Amasomo Agho Thwabir’Ighira Okwa Mukangirirya Wethu Mukulhu Omwa Ngebe Yethu Yosi

EKY’ERILEBERYAKO KY’ABABUTHI BAGHE

Okw’ihwererera ly’emyaka ya 1950, ababuthi baghe mubahuma e Italy bamasuba e Kindersley, omwa Saskatchewan, e Canada. Buthuku buke enyuma w’aho, mub’igha ekwenene, kandi muyabya kindu kikulhu omwa ngebe yethu. Ng’ibuka ingakine mwana, iningaghunza omw’ithulira mw’ekiro kyosi ingane haghuma n’efamile yethu, neryo hakanayira omwa masatha ingabugha indi, munakolha “obutemburi bw’obuwathikya” ingane w’emyaka munani!

Ababuthi baghe babya banakwa; aliwe, mubathuhiriraho eky’erileberyako ekyuwene eky’eriyithalya okwa bindi busana na Yehova. Ng’eky’erileberyako, omwa 1963 mubaghulya ebingyi by’okwa bindu byabu erithoka eribana esyosente esikendi thuwathikya erihindana okwa lhuhindano olhukabyako ebihugho bingyi e Pasadena, California, U.S.A. Omwa 1972, muthwaghenda esyokilomita nga 1,000 erihika e Trail, omwa British Columbia, e Canada, thukayawathikya omwa bulhambu obukabughawamo Olhuitale. Thatha waghe iniakayonza amanyumba n’erilhabiriragho. Iniakaghana erikulibwa okwa mubiiri nuku ahweraye amalengekania w’okwa mibiiri y’obunyakirimu.

Ngasima ababuthi baghe busana n’eky’erileberyako ekyuwene ekyo bahiriraho ingye n’abaana bethu basathu. Ekyo mukyabya musingyi owaghumire ow’erithendekwa lyaghe ly’ekiteokrasi, imwamuli erisomo eryo ngathendi sy’ibirirwa lino: Namatsuka erisondya Obwami, Yehova akendi nyitsomana.—Mt. 6:33.

ERITSUKA OMUBIIRI W’OMUGHULHU WOSI

Omwa 1980, munathahya ya Debbie, dada omubuya oyuwithe ebilhubirirwa ebilhangirikire eby’obunyakirimu. Muthwanza eryingira omwa mubiiri w’omughulhu wosi, neryo Debbie mwatsuka obutemburi mezi asathu thwalilhungire. Thwabere thwaghunza omwa butheke mw’omwaka mughuma, muthwahumira omwa kithunga kike ekyabya mw’obuyithawa, neryo munamuyiyungako omwa butemburi.

Endambi muyahika, thwamahwa amani n’erithwamu thuthi thukendi lhwayo. Aliwe, muthwatsuka erikania n’omulebererya w’omuthimbo. Omwa lhwanzo aliwe ahathe eribisirira mwathubwira athi: “Nenyu munemukalya emyatsi. Mukahweraya amalengekania wenyu okwa bitsibu ebyo muwithe. Aliwe mwamahwerya amalengekania w’okwa bibuya, imukendi bibana.” Lyabya ihabulha eryo thwabya thukayithagha. (Esy. 141:5) Muthwalighenderako aho naho kandi muthwalhwaho ithwalhangira ngoku hane ebibuya bingyi ebyo thunemubana. Abangyi omwa kithunga babya ibananzire ibakolera Yehova ya bingyi, imwamune abalere n’abaghuma b’okwa abali omwa butheke n’abath’ikirirye. Ekyo mukyathweghesya erisomo likulhu. Muthw’igha erisondekania ebibuya n’erilinda Yehova eryuwania emibere eyikabya nga yikalire. (Mika 7:7) Muthwathasyabya n’etseme, n’emyatsi muyuwana.

Abakangirirya b’esukuru yethu y’erimbere ey’abatemburi babya ibanaherezirye omwa bindi bihugho. Babere bakathukangania ebisasani n’erikania okwa bitsibu n’emighisa eyo babiribana, mubaleka eriyisunza lyethu ly’eribya bamisyonare iryayongera. Neryo muthwayihiriraho ekilhubirirwa ky’erisyabya bamisyonare.

Erithoka erihika okwa kilhubirirwa ekyo, omwa 1984 muthwaghenda e Quebec eyikabughawa e French, esyokilomita esilhabire omu 4,000 erilhua e British Columbia. Ekyo mukyamanyisya erigha ekalikya mbyaka n’omubughe. Ekindi kitsibu kiri kithi, isithulibya n’esyosente esikaghunza. Buthuku bughuma, muthwathoka eribana eky’erirya omw’ibotha-botha ebitsungu omw’irima ly’omundu mulebe. Debbie mw’igha eritsumba ebitsungu omwa nzira muthina-muthina! Nomuthwanabya thuwithe ebitsibu, muthwahwerya amalengekania w’okw’iyiyinia ithunatsemire. Kandi, muthwalhangira ngoku Yehova anemuthutsomana.—Esy. 64:10.

Kiro kighuma, muthwathererwa esimu isithuyitsulirye. Yabya iyikathukokaya eriyakolera okwa Beteli ye Canada. Thwabya ithwabirisulirirya efomu y’erighenda okwa sukuru ye Gileadi, neryo muthwabulha nga thunaye okwa Beteli kutse eyihi. Aliwe muthwaligha erikokya eryo. Thwabere thwahikayo, muthwabulya Ndugu Kenneth Little, ow’okwa Komiti y’Ekyaghanda ky’Omuthahulha thuthi: “Kandi ibbwa efomu yethu ye Gileadi?” Mwasubirya athi, “Thukendi syasoka ekilhalho ekyo thukakihikako.”

Wiki nguma enyuma waho, muthwahika okwa kilhalho ekyo kundi ingye na Debbie muthwakokibwa erisoma esukuru ye Gileadi. Neryo muthwabya b’erithwamu. Ndugu Little mwathubwira athi: “Nomuwanga sombolha kyahi, buthuku bughuma iwangana yisunza wuthi wangana sombwere mwa kindi. Enzira nguma siyilengire eyindi; Yehova angana tsumulha obuli nguma y’okwisyo.” Muthwaligha eriya okwa Gileadi, kandi ahabw’emyaka mingyi, thwabirilhangira okwenene kw’ebyo Ndugu Little abugha. Thwabiribya ithunemubwira abandi abawithe erithwamu nga balighe olhusunzo lhwahi b’ebinywe biwe.

ENGEBE YETHU NG’ABAMISYONARE

Muthwatsema thukabya baghuma b’okwa banya-sukuru 24 ababya omwa klasi 83 eye Gilead eyabya e Brooklyn, New York, omwa Kwakani 1987. Kutsibu-tsibu, Ndugu Ulysses Glass na Jack Redford bababya bakathukangirirya. Amezi athano mwalhuaho iniahwa, kandi muthwaghunza esukuru omwa Kwomwenda 6, 1987. Muthwathumwa e Haiti, haghuma na John na Marie Goode.

E Haiti yabya isiyiri yathathumwa abamisyonare erilhua 1962 omughulhu ababyayo erighunzerera bathibithawako. Wiki isathu thwalighunzire esukuru, muthwayisanga ithunemuherezya e Haiti omwa kithunga kike ekiri mw’abathuliri 35 ekiri haali omwa bithwe. Thwabya balere kandi isithwasi bingyi, kandi thwabya ithw’ibene omwa nyumba y’abamisyonare. Abandu babya banakwa kutsibu, kandi abangyi omw’ibo isibasi erisoma. Omwa biro by’erimbere-mbere ithune bamisyonare, muhabya akatabanguko, erihamba obuthabali kinya-makara, erihira omwa nzira mw’ebindu ebikaka kw’omuliro, erighunga ly’amaghetse kutse ebiyagha.

Muthw’ighira bingyi oku balikyethu abatsemire kandi abakaghumisirizaya abe Haiti. Abangyi babya omwa ngebe eyikalire, aliwe ibanzire Yehova n’omubiiri w’erithulira. Mwali wethu mughuma oyukulire omwa myaka isyasi erisoma; nomwabine, abya inianahambire amasako 150 w’omwa muthwe. Emibere eya buli kiro eyabya yikabya omwa kitsweka ekyo muyaleka ithw’ongera erianza erithulha omwatsi w’Obwami ng’ekindu kighuma kisa ekyanga ghunzaho ebitsibu by’abandu. Kikathutsemesaya erilhangira ngoku abaghuma b’okwa bigha bethu be Biblia ab’erimbere-mbere babiribya batemburi b’omughulhu wosi, batemburi b’embaghane, kandi basyakulhu.

Ithune e Haiti, muneya Trevor, omulhwana omumisyonare omu Mormon, kandi muthwathunga akaghisa k’erikania okwa Biblia ahabw’emirundi nga y’eyo. Myaka mirebe enyuma waho, mwanyithumira ebaruha isingayitsulirye. Mwahandikira athi: “Ngendi batizibwa okwa lhuhindano olhukakwamako! Nganzire ingasuba e Haiti eriherezyayo ng’omutemburi w’embaghane omwa mwanya mughumerera ogho nganabyamu ingane mumisyonare w’aba Mormon.” Ekyo kyanabya akolire ahabw’emyaka mingyi iniane na mukali wiwe.

E YUROPU—N’ENYUMA WAHO E AFRIKA

Muthwathumwa eriyakolera omwa kitsweka kye Yuropu eyo mubiiri w’Obwami abya iniali kulhusibwako olhukako. Omwa 1992 muthwahika e Ljubljana, Slovenia, hakuhi n’eyo ababuthi baghe bakulira bathe bahumira e Italy. Omwa bitsweka bye Yugoslavia eya kera mwabya imukine olhuhi. Ekyaghanda ky’omuthahulha owe Vienna, Austria, kuthya n’esyaofisi esyabya e Zagreb, Croatia, ne Belgrade, Serbia, byabya ibanemulebererya omubiiri omwa kitsweka ekyo. Neryo obuli kighuma ky’okwa bihugho ebi, kyabya kitholere erithunga emitheghekere yakyo ye Beteli.

Ekyo mukyamanyisya kithi thuli b’erikolesya owundi mubughe n’ekalikya. Abandu b’eyo ibakabugha bathi, “Jezik je težek,” erimanyisya ngoku “Omubughe akalire.” Kandi kwenene kukyanabya kithya! Muthwatsema busana n’obuthaleghulha bw’abalikyethu ababya ibanayitheghekire erighenda-ghendania n’esyombinduka sy’ekithunga kandi muthwalhangira Yehova akabatsumulha. Kandi muthwathasyalhangira ngoku mughulhu wosi Yehova akahengulha emyatsi omwa lhwanzo kandi okwa buthuku obutholere. Emyaka eyo thwaghunza e Slovenia muyathasyakamathya amasomo mangyi agho thwabya ithwabir’igha kandi yamathweghesya amahyaka.

Aliwe habya ihakine esindi mbinduka. Omwa 2000 muthwathumwa e Côte d’Ivoire, omwa Bulengera lyuba bwe Afrika. Neryo omwa Kwerikuminakughuma 2002, muthwahumibwa erisuba e Sierra Leone busana n’olhuhi. Olhuhi olhwabyayo olhwaghunza emyaka 11 lhwabya imulhwanamahwa. Kyabya kikalire erikwama kyalhua e Côte d’Ivoire isithuyitsulirye. Aliwe, amasomo agho thwabya ithwabir’igha mwathuwathikya eribya ithunatsemire.

Muthwahwerya amalengekania w’okwa bulhambu obwabya ibunemulhwiririra mw’ebibuya n’abalikyethu ab’olhwanzo ababya ibabirighumira olhuhi ahabw’emyaka. Sibabya bawithe bindu bingyi, aliwe ibanzire eriha abandi b’okwa ebyo bawithe. Mwali wethu mulebe mwaha Debbie y’okwa syongyimba siwe. Debbie abere akabya ng’oyukanza erighana, mwali wethu mwamuhathikana athi: “Omwa buthuku bw’olhuhi, balikyethu omwa bindi bihugho ibakathuwathikaya. Lino ni ndambi yethu ey’eriwathikya.” Muthwakolha mwa kilhubirirwa kyethu erigherererya eky’erileberyako kyabo.

Erighunzerera muthwasuba e Côte d’Ivoire, aliwe emibere eyikalire eyabyayo muyathasyatsandira ighuma. Neryo omwa Kwerikuminakughuma 2004, muthwahumibwa omwa ndege, obuli mughuma amathibitha n’akakapa ak’esyokilo 10. Muthwakesya ahisi omwa kambu y’abasirikali be France omwa kiro, n’ekiro ekyakwamako mubathuthwalha e Switzerland. Thwabere thwahika okwa muthahulha ng’omwa kathi-kathi k’ekiro, ab’okwa Komiti y’Ekyaghanda ky’Omuthahulha n’abakangirirya b’Esukuru y’Erithendeka Abasyakulhu n’Abaghombe Abawathikya haghuma n’abakali babu, mubathwangirira ndeke ibanatsemire omw’ithuwako, bamathuha ebyalya ebihuhire, n’esyakyokuleti sye Switzerland. Ekyo mukyathuhambako kutsibu.

Muthwathasyathumwa e Ghana ne Côte d’Ivoire ahabw’akathuku kake olhuhi ilhwabirihwamo. Olhukeri lhwa balikyethu mulhwathuwathikya erighumira erihuma-huma eri n’erikolha esyongwamirwa syethu esy’akathuku kake. Ingye na Debbie muthwalighirana thuthi nomwakine indi olhwanzo lhw’abalikyethu ni lhwa buli kiro omwa kithunga kya Yehova, sithwendi syalhuthwalha mwa kindu kyamasatha-satha. Omo kwenene, nomwakine indi obuthuku obo bwabya bukalire, mukyabya kitsweka kikulhu ky’okw’ithendekwa lyethu.

ERIYA OMWA MIDDLE EAST

Omwa 2006 ekyaghanda kikulhu mukyathuthumira ebaruha eyathubwira ngoku thwabirihebwa olhusunzo lhuhyaka olhw’eriya omwa Middle East. Kandi ekyo mukyamanyisya erigha ebindu bihyaka, eribana ebitsibu bihyaka, erigha emibughe mihyaka, n’eribya omwa syokalikya mbyaka. Habya bingyi by’erigha omwa mwanya oyu owabya mw’ebitsibu by’ekipolitiki n’eby’edini. Muthwatsemera emibughe mingyi eyabya omwa bithunga n’erilhangira obughuma obukalhwiririra omw’ighendera okwa busondoli bw’ekiteokrasi. Muthwatsemera balikyethu, kundi abangyi omw’ibo babya ibabiriyiyinirya buthubaha erihakanisibwa erilhua okwa bahughu babu, abo bakasoma nabo, abo bakakolha nabo, n’abataka babu.

Muthwahindana okwa lhuhindano olhw’embaghane olhwa 2012 e Tel Aviv e Israeli. Olhuhindano olhu lhwabya lhw’erimbere abandu ba Yehova omwa kitsweka eki erihindana banene bathya erilhua aho olhwabya okwa Pentekote 33 E.K. lhukathabera. Eki ka kyabya kindu ekithe kyang’ibiriranwa!

Omwa myaka eyo, muthwathumwa eribungira ekihugho eyo omubiiri wethu abya iniabirihiribwa kw’olhukako. Muthwathwalhayo ebighuma by’okwa bitabu byethu, thwamasangira omw’ithulira, n’erihindana okwa mihindano eminene-minene eyikabya kw’abandu bake. Abasirikali, n’emikangyi ibyoswire ehosi, aliwe muthwayowa ithune omwa butheya thukabya haghuma n’abathuliri bake ithunayitheghirye.

ERISUBA OMWA AFRIKA

Omwa 2013 muthwahebwa olhusunzo lhw’embaghene kutsibu—erikolera okwa muthahulha we Kinshasa, Congo, ekihugho kinene kandi ekyuwene aliwe ekyabiribya ikinemw’obunakwa bunene n’eribya mw’esyonyuhi mughulhu wosi. Okw’itsuka muthwabugha thuthi, “Thunasi e Afrika; thunayitheghekire.” Aliwe habya ihane bingyi eby’erigha, kutsibu-tsibu bikahika okw’ighenda omwa myanya eyiri mw’esyonguda esithuwene. Muthwabana y’ebibuya bingyi eby’erihwerya kw’amalengekania, imwamune eriyiyinia n’etseme y’abalikyethu nomwakine indi ni banakwa, olhwanzo olho bawithire omubiiri w’erithulira, n’akaghalha ako bakahiraho erighenda okwa mihindano emike-mike n’eminene-minene. Muthwayilhangirira ngoku omubiiri w’obwami anemulholha embere busana n’obuwathikya bwa Yehova n’eritsumulha liwe. Emyaka eyo thwaghunza omwa mubiiri w’omughulhu wosi e Congo muyaleka ithwatsema kutsibu kandi yamaleka ithwabya n’abanywani banene.

Okw’ihwererera lya 2017, muthwahebwa olhundi lhusunzo—e South Africa. Oyu w’omuthahulha munene ogho thwamathakolerako kandi nibya esyongwamirwa syethu sy’okwa Beteli syabya mbyaka okw’ithwe. Habya bingyi by’erigha, aliwe amasomo agho thw’igha kera mwathuwathikya. Thwanzire balikyethu bangyi abamabirighunza myaka mingyi ibanemuyiyinia buthaleghulha. Kandi ka kikatsemesaya erilhangira efamile ye Beteli yikakolera haghuma nomwakine indi ni b’esyorangyi muthina-muthina n’esyokalikya. Eritsumulha lya Yehova ery’obuholho lilhangirikire, abandu biwe banemwambalha omundu muhya-muhya n’erighendera okwa misingyi ye Biblia.

Ahabw’emyaka mingyi, ingye na Debbie thwabirihebwa esyongwamirwa esikatsemesaya, erigha esyokalikya mbyaka, n’erigha emibughe mihyaka. Sikiri kyathathwolhobera, aliwe thwabiribya ithune muyilhangirira olhwanzo lhwa Yehova olhuthaleghulha erilhabira omwa kithunga kiwe n’omwa lhughanda lhw’abalikyethu. (Esy. 144:2) Thuyikethere ngoku erithendekwa omwa mubiiri w’omughulhu wosi lyabirileka ithwabya baghombe ba Yehova babuya.

Ngalhangira enzira eyo ababuthi baghe banyikulirayamo mwa y’obughuli; kuthya n’erisighika lya mukali waghe mwanzwa, Debbie; n’eby’erileberyako ebyuwene ebiri omw’ihiika lyethu ly’obunyakirimu ery’ekihugho kyosi. Thunemuseghera hakuhi n’obuthuku obukasa, thwabirithwamu erilholha embere erigha amasomo agho Omukangirirya Mukulhu akathweghesaya.