Esyogazeti Syethu Sikolirwe Eritsemesya Abandu b’Emisindo Yosi
1. Akathunga k’omughombe oyuthaleghulha n’ow’amenge kabirigherererya kathi omukwenda Paulo?
1 Ngoku omukwenda Paulo athulira engulhu yuwene omwa nzira muthina-muthina nuku ahike ‘okw’abandu b’emisindo yosi,’ akathunga k’omughombe oyuthaleghulha n’ow’amenge kakakolesaya esyogazeti syethu erihika okw’abandu ab’emibere n’esyonyikirirya muthina-muthina. (1 Kor. 9:22, 23) Erithoka erikolesya ndeke e Watchtower na Awake! ni kibuya eriminya nga ni bandu bahi abakaleka esyogazeti esi isyahandikwa.
2. Awake! yikakolhawa eritsemesya bahi?
2 Awake!: Egazeti eno yikahandikawa busana n’abandu abali ng’ab’omukwenda Paulo akakanaya nabu akabugha athi ‘abalhume be Atene.’ (Emib. 17:22) Abalhume abo sibabya Bakristayo, kandi babya isibasi Amasako. Kuthya, abandu abakaleka e Awake! iyahandikwa basi bike kutse sibasi mwatsi wosi-wosi omwa Biblia. Banganabya isibawithe ekyosi-kyosi ekyabasi okwa syongangirirya sy’Ekikrisitayo, isibali yisigha edini, kutse banganabya isibasi ngoku e Biblia yiwithe omughaso. Ekighendererwa kikulhu ekya Awake! ly’erikakasya abakasomayo ngoku hane Nyamuhanga ow’ekwenene. Kandi ekilhubirirwa ky’egazeti eno ly’eriwathikya abandu eriyikethera e Biblia n’eriwathikya abakasomayo eriyitheghererya ngoku Abema ba Yehova ni b’embaghane okw’awandi madini.
3. E Watchtower ey’abandu abosi n’ey’erighira omwa kithunga yikahandikawa busana na bahi?
3 E Watchtower: Egazeti ey’abandu abosi yikahandikawa busana n’abandu abakasikaya Nyamuhanga n’Amasako okwa lhulengo lhulebe. Banganabya ibanasi omwatsi mulebe omwa Biblia aliriryo isibali yitheghereraya ndeke ebya yikakangiriraya. Bali ng’abandu aba Paulo akanayako athi ‘bakakenga Nyamuhanga.’ (Emib. 13:14-16) E Watchtower ey’erigha yikahandikawa kutsibu-kutsibu busana n’Abema ba Yehova. Paulo mwalengekania athi ababya bakasoma esyobaruha siwe babya ibanasi Amasako kandi ibanasi ndeke eriramya ly’ekwenene. (1 Kor. 1:1, 2) Kuthya emyatsi eyiri omwa gazeti eya thukighira omwa kithunga yikahandikawa busana n’abo abakahindana okwa mihindano yethu kandi banasi ebinywe ebikakolesibawa n’Abema.
4. Busana naki thutholere ithwabya ithunasi obuli mwatsi owali omwa gazeti eyathukakolesaya omw’ithulira?
4 Nomwakine indi thukaghaba esyogazeti ibiri-biri, thukakanaya okwa nguma thukasighaba. Busana n’ekyo, lhangira wuthi wukaminya emyatsi eyiri omwa buli gazeti. Neryo iwukendi thoka erikolesya omwatsi owakatsemesaya abandu abawukabana.