Abaghombe ab’Omuhwa Batholere Ibaghanirya Kutsibu
1. Ni kyahi ekya wathikaya Yesu erithendi lighira ekindu kyosi-kyosi erimulhusya okwa mubiiri wiwe mukulhu?
1 Yesu asangawa iniabirighunza erigholho eryosi iniane mulhamya abandu n’erihigha esyombinga. Abigha biwe babere bakamubana ekiro ekyakwamako, mubabugha bathi: ‘Abandu abosi bakakusonda-sonda,’ erianza alhole embere erikolha ebithiko-thiko. Aliriryo, Yesu syanga lighire ekindu kyosi-kyosi kikamulhusya okwa mubiiri wiwe mukulhu ow’erithulha engulhu yuwene. Mwasubirya athi: ‘Thughende ehandi okwa yindi miyi, eyiri hakuhi, inathoka erikangiriryayo nibya, kusangwa ekyo kyo nasira.’ Ni kyahi ekya wathikaya Yesu erikwama-kwamania ekighendererwa kiwe? Mwahangana omwa ngyakya-ngyakya erisaba n’erighanirya. (Mk. 1:32-39) Erighanirya kutsibu nethu lyanga thuwathikya lithi eribya bathuliri b’omuhwa?
2. Ni byahi ebya thwanga ghaniryako ebyanga thuwathikya eribya ithune n’omuhwa omw’ithulira?
2 Erighanirya Okuki? Yesu mwalhangira abandu ‘ibakaghalhawa n’erilhuha ng’esyombuli esithawithe mulisya.’ (Mt. 9:36) Kuthya, thwangana ghanirya okwa mibere eya bandu balimu neryo ithwa lhangira ngoku bakayithagha kutsibu engulhu yuwene. Thwangana lengekania okwa buthuku obwa thulimu. (1 Kor. 7:29) Thwangana ghanirya okwa mibiiri ya Yehova n’emibere yiwe, olhusunzo olhwa thuwithe olhw’eribya Bema ba Yehova, n’ebindu eby’obunyakirimu ebya thwabir’igha omwa Kinywe kya Nyamuhanga ebya abandu abali omwa bulhambu bwethu bathasi.—Esy. 77:11-13; Isa. 43:10-12; Mt. 13:52.
3. Thwanga ghanirya mughulhu wahi?
3 Wanga Ghanirya Mughulhu Wahi? Ngoku Yesu akolha, abandi bakabuka omwa ngyakya isiyiri yabya etoko. Abandi bakabana ikyuwene erighanirya bathe bayakesya. (Enz. 24:63) Nomuthwangabya ithuwithe bingyi eby’erikolha, thwangana bana obuthuku obw’erighanirya. Abandi bakakolha eki ibane omwa lhughendo. Abandi bakabana obuthuku bw’erighanirya omw’ithungyi bakalhuhuka. Abangyi bakabana erighanirya bathe baghenda omw’ithulira, nomubanga likolha ahabw’obuthuku buke, eryabiri bawathikya erithulira n’omuhwa kandi buthubaha.
4. Busana naki thutholere ithwa ghanirya?
4 Erighanirya kutsibu likendi leka ithwongera eryanza erikolera Yehova, eryongera erihira eby’obunyakirimu by’embere, n’erighumya erithwamu lyethu ery’erilholha embere erithulira. Yesu, Omughombe Mukulhu wa Nyamuhanga, mwaghasirwa omw’ighanirya, nethu thukendi ghasirwa.