Thwabirihebwa Obutheke
1 Omukwenda Paulo mwathwalha omubiiri wiwe ow’erithulira owa Nyamuhanga amuha mw’ow’omughaso kandi mwakania kugho ‘ng’obutheke.’ (2 Kor. 4:7) Mwayiyinirya ebitsibu n’eriendereribwa akakolha omubiiri oyo. Omwa buthalhuha mwathulira omundu wosi-wosi oyo abana. Mwabana bitsibu bingyi omwa syongendu siwe esy’erilhaba omwa nzira n’omwa ngetse. Thwanga gherererya thuthi Paulo n’erikangania ngoku thukathwalha omubiiri wethu ow’erithulira mwa mukulhu? (Abar. 11:13) Ekikaleka omubiiri wethu iniabya butheke obuthe bwanga linganisibwa n’ekindi kindu niki?
2 Obutheke Obulengethukireyo: Obutheke bw’ekihugho mughulhu mungyi bukaghalhaya kandi endundi yabu siyiri ghunza mughulhu muuli. Okwa lhundi lhuhandi, omubiiri wethu ow’erithulira akathuha emighisa eyithabahwa haghuma n’abandi. (1 Tim. 4:16) Akawathikaya abandu ab’omuthima mwolho eriminya Yehova, erikolha esyombinduka omwa ngebe syabu, n’eribya n’amaha w’engebe y’erikotha. (Abar. 10:13-15) Omw’ithwalha omubiiri wethu ow’erithulira mwa mukulhu, thukabana ekighendererwa kibuya omwa ngebe, eritsemera ebya thukakolha, n’amaha awuwene busana n’omughulhu owakayasa.—1 Kor. 15:58.
3 Kanganaya Ngoku Wukalhangira Obutheke Bwawu mw’obw’Omughaso: Omughaso owathukalhangira omwa kindu mughulhu mungyi akalhangirika omwa ebya thwanga herya busana nakyo. Ka ni lhusunzo lhunene erikolesya obuthuku n’akaghalha kethu eripipa Yehova! (Efe. 5:16, 17) Ngoku thukakolesaya obuthuku bwethu kitholere ikya kangania ngoku thukahira ebindu by’obunyakirimu by’embere kwilhaba erikwama-kwamania eby’ekinyamubiri. Kundi thuwithe ekindu eky’obughuli eky’erisangiramu, thukendi anza erithulhughania n’omuhwa n’eriyitheghekera erithulhughania engulhu yuwene okwa buthuku bwosi.
4 Ebindu by’obughuli bunene mughulhu mungyi sibiri bisawa. Thwama lhangira omubiiri wethu ow’erithulira ng’obutheke obw’obughuli, ithukendi hira w’embere omwa ngebe yethu. (Mt. 5:14-16) Kwesi, mughulhu wosi thugherereraye omukwenda Paulo n’erikolesya obuli kaghisa kosi erikangania ngoku thukathwalha omubiiri wethu mwa mukulhu, erilhangira gho ng’obutheke obw’obughuli bunene.