Akasanduko Ak’ebibulyo

◼ Omuthuliri oyuthe w’abatizibwa atholere iniabya iniamabirithahindana mughulhu mungahi okwa mihindano y’ekithunga n’erisangira omw’ithulira athe alighirwa eribatizibwa?

Eribatizibwa n’ithwamu likulhu ery’omundu akakolha. Busana n’ekyo, omundu athe alighirwa eribatizibwa, atholere iniabya iniamabiriyitheghererya ebya Nyamuhanga anzire iniakolha. Eryongera okw’ekyo, atholere iniabya inianemukangania ngoku anemughendera okwa ebya Nyamuhanga anzire.

Abakrisitayo bakahanawa erithendi leka erihindana haghuma, busana n’ekyo, omuthuliri oyuthe w’abatizibwa atholere iniabya inianemuhindana mughulhu wosi. (Ebr. 10:24, 25) Kandi atholere iniabya iniane musubirya omwa mihindano. Obundi anganabya iniabiringira omw’Ithendekero ery’Omubiiri w’Ekiteokrasi, nomwakine indi eki si ky’ekikaleka iniatholera eribatizibwa.

Eryongera okw’ekyo, kundi Abakrisitayo babirihebwa omubiiri w’erithulhughania n’eriyira abigha, omuthuliri oyuthe w’abatizibwa atholere iniabya iniane musangira mughulhu wosi omwa mubiiri w’erithulira athe abatizibwa. (Mt. 24:14; 28:19, 20) Mbwino atholere iniabya iniamathaghunza mezi mangahi inianemuthulira athe abatizibwa? Erithwalira haghuma, atholere iniahebwa obuthuku obukaghunza erikangania ngoku akendi lholha embere erisangira mughulhu wosi n’omuhwa omwa mubiiri w’erithulira obuli kwezi. (Esy. 78:37) Aliriryo, si hatholere hakalhaba buthuku buuli erilhua ahakabera muthuliri erihika okw’itholera eribatizibwa, obundi ihangana lhaba mezi make buyira. Mbwino atholere iniabya akaripotinga esyosaha singahi? Sihali kikomo. Abasyakulhu batholere ibalebya emibere ey’obuli muthuliri n’erikolesya amenge.​—Lk. 21:1-4.

Abasyakulhu (kutse abaghombe abawathikya abali omwa bithunga ebiri mwa abasyakulhu bake) abakalhaba omwa misingyi ey’abakanza eribatizibwa batholere ibakiminya ngoku abandu ni bambaghane, kandi batholere ibakolesya amenge erithwamu ng’anatholere eribatizibwa. Batholere ibalhangira ngoku anzire kutsibu eribya mughuma w’okw’Abema ba Yehova n’erikangania ngoku akasima olhusunzo olhw’eribya omwa kithunga kya Yehova n’erisangira omwa mubiiri w’erithulira. Abasyakulhu batholere ibakiminya ngoku syali akulha ndeke bunyakirimu kutse eriminya ndeke ng’abandi bathuliri ababatizibirwe. Abasyakulhu bamayowa bathi oyukayabatizibawa syatholere, omwa bolho batholere ibamubwira esyonzumwa esiseghemere okwa Masako esyamaleka ibathwamu indi syatholere eribatizibwa n’erimuha obuwathikya obw’obunyakirimu.