Yehova Akalhangira Abaghombe Biwe Abakayikehaya mwa b’Obughuli

1. Yehova akalhangira athi abakayikehaya? Soborera.

YEHOVA anzire abakayikehaya. Abakayikehaya erilhua okwa muthima basa babangabya banywani biwe. Aliwe, “ab’emiyiheko ibo akabalhangira ibali haali.” (Esy. 138:6, NW) Ithwe bosi thwanzire eritsemesya Yehova n’eriyilhangirira olhwanzo lhwiwe, neryo kwesi thutholere ithw’igha eriyikehya.

2. Thukendi kania okuki omo mwatsi ono?

² Omo mwatsi ono, thukendi subirya ebibulyo bisathu bino: (1) Eriyikehya niki? (2) Busana naki thutholere ithw’igha eriyikehya? (3) Kyanga thukalira mughulhu wahi eriyikehya? Ngoku thukendi lhangira, thwamayikehya, thukatsemesaya Yehova nethu ithwaghasirwa.​—Emi. 27:11; Isa. 48:17.

ERIYIKEHYA NIKI?

3. Eriyikehya niki?

³ Eriyikehya ly’erithendi yowa nga thulengire abandi kutse eribyamo emiyiheko. E Biblia yikakanganaya ngoku oyukayikehaya akaminya ngoku Yehova Nyamuhanga amulengire kutsibu. Oyukayikehaya akaminya ngoku obuli mundu anawithe eky’amulengirye.​—Fil. 2:3, 4.

4-5. Busana naki oyukalhangirika ng’ayikehirye anganabya isyayikehirye?

⁴ Abandi bakalhangirika nga bayikehirye. Banganabya ini b’esisoni. Kutse bangana kangania erisikya kutse obwolho kundi ababuthi babu ku babakangiriraya bathya. Aliwe omwa muthima, ibabya ibali mw’emiyiheko. Endambi yikahika, ikyaminyikalha nga banayikehirye kutse eyihi.​—Lk. 6:45.

⁵ Nomwabine, sikirimanyisaya indi abandu abakabya nga sibali mw’esisoni ni b’emiyiheko. (Yn. 1:46, 47) Aliwe abandu ab’emibere ng’eyo batholere ibayitheya okw’iyikethera amaaka wabu ayo nuku sibase mw’emiyiheko. Mbulha thuli b’esisoni kutse eyihi, ithwe bosi thutholere ithw’igha eribya n’omuthima w’eriyikehya.

6. Ngoku kiri omu 1 Abanya Korinto 15:10, eky’erileberyako ky’omukwenda Paulo kikathweghesayaki?

⁶ Thulebaye eky’erileberyako ky’omukwenda Paulo. Yehova mwamukolesya kutsibu eritsukisya ebithunga omwa miyi mingyi. Angabya imwakolha bingyi omwa mubiiri w’erithulira kwilhaba abandi bakwenda ba Yesu Kristo. Aliwe, Paulo mwathayowa ng’alengire balikyabo. Omw’iyikehya, mwabugha athi: “Indi muke okwa bakwenda bosi, kandi sinyitholere eryahulhwa mo mukwenda, kusangwa munendererya ekanisa ya Nyamuhanga.” (1 Kor. 15:9) Neryo, Paulo mwakangania ngoku engolongana yiwe eyuwene na Yehova, si busana n’emibere yiwe kutse ebyo akakolha aliwe ku ni busana n’olhukogho lhwa Nyamuhanga. (Soma 1 Abanya Korinto 15:10.) Eri n’isomo libuya ery’eriyikehya erya Paulo ahira omwa baruha ey’ahandikira Abanya Korinto​—kutsibu-tsibu omughulhu omwa kithunga mwabya imune abandi balhume ababya bakanza erikangania nga balengire Paulo!​—2 Kor. 10:10.

7. Baghalha bethu balebe abasibwe ab’omwa buthuku buno babirikangania bathi eriyikehya? Iha eky’erileberyako.

⁷ Eriyikaniako lya Mughalha wethu Karl F. Klein oyuwabya okwa Kathunga Akakasondolha, lyabiriwathikya abandu ba Yehova bangyi. Omw’iyikaniako liwe, omw’iyikehya Mughalha wethu Klein mwahulha ebitsibu bingyi ebyabya iniabirilhabamu ahabw’emyaka mingyi. Ng’eky’erileberyako, abere akalengesya erithulira nyumba okwa nyumba omwa 1922, mwalhangira ini mubiiri owakalire, neryo mwabikyako habw’emyaka ibiri. Enyuma waho, inianemukolera okwa Beteli, mughalha wethu mulebe mwamuhabulha, neryo mwamuhithanako habw’obuthuku. Kandi mwasisira kw’obwongo, aliwe amalhama enyuma waho. Nomwabine, mwahebwa esyonzunzo nyingyi. Thalengekania mughalha wethu oyuwabya asibwe ng’oyu nga mwayikehya bungahi akakania okw’ilemererwa liwe! Balikyethu bangyi bak’ibuka eriyikaniako erithe mw’eribisirira eri erya Mughalha wethu Klein.b

BUSANA NAKI THUTHOLERE ITHW’IGHA ERIYIKEHYA?

8. Ekitabu kya 1 Petero 5:6 kikathuwathikaya kithi erilhangira ngoku eriyikehya likatsemesaya Yehova?

⁸ Enzumwa ngulhu eyikaleka ithw’igha eriyikehya yiri yithi kikatsemesaya Yehova. Omukwenda Petero mwakangania eki kya ndeke-ndeke. (Soma 1 Petero 5:6.) Ekitabu “Come Be My Follower” kikakanaya okwa binywe bya Petero kithi: “Emiyiheko yiri ng’obutwa (esumu). Ebikalhwiririramo byanganabya bibi kutsibu. Ni mubere owangaleka n’omundu w’amenge iniabya wa bbule embere sya Nyamuhanga. Aliwe, eriyikehya, lyangana leka n’omundu w’ahisi iniabya w’omughaso munene embere sya Yehova. . . . Akendianza erikuhemba busana n’eriyikehya lyawu.”c Omo kwenene ekindu ekyuwene ekya thwanga kolha ly’eritsemesya Yehova.​—Emi. 23:15.

9. Eriyikehya lyanga leka lithi abandi ibanza erithunywana?

⁹ Eryongera okw’itsemesya Yehova, thukabana emighisa mingyi thwam’igha eriyikehya. Eriyikehya likaleka abandi ibanza erithunywana. Eriyitheghererya eki kya ndeke, yihire omwa bisandu by’abandi. (Mt. 7:12) Sithulianza eribya n’abandu abakamaghirira ekyabu kandi abakaghana amenge w’abandi. Aliwe, thukayowa buholho eribya n’abalikyethu ‘abanzene ng’abasubeneko, ab’omuthima mubuya, kandi abakayikehaya.’ (1 Pet. 3:8) Thwamayihira okwa bandu ng’abo, nabu ibangana thuyihirako​—kighuma kisa thwamabya ithunayikehirye.

10. Eriyikehya likolhobaya lithi engebe?

¹⁰ Eriyikehya likolhobaya engebe. Omo kwenene, thwanganabya ithune mubana ebindu ebikabya nga si by’obulingirirania. Omulhume w’amenge Omwami Solomona mwabugha athi: “Nabirilhangira abaghombe okwa syosabayiri, n’abanya-mwami bakalendera okwa kithaka ng’abaghombe.” (Omu. 10:7) Mughulhu mungyi, abandu abakakolha ndeke ebindu, sibo bakasimawa. Kandi abakakolha ikwan’oko ba bakasimawa. Nomwabine bithya, Solomona mwabugha athi ambi ithwaghenda-ghendania n’ebyamabya omwakanya k’eriyilhumya kw’omuthwe emibere yikahinduka. (Omu. 6:9) Thwamabya ithuyikehirye, ikikendi thwolhobera erighenda-ghendania n’emibere eyiriho nomuthwangabya isithwanzireyo.

KYANGA THUKALIRA MUGHULHU WAHI ERIYIKEHYA?

11. Thutholere ithwakolhaki thukahabulhwa?

¹¹ Buli kiro, thwangana kangania ku thuyikehirye. Thalebya eby’erileberyako bike. Omughulhu thukahabulhawa. Thutholere thw’ibuka ngoku omundu erisalha ahiraho akaghalha erithuhabulha, thukabya ithwabirisobya. Okwa buthuku ng’obo, thwangana yisanga ithwabirighana erihabulhwa. Ithwangana tsweba omundu oyuwamathuhabulha kutse emibere eya mathuhabuliramo. Aliwe thwamabya ithunayikehirye, ithukendi lengaho eribya n’amalengekania awatholere.

12. Erikwamana n’ebiri omwa Emisyo 27:5, 6, busana naki thutholere ithwasima oyukathuhabulha? Iha eky’erileberyako.

¹² Oyukayikehaya akasima erihabulhwa. Ng’eky’erileberyako: Thalengekania iwune okwa mihindano. Enyuma w’erikania n’abalikyethu bangyi, omwa menge omughuma iniakuhengeka n’erikubwira athi okwa meno wawu kwabirisighalha akandu. Ahathe erithika-thika, iwukendi yowa nabi. Aliwe kandi iwukendi musima habw’erikubwira. Nibya, iwanganayowa wuthi ambi wulyabwirawa lhuba! Kuthya, omw’iyikehya thutholere ithwasima mulikyethu oyuwabirikangania obuthubaha erithuhabulha omughulhu likayithaghisibawa. Omundu oyo thukamulhangira ng’omunywani, butsira ng’enzighu.​—Soma Emisyo 27:5, 6d; Gal. 4:16.

13. Thwanga kangania thuthi eriyikehya abandi bakahebwa esyonzunzo?

¹³ Abandi bakahebwa esyonzunzo. Omusyakulhu oyukahulhawamo Jason akabugha athi: “Ngabya ingalhangira abandi bakahebwa esyonzunzo, nganabulha ekikaleka ingathasombolhwa.” Wune wathayowa wuthya? Si kibi ‘erisimbirira’ eribana esindi nzunzo. (1 Tim. 3:1, NW) Aliwe, thutholere ithwatheya amalengekania wethu. Thwamathendi yitheya, ithwangana lighira emiyiheko erithukuliramo. Ng’eky’erileberyako, omulhume Omukristayo angana tsuka erilengekania athi yutholere kutsibu erikolha omubiiri mulebe omwa kithunga. Kutse omukali omuthahibwa Omukristayo anganalengekania athi, ‘Mwira waghe yuwasi erikolha omubiiri oyu kwilhaba mughalha wethu olya!’ Aliwe, thwamabya kwenene ithunayikehirye, ithukendi yitheya okwa muthima w’emiyiheko ng’oyo.

14. Ekya Musa akolha abandi bakahebwa esyonzunzo kikathweghesayaki?

¹⁴ Thwangan’ighira okwa ekya Musa akolha abandi bakahebwa esyonzunzo. Musa iniakalhangira olhukwamirwa lhwiwe olhw’erisondolha ekihanda kye Israeli mwa lhw’obughuli. Musa mwayowa athi Yehova akalighira abandi erikolha haghuma na Musa? Mwathakwa erihale. (Emig. 11:24-29) Omw’iyikehya mwalighira abandi erimuwathikya eritswera abandu. (Eri. 18:13-24) Eki mukyaleka Abaisraeli ibatswerwa ndeke. Eki kikakanganaya ngoku Musa mwathahira esyonzunzo siwe sy’embere okwa biyithawa by’abandi. Eki ni ky’erileberyako ekyuwene! Thwamabya thwanzire eribya b’omughaso embere sya Yehova, thutholere ithwaminya ngoku eriyikehya lirengire eriminya bingyi. “Nomwakine indi Yehova ali eyighulhu kutsibu, anasamalire abakayikehaya.”​—Esy. 138:6, NW.

15. Ni mbinduka syahi esya bandi babiribana?

¹⁵ Hakabya esyombinduka. Omwa myaka ya lino-lino, balikyethu abamabirikolera Yehova habw’emyaka mingyi babiribana esyombinduka omwa syonzunzo syabu. Ng’eky’erileberyako, omwa 2014, abalebererya be disitrikiti n’abakali babu mubimanibwa n’erihebwa esindi nzunzo omwa mubiiri w’omughulhu wosi. Eritsuka omwaka oyo, abalebererya b’omuthimbo mubabya isibanga thasyakolha olhusunzo olho bamabirihikya myaka 70. N’abaghalha bethu ab’emyaka 80 sibangathasyakolha ng’abasangania okwa kathunga k’abasyakulhu. N’omwa myaka mingyi eyihwere, Abanya Beteli bangyi babirithumwa omw’ithulira. N’abandi babiribya ini b’erileka omubiiri w’omughulhu wosi ow’embaghane busana n’amaghalha, esyongwamirwa sy’amaka, kutse esindi nzumwa.

16. Balikyethu babiriyikehya bathi hakabya esyombinduka?

¹⁶ Mukyakalira balikyethu aba erighenda-ghendania n’esyombinduka ng’esi. Ahathe erithika-thika babya ibabirianza kutsibu esyonzunzo syabu esyo babya ibabirikolha habw’emyaka mingyi. Abandi mubabya ng’abali omwa “bulighe bw’eriholerwa” bakabana esyombinduka esi. Aliwe, endambi muyahika bamakighumira. Busana naki? Ekya bawathikaya kutsibu, ly’erianza Yehova. Mubaminya ngoku bayihereyo oku Nyamuhanga​—butsira omubiiri, ekitsumbi, kutse olhukwamirwa. (Kol. 3:23) Batsemire erilholha embere erikolera Yehova omwa mibere yosi-yosi ibanayikehirye. ‘Bakahira erihangya-hangya lyabu lyosi oku Nyamuhanga’ ibanasi ngoku akabatheghaya.​—1 Pet. 5:6, 7.

17. Busana naki thukatsema eribya Ekinywe kya Nyamuhanga ikikathuhiramo omuhwa w’eriyikehya?

¹⁷ Thutsemire eribya Ekinywe kya Nyamuhanga ikikathuhiramo omuhwa w’eriyikehya. Thwam’igha eriyikehya, thukaghasirawa n’abandi ibaghasirwa. Thukathoka erighumira ebitsibu omwa ngebe. Ekikulhu kutsibu, thukayithunda hakuhi na Thatha wethu w’elhubulha. Thukatsema thukaminya ngoku nomwakine indi ni “w’Endatha n’Oyuyisumbire,” athwanzire kandi akalhangira abaghombe biwe abakayikehaya mwa b’omughaso!​—Isa. 57:15.