1 | Omusabe “Muhire erihangya-hangya lyenyu lyosi oku Nyamuhanga”

E BIBLIA YITHI: “Muhire erihangya-hangya lyenyu lyosi oku Nyamuhanga, kusangwa akabatheghaya.” —1 PETERO 5:7.

Ekya Kikamanyisaya

Yehova Nyamuhanga akathusaba athi thumubwire amalighe wosi awakathulyambaya omwa bulengekania n’okwa muthima. (Esyonyimbo 55:22) Sihali ekitsibu ekinene kutsibu kutse ekike kutsibu ekithe kyangahirwa omwa musabe. Kyamabya ikikathulyambaya, obo ikikalyambaya na Yehova. Erimusaba ni kiika kikulhu eky’eribaniramo erithekana.—Abanya Filipi 4:6, 7.

Ngoku Eki Kyanga Wathikya

Omughulhu thuwithe ekitsibu ky’obwongo erighana, ithwangana yowa nga thuli ithw’ibene. Mughulhu wosi abandi sibali yitheghereraya ndeke ebya thukalhabamo. (Emisyo 14:10) Aliwe thwamabwira Nyamuhanga y’eriyowa lyethu omwa musabe ahathe eribisirira, ithukendi bana omuhulikiriri oyukathukwira obulighe kandi oyukathuyitheghereraya. Yehova anathulhangire, anasi obulhumi n’emilyambo yethu, kandi anzire ithwamubwira ekyosi-kyosi ekikathulyambaya.—2 Emyatsi y’Emigulu 6:29, 30.

Erikania na Yehova omwa musabe kikaghumaya eriyikethera lyethu ngoku athutsomene. Thwangana yowa ng’omuhandiki w’esyonyimbo oyuwasaba athi: “Wukalhangira obulighe bwaghe, kandi wasi omunubo w’omuthima waghe.” (Esyonyimbo 31:7) Eriminya ngoku Yehova anasi ebya thukalhabamo kyangana leka ithwalholha embere erighumira emighulhu eyikalire. Aliwe syalisubulira okw’ikwama kyalhangira ebitsibu byethu. Kwilhaba owundi mundu wosi-wosi akayitheghereraya ebya thukalhabamo, kandi akathuwathikaya eribana omwa Biblia mw’ebikathuhumulikanaya n’erithuhimba.

Ngoku e Biblia Yinemuwathikya Julian

Ngoku Amaghaniryo Akanyihambako

“Ngwithe amaghaniryo n’obulhwere bw’erilhabirirania omw’ibya muyonzo (OCD). Amaghaniryo akanyasira isingayitsulirye. Hakanayira ingabya ndeke, n’eyindi ndambi ingabya omwa maghaniryo awakalire isihali n’enzumwa eyilhangirikire. Kutsibu-tsibu kikabya omughulhu ngali n’abandi. Amalengekania agho banyiwitheko akanyihambako kutsibu.

“Abasi ebya ngalhabamo bakanyiwathikaya kutsibu. Erithabugha okwenene hakanayira ibabugha ebyo ngathanzire eriowa. Aliwe ngasima akaghalha ako bakahiraho.

“Okwa bundi buthuku, amaghaniryo waghe ne OCD bikanaleka ikyanyikalira erisaba. Kikayithagha akaghalha kanene erihira amalengekania w’okwa kindu n’erikania na Yehova omwa musabe. Amalengekania waghe syalibya okwa kindu kighuma neryo kikaleka ingalengekania kutsibu. Obwongo bwaghe bwamayisiba, ngalemawa eribwira Yehova y’amalengekania n’eriyowa lyaghe.”

Ngoku e Biblia Yikanyiwathikaya

“Omw’iyeghesya lyaghe lye Biblia, nabiriminya ngoku emisabe siyiriyithagha eribya miri-miri kutse eribya iwasi eribugha Nyamuhanga imwalighayo. Okwa bundi buthuku omughulhu kinyikalire eribugha eriyowa lyaghe, ngakwama kyasaba nyithi: ‘Kisi Yehova, nyiwathikaye.’ Nibya n’omwa mibere ng’eyo ngaminya ngoku Yehova akanyiyitheghereraya kandi akamba ekya ngayithagha okwa ndambi eyo. Eryongera okw’isaba, ngabya inganemulya omubatsi. Ngasima kutsibu obuwathikya obwosi, amaghalha waghe anemughenda ak’uwana. Ahathe erithika-thika akaghalha ako ngahiraho erikania na Thatha waghe w’elhubulha kakaghanduka kandi nabiriyilhangirira obuwathikya bwiwe bw’olhwanzo.”