Lholha Embere Erikangania Olhwanzo​—Lhukahimba

1. Ni mwatsi wahi mukulhu owa Yesu akanayako n’abigha biwe erigholho athali aholha?

ERIGHOLHO ly’erighunzerera n’abigha biwe athali aholha, Yesu mwahulha olhwanzo mirundi nga 30. Mwabwira abigha biwe athi batholere ‘ibanzana.’ (Yoane 15:12, 17) Olhwanzo lhwabu lhwangabere lhwa mbaghane kutsibu indi abandi banga lhulhangire n’eriminya ku ni bigha ba Kristo ab’okwenene. (Yoane 13:34, 35) Olhwanzo olho Yesu akanayako s’iyowa buyira; ni mubere w’amaaka n’ow’eriyihayo. Yesu mwabugha athi: “Sihali mundu oyuwithe olhwanzo olhulengire olhu, athi omundu akasigha engebe yiwe busana n’abira biwe. Nenyu muli bira baghe, mwamakolha ebyo ngabahana.”​—Yoane 15:13, 14.

2. (a) Abaghombe ba Nyamuhanga basibwe bathi munabwire? (b) Ni bibulyo byahi ebyo thukendi subirya omwa mwatsi ono?

² Munabwire abaghombe ba Yehova basibwe busana n’olhwanzo lhwabu olhw’okwenene, olhw’eriyihayo n’obughuma obughumire. (1 Yoane 3:10, 11) Okw’ithwe, ekihugho kutse ekihanda kyethu, omubughe wethu, eyo thulhuire, kutse emikulire yethu, ebyo si bikulhu. Omwa kihugho kyosi, abaghombe ba Yehova banzene kundu. Busana naki olhwanzo lhukayithaghisibawa kutsibu munabwire? Yehova na Yesu bakathuhimba bathi omo lhwanzo? Kandi thwanga kangania thuthi olhwanzo olhu erihimba n’erighumya abandi?​—1 Abanya Korinto 8:1.

EKIKALEKA OLHWANZO ILHWAYITHAGHISIBWA LINO

3. “Emighulhu eyikalire” eno yikahamba yithi okwa bandu?

³ Thuli omwa “mighulhu eyikalire,” n’engebe “yikaletha amaghaniryo n’obulighe.” (2 Timoteo 3:1-5; Esyonyimbo 90:10) Abandu bangyi banemwaghalhwa kutsibu ikyaleka ibayowa nga sibakitholere n’eribyaho. Obuli mwaka, abandu abalhabire omu 800,000 bakayitha, mundu mughuma omwa buli sekendi 40. Eky’obulighe, nibya n’abaghuma b’okwa balikyethu nabu babiriyowa bathya kandi babiriyitha.

4. Ni bahi omwa Biblia abayisunza olhuholho?

⁴ Kera, abandi baghombe ba Nyamuhanga abathaleghulha ibakanayowa nabi busana n’ebitsibu byabu ibayisunza olhuholho. Ng’eky’erileberyako, Yobu mwabya omwa bulhumi ng’obo n’eribugha athi: “Omuthima waghe akalhuha busana n’engebe yaghe.” (Yobu 10:1; 14:13) Yona mwayowa nabi erihika okw’ibugha athi: “Iwe Mwami Mukulhu . . . wundusayeko engebe yaghe; kusangwa lyuwene okw’ingye eriholha kwilhaba eribyaho.” (Yona 4:3) Omuminyereri Eliya mwahwa amaha n’eribugha athi: “Bingaho; Lino Iwe Mwami Mukulhu, wulhusaye engebe yaghe.” (1 Abami 19:4) Aliwe Yehova abya anzire abaghombe abathaleghulha aba kandi abya anzire ibabyaho. Mwathabatsweba busana n’eriyowa bathya. Omwakanya k’ekyo, mwabawathikya erithasyanza eribyaho banga lholha embere erimukolera buthaleghulha.

5. Busana naki balikyethu bakayithagha olhwanzo lhwethu lino?

⁵ Munabwire, abangyi b’okwa balikyethu bali omwa mibere eyikitha obulighe kandi bakayithagha olhwanzo lhwethu. Abandi bakasekereribawa kutse eriendereribwa. Abandi bawithe erighumira erikolhwa nabi kutse olhuthongo aha bakakolera. Kutse ibalhuha busana n’erikolha ahabw’obuthuku buuli kutse eribya n’emibiiri eyikalhuhaya obwongo. N’abandi bawithe ebitsibu by’amaka ebikalire. Obundi bali omwa butheke n’oyuthe kolera Yehova oyukabera eribatsambulikania. Busana n’ebi n’ebindi-n’ebindi, abangyi bakayowa isibakiwithe mani kandi bangana tsuka n’eribulha nga banawithe mughaso. Oyuwanga bawathikya nindi?

OLHWANZO LHWA YEHOVA LHUKATHUGHUMAYA

6. Olhwanzo lhwa Yehova lhukaghumaya lhuthi abaghombe biwe?

⁶ Yehova akakakasaya abaghombe biwe ngoku abanzire lino kandi ngoku akendisya banza erihika kera na kera. Thalengekania Abaisraeli nga mubayowa bathi Yehova akababwira athi: “Wuli w’obughuli bunene omwa meso waghe, kusangwa wabirisikibwa, kandi nabirikwanza,” kandi athi “Siwubahe, kusangwa indi haghuma nawu”! (Isaya 43:4, 5) Thunasi ngoku obuli mughuma w’okw’ithwe ni w’obughuli embere sya Yehova.a (Lebaya omwatsi ahikwa.) E Biblia yikalhaghanisaya yithi: “Omwami Mukulhu ali omo kathi-kathi kawu, omulhwi oyukakinda. Asyakutsemera n’obutseme.”​—Zefania 3:16, 17.

7. Olhwanzo lhwa Yehova lhuli lhuthi ng’olhw’omubire? (Lebaya ekisasani ekiri okw’itsuka.)

⁷ Yehova abiriyilhagha erighumya n’erihumulikania abandu biwe nomubangabya ibawithe ebitsibu ebiri bithi. Mwabugha athi: “Nenyu mwasyonga, mwasyehekwa okwa ndungu, mwasyasumbangirwa okwa marwe. Ng’oyukalembesanibawa na nyinya wiwe, ko nasyabalembesania nyithya.” (Isaya 66:12, 13) Thalengekania omwana ng’akayowa athi mama wiwe akamuheka kutse akasatha nayu! Yehova akwanzire kutsibu kandi anzire iwayowa buholho. Isiwathika-thikira eribya iwuli w’obughuli embere sya Yehova.​—Yeremia 31:3.

8, 9. Olhwanzo lhwa Yesu lhwanga thughumya lhuthi?

⁸ Eyindi nzumwa eyikaleka ithwaminya ngoku Yehova athwanzire y’eno: “Nyamuhanga mwanza ekihugho ky’athya kyaleka iniaha Mughalha wiwe, ekyusa kiwe, neryo oyukamwikiriraya syahere, nikwa abye n’engebe y’erikotha.” (Yoane 3:16) Ekihongwa kya Yesu kikakanganaya ngoku nayu athwanzire, n’olhwanzo olhu lhukathughumaya. E Biblia yikabugha yithi nibya “obulighe kutse amaghali” sibyanga thoka ‘erithughabulha oko lhwanzo lhwa Kristo.’​—Abanya Roma 8:35, 38, 39.

⁹ Hakanayira ebitsibu ibyathutsekya kinyamubiri kutse omw’iyowa kutse ibyathughunzako etseme y’erikolera Yehova. Aliwe eryibuka olhwanzo lhunene olhwa Kristo athuwithire kikathuha akaghalha k’eriyiyinia. (Soma 2 Abanya Korinto 5:14, 15.) Olhwanzo lhwa Yesu lhukaleka ithwanza eribya ithuneho n’erikolera Yehova. Lhwanganaleka ithuthalhuhirira, nomuthwangaghalhwa busana n’ebitsinduli, eriendereribwa, erihwa amani, kutse amaghaniryo.

BALIKYETHU BAKATHUYITHAGHAKO OLHWANZO

10, 11. Ni bahi abawithe olhukwamirwa lhw’erihimba balikyethu abahwere amani? Soborera.

¹⁰ Kandi Yehova akakolesaya ekithunga erithuhimba omo lhwanzo lhwiwe. Thwamanza balikyethu, thukakanganaya ku thwanzire Yehova. Thukakolha ekyosi-kyosi eriwathikya balikyethu eriminya ku ni b’omughaso kandi ngoku Yehova abanzire. (1 Yoane 4:19-21) Omukwenda Paulo mwahandika athi: “Neryo musibikanaye n’erihimbana, ngoku mukanakolha.” (1 Abanya Tesalonika 5:11) Si b’abasyakulhu basa abangakolha eki. Obuli mughuma w’okw’ithwe angana gherererya Yehova na Yesu omw’ihumulikania balikyethu.​—Soma Abanya Roma 15:1, 2.

¹¹ Abandi omwa kithunga abakaghalhawa busana n’amaghaniryo mangyi kutse erihangya-hangya banganayithagha obuwathikya bw’abadokita. (Luka 5:31) Abasyakulhu n’abandi omwa kithunga banasi ngoku nomwakine indi sibathendekirwe eby’obudokita, obuwathikya n’erihumulikania eryo bakaha ni bikulhu kutsibu. Abosi omwa kithunga banganahamirya ab’omuthima asikerere, ibasighika abatseke, n’eriwathikya abandu abosi. (1 Abanya Tesalonika 5:14) Thwanzire ithwaminya balikyethu nga bakayowa bathi. Thutholere ithwabaghumisirizya n’erikania nabu omwa mibere eyanga bahumulikania omughulhu bahwere amani. Wukanalengaho erighumya abandi? Wangakolhaki eryongera erihumulikania n’erihimba abandi?

12. Iha eky’erileberyako ky’oyuwahimbawa omo lhwanzo lhw’ekithunga kyabu.

¹² Mwali wethu e Yuropu akabugha athi: “Nganalengekanaya okw’iyitha, aliwe ngwithe ekikanyiwathikaya ndeke. Ekithunga ekyo ngalimu kyabirilhamya engebe yaghe. Mughulhu wosi balikyethu bakanyihimba kandi banyanzire. Nomwakine indi abake babasi ku ngalhwere obulhwere obw’eriyinuwa, ekithunga kikabya ikinayitheghekire erinyiwathikya. Hane n’omulhume na mukali wiwe abali ng’ababuthi baghe ab’obunyakirimu. Bakanyitsomana, kandi bakabya ibane naghe mughulhu wosi.” Ni kwenene, si bugha indi obuli mundu angawathikya okwa lhulengo lhughumerera. Aliwe, ithwe bosi thwangana lengaho eriwathikya balikyethu.b (Lebaya omwatsi ahikwa.)

NGOKU THWANGAHIMBA ABANDI OMO LHWANZO

13. Ni kyahi ekya thutholere ithwakolha erihumulikania abandi?

¹³ Ibya muhulikiriri mubuya. (Yakobo 1:19) Thukakanganaya olhwanzo thwamahulikirira ithunayihirire omwa kisuko ky’abandi. Omwa lhukeri, bulhaya ebibulyo ebyanga kuwathikya eriyitheghererya ndeke eriyowa lya mulikyenyu. Iniakendi lhangira ku wumutsomene ndeke, nibya n’erikilhangira okwa busu bwawu. Akakania, ghumisirizaya n’erileka abughe ekiri okwa muthima isiwuthamubughiramu. Omw’ibya muhulikiriri mubuya, wangana muyitheghererya ndeke n’erileka iniakuyikethera. Neryo ikikendi mwolhobera erikuhulikirira wukamuwathikya. Wamatsomana abandi ndeke, iwukendi bahumulikania kutsibu.

14. Busana naki si thutholere thukatsweba?

¹⁴ Isiwatsweba. Oyulhwere obulhwere bw’eriyinuwa iniakendi yowa nabi amalengekania athi thukamutsweba. Neryo ikyangana thukalira erimuwathikya. “Hali oyukabugha buthalengekania ng’eritsimitha ly’omuyali; nikwa olhulimi lhw’ab’amenge n’ilhamya.” (Emisyo 12:18) Nomwakine indi sithwanga kighenderera erithwikalya oyulhwere obulhwere bw’eriyinuwa omwa binywe byethu, ithwangana balethera obulhumi bunene thwamabugha buthalengekania. Erisikya omuthima wa mulikyethu, thutholere ithwaleka iniakilhangira ngoku thukalengaho eriyitheghererya emibere yiwe.​—Matayo 7:12.

15. Ni kindu kyahi ky’omughaso ekyo thwanga kolesya erihumulikania abandi?

¹⁵ Kolesaya Ekinywe kya Nyamuhanga erihumulikania abandi. (Soma Abanya Roma 15:4, 5.) E Biblia yikalhua oku “Nyamuhanga oyukaha eriyiyinia n’erihanda omuthima,” neryo sikiriswekaya ebinywe ebirimo eribya ibikathuhumulikanaya. Thunawithe ne Watch Tower Publications Index na Obusondoli obw’Erisekulya Omwa Bitabu eby’Abema ba Yehova. Omw’ikolesya ebindu ebi, thwangana bana amasako n’ebitabu ebya thwanga kolesya erihumulikania n’erihimba balikyethu.

16. Ni mibere yahi eyanga thuwathikya erihimba omundu oyulhwere obulhwere bw’eriyinuwa?

¹⁶ Kanganaya olhukeri. Yehova ni “thatha w’erighanyira, na Nyamuhanga w’erikirania lyosi,” kandi awithe “omuthima w’erighanyira” abaghombe biwe. (Soma 2 Abanya Korinto 1:3-6; Luka 1:78; Abanya Roma 15:13) Omw’eki, Paulo mwahiraho eky’erileberyako ekyuwene kundi mwagherererya Yehova. Mwahandika athi: “Muthwayibombeka omo kathi-kathi kenyu, n’erikangya obwolho obo nyinya akakangaya abaana biwe. Neryo kusangwa thwabya thubanzire kutsibu thwabya thwanzire erisangira nenyu butsira engulhu yuwene iyoyene, nikwa n’esyongebe syethu nibya. Mwabya banze bethu kutsibu.” (1 Abanya Tesalonika 2:7, 8) Thwamakangya olhukeri nga Yehova, ithwangana lethera mulikyethu y’erihumulikana eryo alhue akasaba!

17. Ni malengekania wahi agho thwanga thunga oko balikyethu awanga thuwathikya eribahimba?

¹⁷ Isiwathwalha balikyethu nga bahikene. Ibya n’amalengekania awatholere. Wamathwalha balikyethu nga bahikene, iwukendi lhabira ahisi. (Omugambuli 7:21, 22) Wibuke ngoku Yehova, syali thuyithaghako ebyo thuthe thwanga thoka. Neryo thutholere ithwaghumisirizania. (Abanya Efeso 4:2, 32) Sithutholere thukaleka balikyethu bakayowa nga sibali kolha ndeke kutse eribalinganisya n’abandi. Aliwe, thukabahimba n’erikania okwa bibuya ebyo bakakolha. Eki kyangana leka ibakolera Yehova ibanatsemire.​—Abanya Galatia 6:4.

18. Busana naki thwanzire erihimba abandi omo lhwanzo?

¹⁸ Obuli mughombe wa Yehova ni w’obughuli embere siwe n’embere sya Yesu. (Abanya Galatia 2:20) Thwanzire kutsibu balikyethu, neryo thutholere ithwakolongana nabu omwa bwolho-bwolho. ‘Thukakwama emyatsi eyikaletha obuholho n’ebikathuhanganaya.’ (Abanya Roma 14:19) Thulindirire engebe omwa Paradiso, omuthendi syabya ekyangaleka ithwabbunika omuthima! Simwendisyabya amalhwere n’esyonyuhi. Abandu sibendi syasaholha busana n’ekibi ekyo thwasighalhaya, kandi sihendi syasabya eriendereribwa, ebitsibu by’amaka, kutse ebikaghunza amani. Emyaka rukumi yikendisyabya yabirihwa, abandu bosi bakendi syahikana. Abakendi syabya bathaleghulha okw’ilengesibwa ly’erighunzerera bakendi syabya baghalha ba Yehova ab’okwa kihugho n’eribya “omwa bwiranda bw’olhukengerwa lhw’abaana ba Nyamuhanga.” (Abanya Roma 8:21) Kwesi ithwe bosi thukanganaye olhwanzo olhukahimba n’eriwathikania erisy’ingira omwa kihugho kihya kya Nyamuhanga.