‘ Mulengeho Kutsibu Eribya n’Obughuma bw’Omulimu’

“Obughuma,” obwa thuwithe, ni “bw’omulimu.” Eki kikamanyisaya kithi obughuma obo buliho busana n’akaghalha ka Nyamuhanga akakakolha. Nomwabine, ngoku Paulo anabugha, obughuma bwethu butholere ibwabya ibunemutheghibwa. Nindi oyutholere eributheya? Omo kwenene, obuli Mukristayo atholere iniayira eky’erikolha nuku ‘habye obughuma bw’omulimu.’

Ng’eky’erileberyako, thuthabugha thuthi omundu iniakuha emotoka mbyaka. Nindi oyuwithe olhukwamirwa olhw’eritsomanayo nuku yibye iyine ndeke? Eky’erisubirya kilhangirikire. Siwanga tsweba oyuwakuha ematoka eyo yamakwa ahabw’eribya isiwuthatsomanayo.

Kuthya, nomwabine indi obughuma bwethu bw’Ekikristayo ni kihembo erilhua oku Nyamuhanga, obuli mughuma w’okw’ithwe awithe olhukwamirwa olhw’erikitheya. Hamabya isihali obuholho ahakathi-kathi ka balikyethu, thutholere ithwayibulya kino, ‘Mbwino nganemuyira eky’erikolha erilhangira indi hakabya obughuma obw’omulimu omw’iwania emyatsi?’

“MULENGEHO KUTSIBU” ERITHEYA OBUGHUMA

Ngoku Paulo anabugha, okwa bundi buthuku thwangana yithagha erikolha kutsibu erithoka eritheya obughuma bw’omulimu. Kutsibu-tsibu, eki kyangana yithaghisibwa omughulhu mulikyethu abirithuponesya. Mbwino mughulhu wosi kikayithaghisibawa erihika okwa mundu oyo n’erikania okwa kitsibu erithoka eritheya obughuma? Eyihi. Yibulhaye, ‘Mbwino eribera erikania okwa mwatsi owalyaleka ihabya erithendi yitheghererania kinemwendilethaho obughuma kutse kikendi leka ihabya erikakalhukana?’ Okwa bundi buthuku ikyanganabya ky’amenge erigheghena omwatsi oyo kutse erighanyira.—Emi. 19:11; Mk. 11:25.

Ngoku omukwenda Paulo anahandika, thulhole embere “erighumirana omwa lhwanzo.” (Efe. 4:2) Ekitabu kighuma kikabugha kithi ebinywe ebi byangana soborerwa indi “eribaligha ngoku bali.” Eki kikamanyisaya kithi thutholere ithwaligha ngoku balikyethu sibahikene, nethu ngoku thuthahikene. Omo kwenene, thukalengaho “eryambalha omundu muhya-muhya.” (Efe. 4:​23, 24) Nomwabine, sihali n’omughuma w’okw’ithwe oyuwanga kolha ekyo omwa nzira eyihikene. (Abar. 3:23) Thwamaligha ekyo ikikendi thw’olhobera erighumirana, erighanyirana, neryo ‘ithwalengaho kutsibu eribya n’obughuma bw’omulimu.’

Thwamaghunzaho erithendi yitheghererania—nibya n’omuthwangakikolha omwa muthima wethu—ithukendi lholha embere eriyilhangirira ‘obuholho obukamathanaya haghuma.’ Ekinywe ky’Ekigiriki ekikahindulhawamu “obuholho obukamathanaya” ekiri omwa Abanya Efeso 4:​3, omwa Abanya Kolosai 2:19 ni “emisisa.” Emisisa ni mikandu eyikahambanaya erikuha okwa lindi. Omwa nzira iyaneyo, obuholho, kuthya n’olhwanzo olhwa thuwithire balikyethu, bikathuwathikaya erisighalha ithune bughuma nabo nomuthwangabya n’erithendi yitheghererangania.

Neryo omwikirirya mulikyenyu amakuhithania, kutse erikuponesya, lengaho erikangania omundu oyo y’olhukeri omwakanya k’erimutsweba. (Kol. 3:12) Kundi abandu abosi sibahikene, nawu wanganabya imuwanaponesya omundu mulebe. Eryibuka ekyo ikikendi leka iwayira eky’erikolha nuku ‘wulengeho kutsibu eribya n’obughuma bw’omulimu.’