ENGEBE YETHU NG’ABAKRISITAYO

Sombolha Ndeke eby’Eriyitsemesya Byawu

Busana naki thutholere ithwasombolha ndeke eby’eriyitsemesya? Kundi thukabya thukasombolha efilimu ey’erilebya, omuziki ow’erihulikirira, omuthahulha we Intaneti ow’erighendako, ekitabu eky’erisoma, kutse omusathu w’evidiyo ow’erisatha, thukabya ithukasombolha eby’erisulya omwa malengekania wethu. Ebyathukasombolha bikahamba okwa mibere yethu. Eky’obulighe, eby’eriyitsemesya bingyi ebiriho munabwire, muli ebindu ebya Yehova aponire. (Esy 11:5; Gal 5:19-21) Neryo busana n’enzumwa eyi, e Biblia yikathubwira yithi thubye thukaghanirya okwa myatsi eyikaha Yehova y’olhukengerwa.—Fil 4:8.

MULEBAYE EVIDIYO NI BY’ERIYITSEMESYA BYAHI EBYANGA THOLERE INGASOMBOLHA? NERYO MWANASUBIRYA OKWA BIBULYO BINO:

Emisathu ey’Abanya Roma abakera eyiri mw’eby’amalhwa yisosene yithi n’eby’eriyitsemesya ebindi ebya munabwire?
Abandi balikyethu omwa kithunga bangawathikya bathi abalere erisombolha ndeke eby’eriyitsemesya?
Abanya Roma 12:9 hatholere ihahamba hathi okw’ithwamu lyethu ery’erisombolha eby’eriyitsemesya?
Ni by’erileberyako byahi eby’eby’eriyitsemesya ebitholere ebiri ewenyu?

NI BY’ERIYITSEMESYA EBYA NAWU WANGANA YIRA EKYAWUKAKOLHA KUTSE EBY’ERIKWAMA KYALEBYA BUYIRA?

Eby’eriyitsemesya bingyi ebikanyirire munabwire bikakangiriraya omundu erilebya kutse erisoma okwa bandi bandu abakakolha ebindu omwakanya k’iyo eriyira ekyakakolha. Esyofilimu, ebitabu, n’esyondegheka sy’esyotivi mukabya amalengekania w’abandi bandu, butsira awawu. Nomwakine indi omundu angana sangira omwa by’eriyitsemesya eby’erikwama kyalebya buyira, abangyi babirilhangira ini kikulhu erisangira omwa by’eriyitsemesya ebya wangana yira eky’erikolhamo. Ng’eky’erileberyako, abandi bakatsema eriwatha ekyuma eky’omuziki kutse erithera ehisasani. Abandi bakatsemera emisathu, ng’omupira kutse eriziha kutse erihotholha amahothole aw’ewabu. Mbulha thwamasombolha eby’eriyitsemesya ebiri bithi, thukole “ebyosi busana n’eriha olhukengerwa oku Nyamuhanga.”—1Kor 10:31.