Abakekelhuhire—Muli b’Omughaso Omwa Kithunga

Obundi nawu siwanga thasyakolha bingyi busana n’erikekelhuha. Nomwakine indi wabirikolera Yehova buthaleghulha ahabw’emyaka mingyi, iwangana yithungako amalengekania awathatholere busana n’erilemererwa eryo wuwithe lino. Ng’eky’erileberyako, iwangana linganisya ebyo wunemukolha lino n’ebyo wabya wukakolha kera. Kyamabya ikwakiri kithya, wanga kolhaki erithoka eriyilhusyamu amalengekania ng’ayo?

EKYA YEHOVA ANZIRE IWAKOLHA

Yibulhaye, ‘Ni kyahi ekya Yehova anzire ingakolha?’ Ebinywe ebiri omwa Eryibuka Ebihano 6:5 byangana kuhumulikania, ahakabugha hathi: ‘Kandi wasyanza Omwami Mukulhu Nyamuhanga wawu n’omuthima wawu wosi, n’ekirimu kyawu kyosi, kandi n’akaghalha kawu kosi.’

Ngoku kiri omwa mulhondo oyo, Yehova anzire iwamukolera n’omuthima wawu wosi, n’ekirimu kyawu kyosi, kandi n’akaghalha kawu kosi. Ekyo kyangana kuwathikya eriyihighulha okw’iyilinganisya n’abandi—kutse erilinganisya ebyo wanga thoka erikolha lino n’ebyo wabya wukathoka erikolha kera.

Thalengekania oku kino: Iwukine mulere, ni kyahi ekyo wabya wukaha Yehova? Abangyi b’okwa bandu ba Yehova ibangana bugha bathi babya bakalengaho erimuha ekyuwene kutsibu. Okw’iwe, ekyo kyabya ikyuwene kutsibu erikwamana n’emibere eyo wabyamu okwa buthuku obo. Ni kyahi ekyo wanga thoka eriha Yehova lino? Ekyo wanga thoka erimuha lino ky’ekyuwene kutsibu erikwama n’emibere eyo wulimu lino, ekyo wangana thoka erikolha. Wamathunga amalengekania ng’ayo, iwukendi ghunzerera wuthi wunemuha Yehova ekingene-ngene n’ekyo wanabya wukamuha kera. Okwa buthuku obo, wabya wukamuha ekyuwene kutsibu, kandi na lino wunemumuha ekyuwene kutsibu.

EBYA WASI BYANGANA GHASIRA ABANDI BA KUTSIBU

Ekindi ekihambire okwa mwatsi oyu kya kino: Omwakanya k’erilhangira emyaka yawu ng’ekindu ekyanga kulemesya, lengaho erilhangirayo ng’akaghisa k’eriwathikya abandi. Omo kwenene, ng’Omukristayo oyukekelhuhire, hane ebindu birebe ebyo wangana kolha lino ebyo wabya isiwanga kolha iwukine mulere. Ng’eky’erileberyako, iwangana kolha bino:

Bwira abandi okwa ebya walhabiremu. Thalengekania okwa binywe bino ebiri omwa Biblia:

Omwami Dawudi: “Indi mukulhu lino, singakiri mulere, nikwa sindinathalhangira Omukama akasighania omundu oyuthunganene, kandi sindinathalhangira abaana biwe bakasaba-saba akalyo.”—Esy. 37:25.

Yosua: “Na lino lebaya, munabwire ngaghenda omwa mibere y’ekihugho kyosi; nenyu munasi omwa mithima yenyu yosi n’omwa birimu byenyu byosi, ngoku hathe ekinywe n’ekighuma ekikehire okwa binywe byosi byuwene ebyo Mwami Mukulhu Nyamuhanga wenyu abugha busana nenyu; ebyosi byabiribererera busana nenyu, sihali kindu n’ekighuma ekyabulha.”—Yos. 23:14.

Obundi nawu wanabughire ebinywe ng’ebyo. Dawudi na Yosua mubabugha erikwamana n’ebyo balhabamu. Kundi abaghombe ba Yehova abathaleghulha aba mubabugha ebyo babya ibabirilhangira n’eriowa ahabw’emyaka mingyi, ebinywe byabu byangana thuhambako kutsibu.

Wamabya iwamabirikolera Yehova ahabw’emyaka mingyi, nawu iwangana kania okwa mughaso w’erimukolera erikwamana n’ebyo walhabiremu. Mbwino wunawithe ebyo wuk’ibuka ebikatsemesaya ebihambire okwa mughulhu walhangira ngoku Yehova akatsumulha abandu biwe? Isiwasaghirira eribwira abandi b’okw’ekyo! Ekyo ikyangana humulikania abandi, ngoku kyanakuhumulikanaya. Kuthya, iwangana himba abandi bamowa okwa ebyo walhabiremu wukakolera Yehova.—Abar. 1:​11, 12.

Eyindi nzira eyo wanga himbiramu abandi ly’erilengaho ngoku wanga thoka eribya okwa mihindano busu okwa busu. Wamakolha ekyo, iwukendi yighasira kuthya n’erighasira balikyenyu. Connie, oyukanibweko ahanyuma akabugha athi: “Erihindana okwa mihindano kikaleka ingathahwa amani. Olhwanzo lhungaha n’olhwa ngakanganibawa okwa Kisenge ky’Obwami, busana naki ingahwa amani? Ngalengaho erikangania ku ngasima abandi omw’ibaha ehisembo hike-hike. Kandi ngalhangira indi ngalholha embere erisangira omwa mibiiri y’obunyakirimu, ingane haghuma n’abalikyethu.”

YEHOVA AKAKUTSEMERA BUSANA N’ERIMUKOLERA BUTHALEGHULHA

Omwa Masako muswire eby’erileberyako by’abandu ababya bawithe erilemererwa busana n’emibere eya babyamu aliwe Yehova iniabanzire. Thalengekania oku Simeoni, Omuisraeli oyuwabya iniabirikekelhuha Yesu akabuthwa. Simeoni iniakabya akaya okwa hekalhu, obundi iniakalhangira abalhwana ibanemukolerayu emibiiri y’omughaso. Kandi ibbwa bikahika oku Simeoni iyuwene-wene? Okwa malengekania w’abandu, Simeoni angalengekenie athi syakiri w’obughuli embere sya Yehova busana n’erikekelhuha. Aliwe Yehova aby’awithe amalengekania w’embaghane. Mwalhangira Simeoni ini “muthunganene kandi iniayihereyo” neryo amamutsumulha omw’imuha olhusunzo lhw’erilholha oku Yesu iniakine lhumekeke. Nibya Yehova mwakolesya Simeoni eriha obuminyereri obuhambire okwa oyukendi syabya Masiya oyu! (Lk. 2:​25-35) Kilhangirikire ngoku Yehova mwathahira amalengekania wiwe okw’ikekelhuha ly’omubiri wa Simeoni aliwe mwalhangira ini mulhume w’erikirirya linene, ‘kandi oyuli kw’omulimu abuyirire.’

Nawu kuthya wangana kakasya ngoku Yehova akakulhangira mwa w’obughuli busana n’erimukolera buthaleghulha nomuwangabya iwuwithe erilemererwa eriri lithi. Embere siwe, ekyo thukahayo “kutsibu-tsibu ekikalighawa, ky’ekikahebawayo erikwamana n’ebya omundu awithe, butsira ebyo athawithe.”—2 Kor. 8:12.

Wun’ibukire ekyo, hweraya amalengekania w’okwa ebyo wangathoka erikolha. Ng’eky’erileberyako, ni miringo yahi ey’erithulira eyo wanga sangiramu—nibya ahabw’akathuku kake? Mbwino wangana thoka eriwathikya abandi omw’ibatherera esimu kutse eribahandikira akabaruha? Ehindu hike-hike ehikakanganaya olhwanzo hyangana hamba ndeke okwa baramya balikyenyu, kutsibu-tsibu hy’amakolhwa n’omughombe wa Yehova oyuwabirimukolera ahabw’omughulhu muuli.

Abandi bawithe erilemererwa ly’ekinyamubiri. Lebaya eky’erileberyako eky’omwa East Africa ekiri omwa kasanduko akali ahikwa akawithe omuthwe “Mukyalhamya Engebe Yiwe.”

Wibuke ngoku iwe eribya mundu w’erikirirya kandi omuthaleghulha kyangana himba abandi. Muli ky’erileberyako ekilhangirikire eky’eriyiyinia, kandi mwangana kakasya ngoku “Nyamuhanga si mundu oyuthathunganene oyuwang’ibirirwa emibiiri yenyu n’olhwanzo olho mwakanganaya erina liwe omw’iherezya n’erilholha embere eriherezya ababuyirire.”—Ebr. 6:10.

LENGAHO ERILHOLHA EMBERE ERIBYA N’OMUHWA

Erisekulya likakanganaya ngoku abangyi abakekelhuhire abakasangira omw’iwathikya abandi, bawithe amaghalha awuwene, bakalengekanaya ndeke, kandi bakaghunza myaka mingyi.

Aliwe, erikolera abandi b’ebibuya sikyendi ghunzaho ebyosi ebikalhwiririra omw’ikekelhuha. Obwami bwa Nyamuhanga bwa bukendi syathoka erikolha ekyo omw’ighunzaho ekikaleka ithwakekelhuha n’eriholha—obuthahikana bwethu.—Abar. 5:12.

Nomwabine, ebya wukakolera Yehova—imwamune eriwathikya abandi erimuminya—bikaleka amaha wawu iniabya inianaghumire kandi ibyangana leka amaghalha wawu in’uwana. Abakekelhuhire, kisi muminye ngoku Yehova akasima ebyo mukakolha omwa mubiiri wiwe, kandi ngoku ekithunga kikalhangira eky’erileberyako kyenyu ky’erikirirya mwa ky’obughuli.