, Yesu mwathahindulha omuggati n’ebinyu eribya mubiri n’omusasi wiwe byenyine. Yesu eribugha athi: ‘Oyu ni mubiri waghe,’ n’okwa binyu eribugha athi: ‘Oyu ni musasi waghe w’endaghane owakuthawa busana n’abandu bangyi,’ abya iniakakanganaya ngoku omuggati n’ebinyu bitholere ibyalhangirwa ng’ebiminyisyo.​—Mk. 14:22-24.

7. Omuggati ak’imaniraki?

⁷ Okwa mukonga mukulhu kutsibu oyo omo mwaka owa 33 E.K., Yesu mwakolesya omuggati owathe mwa kihamya owasighalira okwa mukonga w’Erikyuruka. (Eri. 12:8) Omwa Masako, ekihamya kikanamanyisaya ekibi. (Mt. 16:6, 11, 12; Lk. 12:1) Busana n’ekyo, Yesu erikolesya omuggati owathe mwa kihamya kyabya kitholere kundi omuggati oyo imanira omubiri wiwe owathe mwa kibi. (Ebr. 7:26) Neryo omuggati ng’oyo w’akakolesibawa okw’Ibuka.

8. Ebinyu bikimaniraki?

⁸ Ebinyu ebikakolesibawa okw’Ibuka munabwire bikimanira omusasi wa Yesu, ng’eby’akolesaya okwa Nisani 14, 33 E.K. E Gologota, omusasi wiwe muthika “busana n’eribuyira ebibi.” (Mt. 26:28; 27:33) Kundi omuggati n’ebinyu byimanira ekihongwa kya Yesu eky’obughuli busana n’abandu kandi eribya ithukasima emitheghekere eyi, kitholere obuli mundu eriyitheghekera omukonga w’obuli mwaka oyu ow’eryibuka Ekihulho ky’Omukama eky’Erigholho.

NGOKU WANGA YITHEGHEKA

9. (a) Busana naki ni kikulhu erighenda-ghendania n’endegheka ey’erisoma amasako awahambire okw’Ibuka? (b) Wukayowa wuthi busana n’embanulho?

⁹ Omw’ighenda-ghendania n’endegheka ey’erisoma amasako awahambire okw’Ibuka awakabanika omwa katabu ak’erisako lya buli kiro, ithwangana ghanirya okwa bya Yesu akolha athali aholha. Eki ikikendi leka ithwathegheka omuthima wethu busana n’Ekihulho ky’Omukama eky’Erigholho. Mwali wethu mwahandika athi: “Thukalindirira kutsibu ekiro ky’Eryibuka. Obuli mwaka kikongera eribya ky’embaghane. Ng’ibuka ingan’imene hakuhi n’omulambo wa thatha waghe mwanzwa . . . kandi ngoku ekyo mukyaleka ingasima kutsibu embanulho. . . . Ni kwenene ngabya inganasi amasako awahambire okwa mbanulho kandi ngoku nanga soborereragho! Aliriryo ekindu ky’obulighe eki kyabere kyanyibyako, munabya naminyire kwesi ekya mbanulho yikendi syathukolera, neryo mukyaleka omuthima waghe iniatsanga.” Omwa kwenene, omughulhu thukayitheghekera Eryibuka, kyuwene ithwe erighanirya ngoku ekihongwa kya Yesu kikathulhamaya okwa kibi n’olhuholho.

10. Eriyitheghekera Eryibuka lyanga hamba lithi okwa mubiiri wethu w’erithulira?

¹⁰ Eriyitheghekera Eryibuka iwangana lengekania n’okwa mitheghekere ey’eryongera omubiiri w’erithulira, ng’eribya mutemburi omuwathikya omwa buthuku obu. Thukabya thukakokya abigha be Biblia n’abandi okw’Ibuka, thukabana etseme thukakania oku Nyamuhanga, Mughalha wiwe, n’emighisa eyikendi syahebwa abakatsemesaya Yehova n’erimupipa.​—Esy. 148:12, 13.

11. Abanya Korinto abandi mubakolesya bathi nabi ebiminyisyo eby’okw’Ibuka?

¹¹ Omughulhu wukayithghekera Eryibuka, lengekanaya okwa kya mukwenda Paulo ahandikira Abakrisitayo abe Korinto. (Soma 1 Abanya Korinto 11:27-34.) Paulo mwakangania ngoku omundu oyuwangalya okwa muggati n’erinywa okwa lhuthehi isyatholere, akabya ‘iniamahalya okwa mubiri n’omusasi w’Omukama,’ Yesu Kristo. Busana n’ekyo omuhakabibwa atholere ‘iniayitswera’ ndeke imwalya n’erinywa okwa biminyisyo. Bithe bithya, ‘amalya n’eripulya akayilethera olhubanza.’ Abanya Korinto abangyi abakikolha omwa mibere eyithatholere mukyaleka ‘ibalhwalha n’eribya bolho-bolho, n’abandi bamaholha’ bunyakirimu. Obundi, abandi mubalya n’erinywa kutsibu Eryibuka lithe lyatsuka kutse okwa ndambi y’Eryibuka, erileka ibabya isibathekene omwa malengekania n’eritheya bunyakirimu. Erirya n’eripulya omwa mibere ng’eyi mukyaleka Nyamuhanga iniabapona.

12. (a) Paulo mwalinganisya Eryibuka ng’erikolhaki, kandi mwakunga athi abakalya? (b) Oyukalya amawa omw’ilholho atholere iniakolhaki?

¹² Paulo mwalinganisya Eryibuka ng’ebyalya ebikalibawa imune n’abandi, neryo amakunga abakalya athi: ‘Simwangathoka eripulya okwa lhuthehi lhwa Yehova n’olhuthehi lhw’esyombinga, simwangathoka erisangira eby’emeza ya Yehova n’eby’emeza y’esyombinga.’ (1 Kor. 10:16-21) Omundu oyukalya n’eripulya okwa Kihulho ky’Omukama amawa omw’ilholho, atholere iniasaba eriwathikibwa bunyakirimu. (Soma Yakobo 5:14-16.) Omuhakabibwa ng’oyo amakolha emibiiri ‘eyikaleka abandu ibaminya kw’abirihindulha omuthima wiwe’ kutse eriyisubamu, amalya, iniakendibya isyathakangania erithendi sikya.​—Lk. 3:8.

13. Busana naki kyangabya ky’omughaso erisaba busana n’amaha awathuwithe erilhua oku Nyamuhanga?

¹³ Thukayitheghekera Eryibuka, ithukendi bana ini ky’omughaso erisaba ithunemulengekania kutsibu okwa maha awathuwithe erilhua oku Nyamuhanga. Sihali mughombe wa Yehova n’omughuma oyuwanganza erikangania erithendi sikya ekihongwa kya Yesu omw’irya n’eripulya okwa biminyisyo by’okw’Ibuka hamabya isihali ekikaleka inialigha ndeke-ndeke ku ni muhakabibwa. Neryo ibbwa, omundu angaminya athi kw’atholere erirya kutse eyihi?

NI BAHI ABATHOLERE ERIRYA?

14. Endaghane nyihya-nyihya yikahamba yithi okw’irya okwa biminyisyo by’okw’Ibuka?

¹⁴ Abatholere erirya okwa biminyisyo by’okw’Ibuka sibalibya mw’erithika-thika nahake ko ni b’okwa ndaghane nyihya-nyihya. Okwa binyu, Yesu mwabugha athi: ‘Olhuthehi olhu ni ndaghane nyihya-nyihya omo musasi waghe.’ (1 Kor. 11:25) Erilhabira omwa muminyereri Yeremia, Nyamuhanga mwalhaghulha athi akendi syakolha endaghane nyihya-nyihya eyangabere y’embaghane okwa ndaghane y’Emighambo ey’akolha n’Abaisraeli. (Soma Yeremia 31:31-34.) Nyamuhanga abirikolha endaghane nyihya-nyihya n’abandu ba Nyamuhanga kutse e Israeli ey’obunyakirimu. (Gal. 6:15, 16) Endaghane eyi yabirithokekana busana n’ekihongwa kya Kristo kandi yine mukolha busana n’omusasi wiwe owuthika. (Lk. 22:20) Yesu ya Musangania ow’endaghane eyi, n’abahakabibwa abathaleghulha abak’ingira omwa ndaghane eyi bakahebawa engebe elhubulha.​—Ebr. 8:6; 9:15.

15. Ni bahi ababiringira omwa ndaghane ey’Obwami, kandi balindirire erihebwa kihemboki bamathendi leghulha?

¹⁵ Abakalya bakabya ibanasi ngoku babiringira omwa ndaghane ey’Obwami. (Soma Luka 12:32.) Abakabya bahakabibwa n’erikwama Yesu buthaleghulha, ibanemusangira omwa malighe wiwe, ni b’erisyathabalha haghuma nayu elhubulha. (Fil. 3:10) Kundi bali omwa ndaghane ey’Obwami, abahakabibwa abathaleghulha bakendi syathabalha haghuma na Kristo ng’abami elhubulha erihika kera na kera. (Erib. 22:5) Abandu ng’aba ba batholere erirya okwa Kihulho ky’Omukama eky’Erigholho.

16. Omwa bikuhi soborera Abanya Roma 8:15-17.

¹⁶ Abo basa abakabwirawa n’omulimu indi ni baana ba Nyamuhanga ba batholere erirya. (Soma Abanya Roma 8:15-17.) Omwa mubughe wa Aramaiki, ekinywe ekya Paulo akolesaya ekikamanyisaya “Thatha” ni “Abba.” Omwana iniangana kolesya ekinywe eki akabirikira thatha wiwe, kundi ni kinywe ekikakanganaya obughuma n’olhwanzo eby’omwana na thatha bawithirene. Ababirithunga ‘omulimu owakabayira mo baghalha ba Nyamuhanga’ babiribya baana biwe. Omulimu wa Nyamuhanga akathulhagho haghuma n’ekirimu kyabu, neryo ibaminya ngoku ni baghalha ba Yehova abahakabibwa. Si bugha indi kundi ibo sibathatsemera erisyabya okwa kihugho. Banasi ndeke-ndeke ngoku bakendi syathabalha haghuma na Yesu omo Bwami bw’elhubulha bamathendi leghulha. Munabwire, abakiriho y’emisighalira ey’okwa 144,000 ey’abakakwama olhughobe lhwa Kristo, “ababirihakabibwa n’oyubuyirire,” Yehova. (1 Yn. 2:20, NW; Erib. 14:1) Omulimu wiwe akabathokesaya eribirikira bathi, ‘Thatha, Thatha!’ Ka ni b’omughisa eribya n’obughuma ng’obu na Nyamuhanga!

ERIYOWA LYAWU BUSANA N’AMAHA WAWU ERILHUA OMWA MASAKO

17. Abahakabibwa bawithe mahaki, kandi bakakithwalha bathi?

¹⁷ Wamabya iwuli Mukrisitayo omuhakabibwa, amaha w’erighenda elhubulha ni mwatsi ow’erihira omwa misabe yawu. Omughulhu e Biblia yikakanaya ‘okw’isimolibwa’ kutse erilhaghanisibwa eriherukira iba w’omuheruki, Yesu Kristo, wukayihira kyoko, kandi iwalindirira erisyabya mughuma w’okw’abakahulhawa mwa “muheruki” wa Kristo. (2 Kor. 11:2; Yn. 3:27-29; Erib. 21:2, 9-14) Omwa Kinywe kiwe, Nyamuhanga akabya akakangania olhwanzo lhwiwe busana n’abaana biwe abahakabibwa, omw’iyowa lyawu, wukabugha wuthi, “Oyo n’ingye.” Kandi Ekinywe kya Yehova kikabya kikaha baghalha biwe abahakabibwa b’obusondoli, omulimu abuyirire akaleka iwabughondera n’eribugha omwa muthima wuthi, “Ekyo kimbambireko.” Neryo omulimu wa Nyamuhanga n’ekirimu kyawu bikathulhagho ngoku wuwithe amaha w’erighenda elhubulha.

18. “Esindi mbuli” siwithe mahaki, kandi wukayowa wuthi busana n’ekyo?

¹⁸ Okwa lhundi lhuhandi, wamabya iwuli w’okwa “ndeko nene” ‘ey’esindi mbuli,’ Nyamuhanga abirikuha amaha w’erisyabya okwa kihugho. (Erib. 7:9; Yn. 10:16) Wanzire iwasyabyaho kera na kera omwa Paradiso, kandi kikakutsemesaya wukaghanirya okwa kya Biblia yikabugha okwa ngebe eyikendi syabya okwa kihugho. Wukalindirira n’omuhwa eribya omwa buholho bunene iwune n’ab’eka yawu n’abandi abathunganene. Wukalindirira kutsibu omughulhu sihendi syasabya enzalha, obwera, eriaghalhwa, amalhwere, n’olhuholho. (Esy. 37:10, 11, 29; 67:6; 72:7, 16; Isa. 33:24) Wukakandira kutsibu erisy’angirira abakalhubuka ibane n’amaha aw’eribyaho kera na kera okwa kihugho. (Yn. 5:28, 29) Ka wangabya iwukasima kutsibu eribya Yehova iniabirikuha amaha aw’erisyabya okwa kihugho! Nomwakine indi simulirya n’eripulya okwa biminyisyo, mukahindana okw’Ibuka mukakangania ngoku mukasima ekihongwa eky’embanulho ya Yesu Kristo.

WUNE MWENDI SYABYAHO?

19, 20. (a) Amaha awa Nyamuhanga abirikuha anga bererera athi? (b) Ni kyahi ekikendi syaleka iwahindana okw’Ibuka?

¹⁹ Mbulha wuwithe amaha aw’erisyabya okwa kihugho kutse elhubulha, akendi syabererera iwunalyakanganaya erikirirya omu Yehova Nyamuhanga, Yesu Kristo, n’embanulho. Erihindana okw’ibuka, kikendi syakuha akaghisa ak’erilengekania okwa maha awa wuwithe n’okwa mughaso munene ow’olhuholho lhwa Yesu. Kwesi lhubirira eriyiyunga okwa abandu bangyi abakendi syahindana okwa Kihulho ky’Omukama, Kyakathano, ebiro 3 Okwakani, 2015 okwa Bisenge by’Obwami ebiri ewenyu n’ehandi omwa kihugho kyosi eryuba lyabirilenga.

²⁰ Erihindana okw’Ibuka lyanganaleka iwongera erisima ekihongwa kya Yesu eky’embanulho. Erihulikirira ndeke omukania kyangana kuhira mw’omuhwa ow’erikangania abikalhani bawu b’olhwanzo omw’ibathulira ebya wabirigha okwa lhwanzo lhwa Nyamuhanga n’ekighendererwa kiwe kikulhu busana n’abandu. (Mt. 22:34-40) Kolha ekyosi-kyosi erithoka erisyabyaho.