OMWATSI W’ERIGHA 26
OLHWIMBO 123 Erighondera Emitheghekere y’Ekiteokrasi
Ligha Ebyo Wuthasi Iwunayikehirye
“Obuthoki bwa Nyamuhanga ni bunene, sithwangathoka erimusegherako.”—YOBU 37:23.
EKIGHENDERERWA
Erighumira ebitsibu omw’iligha ebyo thuthasi ithunayikehirye, erihwerya amalengekania okwa ebyo thwasi, n’eriyikethera Yehova.
1. Yehova mwathuha amaaka wahi, kandi busana naki?
YEHOVA mwathuhangika ithuwithe amaaka w’erilengekania, erigha ebindu bihyaka, eriyitheghererya, n’erikangania amenge. Ni kyahi ekyaleka iniathuhangika athya? Anzire ithwabana “eriminya lya Nyamuhanga” kandi ithwamukolera omwa maaka wethu w’erilengekania.—Emi. 2:1-5; Abar. 12:1.
2. (a) Ni lemererwa lyahi eryo thuwithe? (Yobu 37:23, 24) (Lebaya n’ekisasani.) (b) Thukaghasirawa thuthi thwamaligha erilemererwa lyethu ithunayikehirye?
2 Nomwakine indi thuwithe amaaka w’erigha, sithwanga minya ebyosi. (Soma Yobu 37:23, 24.) Thalengekania okwa ky’erileberyako kya Yobu. Mwabulibwa ebibulyo ebikwamangene ebyabisulha ku hane ebyo athasi. Ekyo mukyaleka iniayikehya kandi kyamamuwathikya erihengulha amalengekania wiwe. (Yobu 42:3-6) Nethu kuthya thukaghasirawa thwamaligha ithunayikehirye ngoku sithwasi obuli kindu. Eriyikehya ng’eryo likaleka ithwayikethera ngoku Yehova akendi thubisulira ebyonyine-nyine ebyo thutholere ithwaminya nuku thuthwemu ndeke.—Emi. 2:6.
Ngoku kyanabya oku Yobu, thwangana ghasirwa thwamaligha ebyo thuthasi (Lebaya enungu 2)
3. Thukendi kania okuki omo mwatsi ono?
3 Omo mwatsi ono, thukendi kania okwa bindu birebe ebyo thuthasi n’okwa bitsibu ebya thwangabana busana n’erithendi biminya. Kandi thukendi lebya ekikaleka ikyabya ini kibuya eribya isithwasi ebindu birebe. Erikania okwa syonzumwa esi kikendi ghumya eriyikethera lyethu ngoku Yehova, oyuhikene omwa menge, akathubwira ebyo ebyonyine-nyine ebyo thutholere ithwaminya.—Yobu 37:16.
SITHWASI ENDULI NGA YIKENDI SYAHIKA MUGHULHU WAHI
4. Ngoku kiri omu Matayo 24:36, ni kyahi ekyo thuthasi?
4 Soma Matayo 24:36. Sithwasi enduli y’omulembe ono nga yikendi syahika mughulhu wahi. Nibya n’omughulhu Yesu abya okwa kihugho, syabya asi “ekiro ekyo n’esaha.”a Enyuma waho mwabwira abakwenda ngoku Yehova, oyukatheghaya ndeke obuthuku, akalhangira athi emyatsi yikabererera okwa buthuku “omwa buthoki bwiwe,” kutse ehamuli yiwe. (Emib. 1:6, 7) Yehova abirihiraho endambi eyo omulembe ono akendi syahweraho, aliwe sithwanga minya ndeke-ndeke omughulhu ogho ekyo kikendi syaberamu.
5. Eky’eribya isithwasi enduli nga yikendi syahika mughulhu wahi kyanga thuhambako kithi?
5 Erikwamana n’ebyo Yesu abugha, sithwasi nga thukendi linda mughulhu mungahi erihika aho enduli yikendi syasira. Busana n’ekyo, ithwangana lemwa erighumisirizya kutse ithwahwa amani, kutsibu-tsibu thwamabya ithwamabirighunza buthuku bulebe ithunemulinda ekiro kya Yehova. Kutse ikyangana thukalira eriyiyinirya erisiningulirwa erikalhua okwa bahughu bethu kutse okw’abandi. (2 Pet. 3:3, 4) Ithwangana lengekania thuthi kuthwabya ithunasi ekiro ekyonyine-nyine ekyo enduli yikendi syasiramu, ithwangan’ongere erighumisirizya kandi ikyathw’olhobera erighumira erisiningulirwa.
6. Busana naki ni kibuya eribya isithwasi enduli nga yikendi syasa mughulhu wahi?
6 Omo kwenene, erithendi thubisulira ekiro ekya enduli yikendi syasiramo, Yehova akathuha akaghisa k’erikangania ku thukamukolera kundi thumwanzire kandi ku thumuyikethere. Thwanzire ithwakolera Yehova kera na kera, butsira erihika aho enduli yikendi syahikira lisa. Omwakanya k’erihwerya amalengekania okwa ky’eribya ‘ekiro kya Yehova’ nga kikendi syasa mughulhu wahi, thutholere ithwahweryagho okwa ebyo ekiro ekyo kikendi syaberererya. Thwamakolha ekyo ithukendyongera eriyithunda hakuhi na Nyamuhanga kandi ithwakolha ekyosi-kyosi ekyo thwanga thoka erithoka erimutsemesya.—2 Pet. 3:11, 12.
7. Ni kyahi ekyo thwasi?
7 Kyuwene erihwerya amalengekania w’okwa ebyo thwasi—thunasi ngoku ebiro by’enyuma-nyuma byatsuka 1914. Yehova abirithuha amaminyereri we Biblia awathesubulira okw’ikania okwa mwaka oyo aliwe kandi akasoborera buuli ebyabiribya ibinemubya eritsuka okwa mwaka oyo. Busana n’ekyo, thukakasirye ngoku “ekiro kinene ky’Omwami Mukulhu kiri hakuhi.” (Zef. 1:14) Kandi thunasi omubiiri ogho Yehova anzire ithwakolha, nagho ow’eribwira abangyi ngoku thwanga thoka okwa “ngulhu yuwene y’Obwami.” (Mt. 24:14) Omwatsi oyu anemuthulhughanibwa omwa bihugho nga 240 n’omwa mibughe eyilhabire omwa 1,000. Sithuli yithagha eriminya “ekiro n’esaha” erithoka erisangira n’omuhwa omwa mubiiri mukulhu oyu.
IHANGANAYIRA ITHWABYA ISITHWASI EKYO YEHOVA AKENDI KOLHA
8. “Omubiiri wa Nyamuhanga” w’okwenene w’owahi? (Omugambuli 11:5)
8 Mughulhu wosi thukabya isithwasi “omubiiri wa Nyamuhanga” w’okwenene. (Soma Omugambuli 11:5.) Ebinywe ebyo bikamanyisaya ebyo Yehova akaleka ibyabya kutse ebyo akalighira bibye nuku aberereraye erisonda liwe. Omo kwenene sithuliminya ekikaleka Yehova inialighira ekindu kirebe eribya kutse ng’akendi kolhaki erithuwathikya. (Esy. 37:5) Kikalire eriyitheghererya ekyo ngoku kinathukalire eriyitheghererya erikulha ly’omwana omo nda y’omukali omukule, ekindu ekyo abanya sayansi bathe bathayitheghererya ndeke-ndeke erihika na lino.
9. Kundi hanganayira ithwabya isithwasi ekyo Yehova akendi kolha, ni bitsibu byahi ebyo thwanga bana?
9 Ithwe erithendi minya ekyo Yehova akendi kolha busana nethu, kyangana leka ithwabya kange-kange. Ithwangana sagha eriyithalya okwa bindi nuku thukanyiriraye omubiiri wethu w’erithulira, ng’ery’olhobya engebe yethu, kutse erighenda eyiri obuyithawa bunene bw’abathuliri bw’Obwami. Kutse ithwangana bulha Yehova ng’anathusimire thwamathendi hika okwa bilhubirirwa byethu by’ekiteokrasi, thwamathendi lhangira ebibuya ebikalhwiririra omw’ikolha kutsibu omubiiri wethu w’erithulira, kutse thwamabana ebikathulemesaya omwa mibiiri y’ekiteokrasi.
10. Ni mibere yahi mikulhu eya thukakulha-kulhanaya busana n’eribya isithwasi ekyo Yehova akendi kolha?
10 Omo kwenene, ithwe eribya isithwasi ekyo Yehova akendi kolha erithuwathikya kikaleka ithwakulha-kulhania emibere mikulhu ng’eriyikehya. Thukakiminya ngoku amalengekania wa Yehova n’esyonzira siwe bilengire ebyethu. (Isa. 55:8, 9) Kandi thuk’igha eriyikether’ighuma Yehova, eriyikethera ngoku akendi thuthokesya. Thwamabana ebibuya ebikalhwiririra omw’ithulira kutse omwa mibiiri y’ekiteokrasi, thukapipa Yehova. (Esy. 127:1; 1 Kor. 3:7) Emyatsi yamaghana eribya ngoku thulhue thulengekenie, thutholere ithw’ibuka ngoku Yehova akinasondolha. (Isa. 26:12) Thukakolha owethu kandi ithwalholha embere eriyikethera ngoku Yehova akendi kolha owiwe. Thukabya ithunayikethere ngoku akendi thuha obusondoli obwa thukayithagha, nomwakine indi syendi kikolha ngoku akolha kera omwa nzira y’ekithiko-thiko.—Emib. 16:6-10.
11. Ni kyahi ekyo thwasi ekyanga thuwathikya?
11 Thalengekania okwa ky’eribya ithunasi ngoku mughulhu wosi Yehova ni w’olhwanzo, ow’obulingirirania kandi ow’amenge. Thunasi ngoku akalhangira ebyo thukamukolera n’ebyo thukakolera balikyethu mwa by’obughuli bunene. Kandi thunasi ngoku mughulhu wosi, Yehova akahemba abathaleghulha okw’iyo.—Ebr. 11:6.
SITHWASI EBIKENDI SYABYA OMUNGYA
12. Ngoku kiri omu Yakobo 4:13, 14, ni kyahi ekyo thuthasi?
12 Soma Yakobo 4:13, 14. Okwenene kuli kuthi sithwasi engebe yethu nga yikendi syabya yithi omungya. Omwa mulembe ono, ebikawa kitsumbukirania bikahika okw’ithwe bosi. (Omu. 9:11) Busana n’ekyo, sithuli minya esyondegheka syethu nga sinemwendi thokekana kutse nga thunemwendibya ithukineho erilhangira thuthi thukasiberereraya.
13. Ebyo thuthasi eby’obuthuku obukasa byanga thuhambako bithi?
13 Ebyo thuthasi ebyangabya omwa ngebe byangana thukalira erighumira, ibyabya kitsibu. Bithi? Thwangana yilhalikirira busana n’ebyangabya, kandi ekyo kyangana thughunzako etseme yethu. Ebitsibu ebikawa kitsumbukirania n’ebikabya isithuyitsulirye, byangana thulethera obulighe n’erihangya-hangya. Kandi ebyo thulindirire byamaghana eribererera, ithwangana yiponera n’erihwa amani.—Emi. 13:12.
14. Etseme yethu ya kera na kera yiseghemere okuki? (Lebaya n’ebisasani.)
14 Thwamayiyinirya ebitsibu, thukathoka erikangania ngoku nomuhangabyaki, thukakolera Thatha wethu w’elhubulha busana n’olhwanzo, isi busana n’eriyitsomana. Emyatsi ye Biblia yikakanganaya ngoku sithutholere thukalengekania thuthi Yehova akendi thutheya okwa bitsibu ebyosi kandi ngoku syali sangwa athwamu ebikendi syathubyako. Anasi ngoku etseme yethu siyiseghemere okw’ibya isithwasi ebikendi syathubyako omwa buthuku obukasa. Omwakanya k’ekyo, yiseghemere okw’isondekania obusondoli bwiwe n’erimughondera. (Yer. 10:23) Omw’imusaba obuwathikya thukathwamu, thukabya ng’abamabugha bathi: “Omukama amabya anzire, thwasyabyaho ithwakolha eki kutse ekindi.”—Yak. 4:15.
Erisondekania obusondoli bwa Yehova n’erimughondera kikathuha obutheya obwa thwanga yikethera (Lebaya enungu 14-15)b
15. Ni kyahi ekyo thwasi okwa buthuku obukasa?
15 Nomwakine indi sitthwasi obuli kiro ng’akendibya kithi, thunasi ngoku Yehova abirithulhagha engebe y’erikotha—mbulha elhubulha kutse okwa kihugho. Thunasi ngoku syanga bugha amabehi kandi ngoku sihali ekyosi-kyosi ekyanga mukakirya okw’iberererya emilhaghe yiwe eyosi. (Tito 1:2) Iyo musa ‘yuwanga thulha eby’enduli iniane oko nzuko n’eritsuka oko mighulhu ya kera erithulha emyatsi eyithe yakolhwa.’ Ekyo mukyabya bikahika okwa myatsi ya kera, n’omwa buthuku obukasa kikendi syabya. (Isa. 46:10) Thukakasirye ngoku sihali ekyosi-kyosi ekyanga kakirya Yehova erithukangania olhwanzo. (Abar. 8:35-39) Akendi thuha amenge, iniathuhumulikania, n’erithuha amaaka agho thukayithagha eriyiyinirya ekyosi-kyosi ekyanga thuhikako. Thuyikethere ngoku Yehova akendi thuwathikya n’erithutsumulha.—Yer. 17:7, 8.
SITHWANGA YITHEGHERERYA NDEKE-NDEKE YEHOVA NG’ATHWASI BUNGAHI
16. Ngoku kiri omwa Esyonyimbo 139:1-6, ni kyahi ekyo Yehova asi ekya thuthe thwanga yitheghererya ndeke?
16 Soma Esyonyimbo 139:1-6. Omuhangiki wethu anasi nga thukolirwe thuthi kandi anasi ngoku thukwikire kinyamubiri, omw’iyowa, n’omwa bulengekania. Akathutsomana mughulhu wosi. Akabya inianasi ebyo thukabugha n’ekya thukanza erimanyisya, ebyo thukakolha n’ekikaleka ithwabikolha. Ngoku Omwami Dawudi anabugha, Yehova akathuthimbaya kw’obutheya bwiwe kandi syathuliko haali. Ka kikaswekaya Omukama Omuthabali w’Obuhangwa bwosi, Omuthoki w’Ebyosi oyuwahangika olhubulha n’ekihugho eribya iniakathutsomana athya! Dawudi mwabugha athi: “Amenge wawu ni w’eriswekera n’erinyirema; Likalire busana naghe eriminyagho.”—Esy. 139:6
17. Busana naki kyangana thukalira eriligha ngoku Yehova athwasi ndeke?
17 Obundi busana n’eyo thwakulira, ekalikya yethu, kutse ebyo thwabya thw’ikirirye kera, kyangana thukalira erilhangira Yehova nga Thatha w’olhwanzo oyuthutsomene. Kutse ithwangana yowa thuthi ebisobyo ebyo thwakolha kera ni bibi kutsibu indi Yehova syanganza n’ahake erithuminya kandi thuthi ali haali kutsibu okw’ithwe. Nibya na Dawudi mwanayowa athya. (Esy. 38:18, 21) Kutse obundi omundu oyunemulengaho erihindulha emibere yiwe n’erighendera okwa bihano bya Nyamuhanga ebithunganene angana yibulya athi, ‘Omo kwenene Nyamuhanga amabya iniakanyiyitheghereraya, busana naki inianyiyithaghako erisighania engebe eyo ngayowa nga y’eya buli kiro?’
18. Thukaghasirawa thuthi thwamaligha ngoku Yehova athwasi ndeke kwilhaba ku thuyasi? (Lebaya n’ebisasani.)
18 Thwangan’igha eriligha ngoku Yehova athwasi ndeke kwilhaba ku thuyasi kandi kw’akathulhangira mw’ebibuya ebyo thuthe thwangayilhangiramo. Nomwakine, akalhangira ebisobyo byethu n’eriyitheghererya eriyowa lyethu, kuthya n’ekikaleka ithwakolha ebindu birebe, athwanzire. (Abar. 7:15) Thwam’ongera erisima ngoku Yehova akalhangira ku thwangana thoka, ithukendyongera erisika thukamukolera buthaleghulha kandi ithunatsemire.
Yehova akathuwathikaya er’imanira ebya thuthasi ebyanga thuhikako omwa mulembe ono omw’ighumya eriyikethera lyethu omwa tseme ey’obuthuku obukasa eyo thulindirire omwa kihugho kihya-kihya (Lebaya enungu 18-19)c
19. Ni byahi ebyo thwasi ebihambire oku Yehova?
19 Thunasi ngoku Yehova ni lhwanzo. Sithwanga thika-thikira ekyo nahake. (1 Yn 4:8) Thunasi ngoku ebihano biwe ebithunganene bikakanganaya olhwanzo olho athuwithire, kandi ngoku mughulhu wosi athutsomene erilhua okwa muthima. Thunasi ngoku Yehova anzire ithwabana engebe y’erikotha. Mwahayo endongolya nuku ekyo kithokekane. Ekihembo ky’endongolya kikathukakasaya ngoku thwangana thoka nomuthukanasobaya. (Abar. 7:24, 25) Kandi thunasi ngoku “Nyamuhanga ni mukulhu, alengire emithima yethu, kandi asi emyatsi yosi.” (1 Yn. 3:19, 20) Yehova akalhangira ebyosi ebithuhambireko, kandi anayikethere ngoku thwangana thoka erikolha erisonda liwe.
20. Ni kyahi ekikendi thuwathikya eriyihighulha okwa maghaniryo awathatholere?
20 Yehova syali athathubisa omwatsi wosi-wosi ogho thunatholere eriminya. Thwamaligha ekyo ithunayikehirye, thukayihighulha okwa maghaniryo awathatholere aw’ebya thuthawitheko amaaka kandi ithwahwerya amalengekania w’okwa by’omughaso. Omw’ikolha ekyo, thukakanganaya ngoku thuyikethere ighuma Yehova, oyuhikene omwa menge. (Yobu 36:4) Nomwakine indi lino thunawithe aho thukasubulira bikahika okw’iyitheghererya myatsi mirebe, thunalindirire erigha ebihyaka ebihambire oku Nyamuhanga wethu kera na kera.—Omu. 3:11.
OLHWIMBO 104 Ekihembo kya Nyamuhanga eky’Omulimu Abuyirire
a Yesu akendi syasondolha olhuhi lhw’erilhwa n’ekihugho kibi kya Sitani, neryo ni ky’amenge erighunzerera thuthi lino anasi ekiro kye Harmagedoni n’omughulhu akendi “syakinda n’erisingura.”—Erib. 6:2, 19:11-16.
b ERISOBORERA EBISASANI: Thatha na mughalha wiwe banemutheghekania akakapa k’ebyalhuba-lhuba nuku efamile yibye iyinayitheghekere ekitsibu ekya ngawa kitsumbukirania.
c ERISOBORERA EKISASANI: Mughalha wethu oyuli omwa bitsibu anemuthera akasasani k’etseme eyo alindirire omwa kihugho kihya-kihya