Thugherereraye Abaminyereri—Yona
1. Yona abya na mibere mibuya yahi?
1 Ni kyahi ekikasa omwa malengekania wuk’ibuka omuminyereri Yona? Abandi bangana lhangira ng’abya muba kutse ow’omuthima akalire. Aliriryo, mwakangania eriyikehya, obuthubaha, n’omuthima ow’eriyihayo. Thwanga gherererya thuthi emibere mibuya ya Yona?—Yak. 5:10.
2. Thwanga gherererya thuthi eriyikehya lya Yona?
2 Eriyikehya: Erimbere, Yona mwasagha eriya eya bamuthuma, neryo amathibitha ehandi. Eki sikiriswekaya kundi abanya Suria babya basibwe ng’abithi, ky’ekyaleka e Ninawe iyahulhwa mwa ‘muyi w’omusasi.’ (Nah. 3:1-3) Nomwabine, Yehova mwasuyira Yona, neryo omw’iyikehya amaligha akathasyathumwa. (Emi. 24:32; Yona 3:1-3) Nomwakine indi mwasagha erimbere, erighunzerera mwakolha erisonda lya Nyamuhanga. (Mt. 21:28-31) Mbwino nethu thunayitheghekire erithulhughania engulhu yuwene, nomuthwanga suyirwa kutse thwamabya ithuwithe obulhambu obukalire obw’erithuliramu?
3. Ni byahi ebikayithaghisaya obuthubaha n’eriyihayo omwa mubiiri wethu ow’erithulira?
3 Obuthubaha n’Eriyihayo: Yona abere abiriminya ngoku erithwamu nabi liwe lyabirihira esyongebe sy’ababya omwa bwathu omwa kabi, mwaligha erihayo engebe yiwe. (Yona 1:3, 4, 12) Enyuma waho, abere akaberererya omubiiri ow’ahebawa erikolha e Ninawe, mw’ingira omwa kathi k’omuyi, obundi akanza eribana omwanya owuwene ow’erithulhughanirya mw’eritswera lya Yehova. Eby’akolha ebi, isibyanga kolhwa omuminyereri wa Nyamuhanga omuba, aliriryo omuthubaha! (Yona 3:3, 4) Kandi ibbwa ithwe munabwire? Thukayithagha obuthubaha erilhua oku Nyamuhanga erithoka erithulira thukabana eriendereribwa. (Emib. 4:29, 31) Erithoka eribana endambi n’erikolesya ebya thuwitheko omw’ithulira, thukayithagha eriyihayo.—Emib. 20:24.
4. Busana naki thutholere ithwaghanirya ndeke okwa mibere mibuya ey’abaminyereri ba Yehova?
4 Omughulhu wukasoma okwa buli muminyereri wa Yehova, iwukendi ghasirwa wamayihira omwa kisuku kiwe. Yibulhaye: ‘Nanga kolire indi kunabya iningye? Nanga gherererya indi emibere yiwe mibuya omwa ngebe yaghe?’ (Ebr. 6:11, 12) Omwa syombapura esy’Omubiiri Wethu ow’Obwami mukendibya imunemwasira ebindi ebya thwang’ighira okwa bandi baminyereri ba Yehova.