Amalima Erire, Amahika Erigheswa
1. Ni mubiiri wahi mukulhu owane mukwalhwa lino?
1 Abere abirithulira omukali Omusamaria, Yesu mwabwira abigha biwe athi: ‘Musumbe ameso wenyu, musamalire amalima erire, amahika erigheswa.’ (Yn. 4:35, 36) Erighesa ery’obunyakirimu lyabya iryabiritsuka, kandi Yesu mwalhangira ngoku omubiiri oyu akendi kolhwa omwa kihugho kyosi. Yesu ane musondolha omubiiri w’erighesa iniane omwa kitsumbi kiwe eky’elhubulha. (Mt. 28:19, 20) Ni byahi ebikakanganaya ngoku omubiiri oyu akongera erikolhwa kutsibu obuthuku obw’erihwererera lyawu bune museghera hakuhi?
2. Ni byahi ebikakanganaya ngoku omubiiri ow’erighesa ow’ekihugho kyosi ane mwongera erikolhwa?
2 Erighesa ery’Ekihugho Kyosi: Omw’omwaka w’omubiiri owa 2009, okwa buli bathuliri 100 mukwayongere abathuliri 3.2 omwa kihugho kyosi. Ebihugho ebiri mw’erikakirya omubiiri w’erithulira, mubikana bana eryongera ery’abathuliri 14 okwa buli 100. Omughanzo ow’abak’igha e Biblia obuli kwezi mwalhabire okwa 7,619,000. Omughanzo oyu alhabire okw’ow’abathuliri abosi kandi wamalinganisya gho n’ow’abigha ab’omwaka owahwere, abigha hakuhi mithwalho athano babayongerako. Busana n’omubiiri eriyongera omwa bitsweka bingyi, abamisani abe Gileadi bakongera erisabwa. N’ebitsweka ebiri mw’abakabugha eyindi mibughe bine mukolha ndeke omwa bihugho bingyi. Kilhangirikire ngoku Yehova ane mwanguhya omubiiri omwa buthuku buno obw’erighunzerera erihulhulha. (Isa. 60:22) Wuna withe amalengekania awuwene okwa bulhambu bwawu?
3. Abandi bangana ghunzerera bathiki erikwamana n’erighesa eriri omwa bulhambu bwabu?
3 Erihulhulha Omwa Bulhambu Bwawu: Abandi bangana bugha bathi “Abandu abali omwa bulhambu bwethu sibali hulikirira.” Ni kwenene awandi malhambu angana lhangirika nga muli abandu abathahulikirira kwilhaba awandi kutse iniabya nga simukiri abandu abakahulikirira nga kera. Neryo abandi Bema bangana ghunzerera bathi simukiri abandu abanga hulikirira kandi bathi lino omubiiri owamasighalira w’ow’erihumba-humba emisighalira mike. Mbwino kwa bine bithya?
4. Ni malengekania wahi awuwene awathutholere ithwa kulha-kulhania owahambire okw’ithulira, kandi busana naki?
4 Omubiiri w’erighesa akakolhawa kutsibu erilhua okwa nzuko erihika okwa muhindo. Thalhangira ebinywe bya Yesu ebi ngoku bikakanganaya erikolha omwa byalhuba: ‘eby’erighesa ni bingyi nikwa abanga ghesa ni bake. Neryo musabe omukama w’erighesa ya kutsibu athume abahingyi b’omw’ighesa liwe.’ (Mt. 9:37, 38) Yehova, Omukama w’erighesa, yuwasi obuthuku bw’erihulhulha n’ahanga banika eby’erihulhulha. (Yn. 6:44; 1 Kor. 3:6-8) Ni lhukwamirwa ki olhwa thuwithe? E Biblia yikasubiraya yithi: ‘Omwa ngyakya-ngyakya wuhere embutho yawu, n’omw’igholho-gholho siwikale buyira.’ (Omu. 11:4-6) Erighesa likabya likayahwererera si bulibya buthuku obw’erilhuhuka!
5. Busana naki thutholere ithwa lholha embere erithulhughania n’omuhwa omwa bulhambu obukabya nga simukiri abandu abanga hulikirira?
5 Lholha Embere Erighesa: Nomuthwangabya ithwabirithulira omwa bulhambu bwethu mirundi mingyi n’eribya nga si mukiri abandu abakahulikirira, hane enzumwa mbuya eyanga leka ithwakolha n’omuhwa n’omwa byalhuba. (2 Tim. 4:2) Ebitsibu ebikabuthuka omwa kihugho bikaleka abandu ibahindulha amalengekania wabu neryo ikyaleka ibalengekania kutsibu okwa buthuku obw’embere. Eminyethu yikabya yikakulha, yangana yowa iyikanza obwiranda n’erithekana omw’amalengekania. Eriyitsingirira lyethu lyangana leka abandi ibahulikirira. Erithwalira haghuma, abaghana erihulikirira erimbere bangana hulikirira omwa buthuku bw’embere. Nibya n’abakakighenderera erighana omwatsi wethu batholere ibakungwa.—Eze. 2:4, 5; 3:19.
6. Kyamabya ikikalire erithulira omwa bulhambu bwethu, ni kyahi ekyanga thuwathikya eribya ithune n’omuhwa?
6 Kyamabya ikikalire erithulira omwa bulhambu bwethu, ni kyahi ekyanga thuwathikya eribya ithune n’omuhwa? Eryongera okw’ithulira nyumba okwa nyumba thwangana kolesya esindi nzira esy’erithulira ng’erithulira omwa myanya ey’esuburu kutse erikolesya esimu. Kutse thwangana tsuka erikania n’abandu omwa nzira muthina-muthima. Thwangana hindulha endegheka yethu neryo ithwa sangira omw’ithulira omw’igholho-gholho kutse okwa bundi buthuku omughulhu abandu banga banika omw’amaka wabu. Obundi thwangan’igha omubughe muhya-muhya nuku thwanga thoka erithulira abandu bangyi b’engulhu yuwene. Thwangana kanyirirya omubiiri wethu omw’ibya batemburi ab’omughulhu wosi. Kutse thwangana humira eyiri abathuliri bake. Thwamabya ithunawithe amalengekania awuwene awahambire okw’ithulira, ithukendi lengaho erisangira kutsibu omwa mubiiri mukulhu oyu.
7. Thutholere ithwakolha omubiiri w’erighesa erihika mughulhu wahi?
7 Abalimi bakabya n’obuthuku buke obw’erihulhulha ebirimwa byabu, busana n’ekyo sibali lhuhuka kutse erikolha lhyolho-lhyolho bathe baghunza omubiiri. Erighesa ery’obunyakirimu nalyo likayithagha erikolhwa omwa byalhuba. Thutholere ithwakolha omubiiri oyu erihika mughulhu wahi? Omwa buthuku ‘obw’erihwererera ly’emighulhu’ obwosi n’erihika okwa ‘nduli.’ (Mt. 24:14; 28:20) Nga Yesu, Omuthuliri mukulhu wa Yehova, thwanzire erighunza omubiiri owa thwabirihebwa. (Yn. 4:34; 17:4) Kwesi thulhole embere erikolha omubiiri wethu n’omuhwa, obutseme, n’eribya n’amalengekania awuwene erihika okwa nduli. (Mt. 24:13) Erighesa siriri lyahwa!
[Eblabbu okwa lhupapura 2]
Omubiiri w’erighesa akakolhawa kutsibu erilhua okwa nzuko erihika okwa muhindo