Akasanduko ak’Ebibulyo

◼ Thutholere ithwambalha thuthi omughulhu thukayarambura amanyumba awakakolerawa mw’emibiiri ya Yehova?

Omwa kihugho kyosi, Ebisenge by’Obwami, Ebisenge eby’Emihindano Minene-minene, Esyobeteli, ni manyumba awabirihebwayo erikolerwa mw’emibiiri ya Yehova. Ahimbire ndeke, akatsotsawa n’erisuwa, busana n’eki atholere iniahebwa ekitsumbi. Hali embaghane nene okwa wathukabera erilhangira omwa kihugho kya Sitani. Abakayarambura emyanya eyikakolerawa mw’emibiiri ya Yehova nabu batholere ibalhangirika ng’abandu ba Yehova, abakakolha erisonda liwe.

Ithwe ng’Abakristayo ‘thukayikanganaya ng’abaghombe ba Nyamuhanga’ omwa nzira syosi, imwamuli emyambalire n’emiyipambire yethu mibuya. (2 Kor. 6:3, 4) Kandi thutholere ithwabya n’esyongeso mbuya. Mughulhu wosi emyambalire n’emiyipambire yethu yitholere iyakangania esyongeso n’ekitsumbi ekitholere abaghombe ba Nyamuhanga Yehova. Kwilhabirirya kino kikayithaghisibawa omughulhu thukabungira ekyaghanda kikulhu ekiri e New York haghuma n’emithahulha eyiri omwa kihugho kyosi.

Ekitabu Organized to Do Jehovah’s Will kikabya kikakania okwa mughaso ow’eriambalha n’eriyipamba ndeke, kikakanaya okwa kiyithawa eky’eriyitsotsa kinyamubiri, esyongimba esitholere, n’eriyipamba ndeke omughulhu thukathulhughanaya n’erighenda okwa mihindano ey’Ekikrisitayo. N’okwa lhupapura 138, akatsweka 3, hakabugha hathi: “Wibuke, erina Beteli likamanyisaya ‘Enyumba ya Nyamuhanga.’ Busana n’ekyo, esyongimba, eriyipamba, n’emibere yethu yitholere iyasosana n’eya thukayithaghisibawako thukahindana okwa mihindano omwa Kisenge ky’Obwami.” Abathuliri ab’Obwami abikere hakuhi ne Beteli n’abakalhua hali batholere ibakangania emibere eyi bakabungira okwa Beteli. Omwa nzira eyi, abagheni bakakanganaya erisima n’erisikya eritholere.​—Esy. 29:2.

Esyongimba syethu sitholere isyathuminyikalya ng’abandu ‘abakayahulha mw’abakakenge Nyamuhanga.’ (1 Tim. 2:10) Eriambalha n’eriyipamba ndeke likaleka abandu ibakenga eriramya lya Yehova ery’ekwenene. Aliriryo, kyabirilhangirika ngoku baghalha bethu n’abali bethu balebe bakabya bakabungira ahakakolererawa emibiiri ya Yehova, bakambalha esyongimba esithatholere. Abakristayo sibatholere bakambalha esyongimba ng’esi okwa ndambi yosi-yosi. Erikwamana n’omwatsi oyu, ngoku kine n’omwa yindi mibere ey’engebe yethu ey’Ekikrisitayo, thwanzire erighendera okwa misingi eyikaghabulha abandu ba Nyamuhanga b’okw’abandu b’ekihugho, erikolha emyatsi yosi busana n’eriha Nyamuhanga y’olhukengerwa.​—Abar. 12:2; 1 Kor. 10:31.

Kwesi omughulhu wukabungira ekyaghanda kikulhu n’omuthahulha owali e New York State kutse eyindi mithahulha, mbulha wulya thegheka eribunga kutse wuli omwa kihumuru erirambura ebitsweka muthina-muthina, yibulhaye: ‘Emyambalire n’emiyipambire yaghe yina tholere, yana makangania obuyitsotse, n’ekitsumbi ky’ahanga bungira? Yine muha Nyamuhanga oyo nga ramaya y’ekitsumbi? Emyambalire yaghe yine mwendi thwikalya kutse erikukubalya abandi?’ Erilhabira omwa myambalire n’emiyipambire yethu, mughulhu wosi ‘thuwanaye erikangirirya lya Nyamuhanga, Omulhamya wethu omwa byosi thukakolha’!​—Tito 2:10.