Ngoku Wanga Ghasirwa Omwa Gurupu Yawu ey’Eriyathulira
1. Ni byahi ebyabya omw’Igha ly’Ekitabu ery’Ekithunga ebyathukinabana omwa syogurupu syethu esy’eriyathulira?
1 Wukanakandira bindu birebe ebyabya omw’Igha ly’Ekitabu ery’Ekithunga? Abandu ibakabya bake kandi ihakabya n’emibere eyithekene. Eki ikikaleka ikyolhoba eribana abanywani abanga thuwathikya bunyakirimu. (Emi. 18:24) Omulebererya iniakaminya ndeke emibere eyathulimu neryo iniathuhimba. (Emi. 27:23; 1 Pet. 5:2, 3) Esyogurupu syethu esy’eriyathulira nasyo sine mw’ebindu ebi.
2. Thwangatsuka thuthi erikulhakulhania obunywani obwanga thuwathikya bunyakirimu omwa gurupu yethu ey’eriyathulira?
2 Iwe Tsuka: Erithwalira haghuma, esyogurupu esy’eriyathulira mukabya abandu abingene n’ababya bakabya omw’Igha ly’Ekitabu ery’Ekithunga. Erikolha haghuma n’abandi omw’ithulira mukalhwiririra obunywani obukamathire. (Fil. 1:27) Wamatha yir’ikolha na bangahi omwa gurupu yenyu ey’eriyathulira? Mbwino omw’eki, thwangana kangania abandi ‘ebiri omwa mithima yethu’ kutse eriyihira kubo? (2 Kor. 6:13) Eryongera okw’ekyo, ihanganayira ithwakokya omundu w’omwa gurupu yethu okw’Iramya lyethu ly’Eka ery’erigholho kutse okw’irya. Omwa bithunga birebe, obuli gurupu ey’eriyathulira yikayira ekiro eky’erikokya oyukendi syalhabya omukania oyukalhua omwa kindi kithunga. Okwa kiro ekyo, bakasanga-sanganira haghuma busana n’erirya n’erihimbana n’omukyangabya indi oyulyalhabaya omukania syendibya nabu.
3. Thuwithe kaghisa kahi ak’eriwathikibwa omwa syogurupu syethu esy’eriyathulira?
3 Nomwakine indi lino ekithunga kikahindana haghuma mirundi ibiri misa omwa yenga, sikirimanyisaya kithi abasyakulhu eriwathikya abathuliri nalyo litholere iryakeha. Abalebererya b’esyogurupu bakahirawa omwa buli gurupu erihira omwa buli mundu mw’omuhwa n’eribegheresya abandi omw’ithulira. Omulebererya w’egurupu yenyu amabya isyali atha kolha nawu omw’ithulira, busana naki iwuthamusaba erisyakolha nayu? N’ekindi, omulebererya w’omubiiri akakolha n’obuli gurupu ewikendi nguma obuli kwezi. Omwa bithunga ebiri mw’esyogurupu nyike esy’eriyathulira, angana hira h’emitheghekere ey’eribungira obuli gurupu mirundi ibiri omwa mwaka. Omughulhu akakolha n’egurupu yenyu, wukana yithegheka erighenda omw’ithulira?
4. (a) Emihindano y’eriyathulira yanga theghekwa yithi? (b) Busana naki thutholere ithwalengekania okw’ihayo enyumba yethu?
4 Ni kibuya obuli gururpu erihindanira ahawayo okwa wikendi eriyathulira. Eribya n’emyanya muthina-muthina ey’erihindaniramu okwa ndambi hakuhi ngumerera, kyangana leka ikyolhobera abathuliri erihika lhuba ah’erihindanira n’eyabakayathulira. Abathuliri bangana ghabwa lhuba neryo ikubanaghenda bathya omwa bulhambu. Kandi kik’olhobera omulebererya eritheya ndeke abali omwa gurupu yiwe. Aliriryo, emibere eyiriho yanganaleka esyogurupu ibiri isyahindanira haghuma. Ekithunga kyosi kyamabya ikikahindanira haghuma okwa muhindano w’eriyathulira okwa kyamukagha eky’erimbere omwa kwezi kutse enyuma w’erigha lye Watchtower, ni kibuya obuli gurupu erikalha haghuma n’omulebererya w’egurupu erihebwa esyo dakika nyike erighaba abali omwa gurupu yiwe omusabe w’erihinda athe ahebwa.—Soma ebiri omwa kasanduko “Wanganahayo Enyumba Yawu?”
5. Nomwakine indi endegheka ey’Erigha ly’Ekitabu ery’Ekithunga yabirihwa, ni kyahi ekyathutholere ithwabya ithunayikethere?
5 Nomwakine indi endegheka ey’Erigha ly’Ekitabu ery’Ekithunga yabirihwa, Yehova akinalholha embere erithuha ebyathukayithagha erikolha erisonda liwe. (Ebr. 13:20, 21) Omwa butheya bwa Yehova sithuli bulha kindu. (Esy. 23:1) Ni mighisa mingyi eyathukabana erilhabira omwa gurupu yethu ey’eriyathulira. Thwamathwalha olhukwamirwa olhw’erimbere neryo ‘thukabiba bingyi,’ ithukendi ‘syahulhulha bingyi.’—2 Kor. 9:6.
[Akasanduko okwa lhupapura 6]
Wanganahayo Enyumba Yawu?
Omwa bindi bithunga, esyogurupu sikahindanira haghuma kundi sihali owundi mwanya ow’erihindaniramu. Emihindano ey’eriyathulira nayo ni ndegheka y’ekithunga, busana n’ekyo ni lhusunzo lhunene emihindano ng’eyi eribya ewawu. Wangana ligha olhusunzo olhu? Siwusaghe wuthi omwawu simuwene. Abasyakulhu b’ekithunga bakendi lebya eka yawu nga yiri omwa kitsweka kyahi n’ebindi bindu ebiri ng’ebya babya bakalengekaniako bakasombolha emyanya eyikendibya mw’erigha ly’ekitabu. Wamabya iwunanzire erihayo enyumba yawu, manyisaya omulebererya owe gurupu yenyu.