Erikangania Ngoku Thukasima Olhusunzo Lhwa Nyamuhanga Olhulengethukireyo
1. Kutsibu-tsibu ni kyahi ekikaleka ithwa sima Yehova?
1 Omwa ‘syonzunzo mbuya’ nyingyi esya Yehova, embanulho eya Mughalha wiwe omwanzwa aha lhw’olhusunzo olhulengethukireyo. (Yak. 1:17) Lhukaleka ithwabana emighisa mingyi, imwamuli erighanyirwa amalholha wethu. (Efe. 1:7) Eki kikathutsemesaya mughulhu wosi. Kwilhabirirya, omwa buthuku bw’Eryibuka, thukaghaniraya okwa lhusunzo olhw’obughuli olhu.
2. Thwanga yiwathikya thuthi haghuma n’ab’omw’eka yethu nuku thwongere erisima embanulho?
2 Bawathikaye Bang’ongera Erisima: Erithoka eriwathikya ab’omw’eka yawu nuku bongere eribya n’erisima, busana naki imuthakolesya obuthuku bwenyu obw’erigholho-gholho obw’Eriramya ery’Eka erilhaba omwa myatsi eyihambire okwa mbanulho amayenga make enyuma, Eryibuka erikendi syabya Makyi 30 lithe lyahika? Kandi ng’eka musome buli kiro obusomi bwe Biblia obw’embaghane obuhambire okw’Ibuka. Lengekanaya ngoku embanulho yabirikughasira kandi ngoku yabirihamba okw’amalengekania awawuwithe oku Yehova, abandi, n’obuthuku obukasa. Kandi kikendi kughasira wamayibegheresya eriimba esyonyimbo ibiri nyihya-nyihya esikendi syakolesibwa okw’Ibuka, namba 8 ne 109.—Esy. 77:12.
3. Thwanga kangania thuthi ngoku thukasima?
3 Erikangania Ngoku Thukasima: Erisima embanulho likaleka ithwa bwira abandi b’oku Yehova n’olhwanzo lhwiwe lhunene olhw’erituma Mughalha wiwe. (Esy. 145:2-7) Omwa Makyi, Aprili, na Meyi, awandi maka akakanganaya erisima lyawu omw’ihira h’endegheka erilhangira bathi hakiri omundu mughuma omw’eka akakolha obutemburi bw’obuwathikya. Eki kyamabya isikyanga thokekana, mbwino wangana ‘yighulira endambi eyitholere’ nuku wanga kanyirirya omubiiri wawu ow’erithulira? (Efe. 5:16, NW) Kandi erisima likendi leka ithwanza eriwathikya abandi erisyahindana nethu okw’Ibuka. (Erib. 22:17) Tsuka erihandika amena aw’abandu abawukasubira, abigha be Biblia, abahughu, abakoli balikyenyu, n’abaliranwa nuku wubakokaye, n’enyuma waho wanasangira ndeke omw’ithererera ery’embaghane ery’erikokya abandu okw’Ibuka.
4. Thwanga kolesya thuthi ndeke obuthuku bw’Eryibuka?
4 Obuthuku obw’Eryibuka bukathuha akaghisa kahya-kahya ak’erikangania Yehova ngoku thukasima kutsibu olhusunzo olhwa aha abandu. Ka thukolesaye obuthuku buno eryongera erisima lyethu n’erikangania busana n’embanulho n’obutheke obwosi ‘obulengire obwa Kristo.’—Efe. 3:8.