ERISOMO 40
Thwangabya Thuthi Ithunahenirye Embere sya Nyamuhanga?
Thathera akasasani mama oyuwithe olhwanzo akathegheka kaghalha kiwe kakaghenda okwa sukuru. Akalhangira athi kanayonzire ndeke n’eriambalha esyongyimba esihenirye. Eki kikaleka ikabya ikane n’amaghalha awuwene n’erikangania abandi ngoku ababuthi biwe bakamutsomana. Kuthya, Thatha wethu w’olhwanzo, Yehova, anzire ithwabya bayonzo—kinyamubiri n’omwa by’esyongeso. Thwamabya ithunahenirye, thukaghasirawa kandi ithwaha Yehova y’olhukengerwa.
1. Thwangabya thuthi bayonzo kinyamubiri?
Yehova akathubwira athi: ‘Mwasyabya babuyirire.’ (1 Petero 1:16) Obubuyirire buhambire okw’ibya bayonzo kinyamubiri n’omwa by’esyongeso. Thwanganabya bayonzo kinyamubiri omw’inaba okwa mubiri mughulhu wosi n’erilhangira thuthi esyongyimba, eka, n’esyomatoka syethu bikabya ibinahenirye. Kandi thwangana wathikya okw’iyonza Ekisenge ky’Obwami. Omw’ibya bayonzo kinyamubiri, thukaha Yehova y’olhukengerwa.—2 Abanya Korinto 6:3, 4.
2. Erithoka eribya bayonzo, ni mitse yahi eyo thutholere ithwayihighulhako?
E Biblia yikathubwira yithi ‘thuyitheghaye oko bithisirire byosi eby’omubiri n’eby’ekirimu.’ (2 Abanya Korinto 7:1) Neryo thukalengaho eriyihighulha okwa kindu kyosi-kyosi ekyanga tsandya omubiri wethu kutse obulengekania. Ebya thukalengekanaya bitholere ibyatsemesya Yehova, neryo thukalengaho ngoku thwanga thoka erighana amalengekania awathuwene. (Esyonyimbo 104:34) Kandi thukalengaho eribugha ebyuwene.—Soma Abanya Kolosai 3:8.
Ni kindi kyahi ekyanga leka ithwabya bayonzo kinyamubiri kutse omwa by’esyongeso? Hane ebindu ebyangana tsandya omubiri wethu. Busana n’ekyo, thukayihighulha okwa bindu ng’ethaba, amayirungyi, n’erikolesya emibatsi busana n’eriyitsemesya. Omw’iyihighulha okw’ebi, thukabya n’amaghalha awuwene kandi thukakanganaya ku thusikirye engebe. Kandi thukalengaho eribya bayonzo omwa by’esyongeso omw’irwanisya omutse mubi ow’erinyighitha ebitsuku by’olhubutho n’ow’erilebya eponografe. (Esyonyimbo 119:37; Abanya Efeso 5:5) Kyangana kalha erileka emitse eyi, aliwe Yehova angana thuwathikya erikolha ekyo.—Soma Isaya 41:13.
THASYIGHA BINGYI
Minya ngoku eribya bayonzo kinyamubiri kikaha Yehova y’olhukengerwa, kandi minya ngoku wanga rwanisya emitse eyithuwene.
3. Obuyonzo bw’ekinyamubiri bukaha Yehova y’olhukengerwa
Thwangana minya amalengekania wa Yehova awahambire oko buyonzo omw’ilebya ebihano ebyo aha Abaisraeli. Soma Eriluayo 19:10 na 30:17-19, mwanakania okwa bibulyo bino:
Emilhondo eyi yikabisulha yithi amalengekania wa Yehova oko buyonzo bw’ekinyamubiri?
Ni mibere yahi eyuwene eyikendi kuwathikya eribya iwune muyonzo kinyamubiri?
Kikayithagha obuthuku n’akaghalha eribya bayonzo kinyamubiri. Aliwe thwanganabya bayonzo mbulha thwikere hayi kutse thuli bagaga kutse banakwa. Mubughaye EVIDIYO, mwanakania okwa kibulyo ekikakwamako.
Ebindu byethu eribya ibinathondire ndeke kandi ibinahenirye kikaha kithi omubiiri wethu w’erithulira w’olhukengerwa?
4. Singura emitse mibi
Yehova angana thuwathikya erikinda omutse mubi wosi-wosi
Wamabya iwukanywa ethaba kutse iwukakolesaya emibatsi busana n’eriyitsemesya, iwangana minya ngoku kikalire erileka omutse oyo. Ni kyahi ekyanga wathikya? Minya ngoku omutse oyo akakuhambako. Soma Matayo 22:37-39, neryo mukanaye erinywa ethaba n’erikolesya emibatsi ya nabi nga kyanga hamba kithi . . .
okwa bunywani obo mundu awithe na Yehova.
okw’eka y’omundu n’abandi abamuthimbireko.
Hiraho endegheka y’erileka omutse mubi.a Mubughaye EVIDIYO.
Soma 2 Abanya Korinto 4:7, mwanakania okwa kibulyo kino:
Endegheka eyuwene ey’erisaba, eriyeghesya, n’erihindana mughulhu wosi yanga wathikya yithi omundu erisingura omutse mubi?
5. Rwanisaya amalengekania awathuwene n’emitse y’oburofu
Soma Abanya Kolosai 3:5, mwanakania okwa bibulyo bino:
Thukaminya thuthi ngoku eponografe, erithumirana emyatsi y’eby’engyingo okwa simu, n’erinyighitha ebitsuku by’olhubuthu ku si by’erire embere sya Yehova?
Wukalengekanaya ikyanathokekana ithwe eribya bayonzo omwa by’esyongeso ngoku Yehova anzire? Busana naki?
Minya ngoku wanga rwanisya amalengekania awathuwene. Mubughaye EVIDIYO.
Yesu mwaha eky’erileberyako ekikakanganaya ngoku thutholere ithwayira ekya thukakolha nuku thubye ithunahenirye omwa by’esyongeso. Soma Matayo 5:29, 30, mwanakania okwa kibulyo kino:
Nomwakine indi Yesu abya isyali bugha athi ithwayihuthalya kinyamubiri, mwakangania ku thutholere ithwayira ekyo thukakolha. Ni kyahi ekya mundu angakolha eriyihighulha okwa malengekania awathuwene?b
Wamabya iwune mulengaho kutsibu eriyilhusyamo amalengekania awathuwene, Yehova akasima akaghalha ako. Soma Esyonyimbo 103:13, 14, mwanakania okwa kibulyo kino:
Wamabya iwune murwanisya omutse mubi, omulhondo oyu anga kuhiramo athi omuhwa w’erilholha embere erirwanisyagho?
Eriyisanga iwabirithasyakolha ekya wunemurwanisya si bulemwa!
Ikyanganolhoba erilengekania wuthi, ‘Nabirilemwa, neryo ngakwame kyabikyako.’ Aliwe thalengekania oku kino: Omuthibithi amakobboka neryo akayithinira, sikirimanyisaya kithi amabirilemwa kutse kithi athasyatsuka buhyaka. Kuthya, omundu eriyisanga iniabirithasyakolha eky’anemurwanisya sikirimanyisaya kithi amabirilemwa amalhwa w’erikisingura. Kandi sikiri ghunzaho erikulha-kulhana eryosi ery’anemukolha. Ni kya buli kiro eriyisanga iwabirithasyakolha ekya wunemurwanisya—ekyo kikabya. Neryo isiwalhuhirira! Busana n’obuwathikya bwa Yehova, wangana kinda omutse mubi.
ABANDI BAKABUGHA BATHI: “Kyabirinyidwadwana. Kinyikalire erileka.”
N’isako lyahi erya wanga kolesya erikangania omundu ngoku busana n’obuwathikya bwa Yehova angana leka omutse mubi?
OMWA BIKUHI
Thukatsemesaya Yehova omw’ilhangira thuthi omubiri wethu, amalengekania wethu, n’emibere yethu binahenirye.
Eriyibukya
Busana naki ni kikulhu eribya bayonzo?
Wangabya wuthi muyonzo kinyamubiri?
Wanga kolhaki erilhangira wuthi amalengekania wawu n’emibere yawu bikabya ibinahenirye?
MINYA BINGYI
Ni hindu hyahi hike-hike ehyawanga kolha eribya iwunahenirye kinyamubiri nomuwangabya isiwuwithe bingyi?
Minya ebya wanga kolha ebyanga kuwathikya erileka erinywa ethaba.
“Ngoku Wanga Leka Erinywa Ethaba” (Awake!, Okwakathano 2010)
Minya ebikalhwiririra omw’ilebya eponografe.
“Eponografe—Yinawithe Butsibu?” (The Watchtower, Okwomunani 1, 2013)
Minya ngoku omulhume mughuma aleka omutse w’erilebya eponografe.
“Munalemwa Mirundi Mingyi Erisalha Ingasingura” (The Watchtower No. 4 2016)
a “Ngoku Wanga Leka Erinywa Ethaba,” omwa katsweka Minya Bingyi akali omw’isomo lino, akasoborera ebyanga kolhwa eriwathikya omundu erileka erinywa ethaba.
b Obuwathikya ngoku wanga rwanisya omutse w’erinyighitha ebitsuku by’olhubutho, lebaya “Nangasingura Indi Omutse w’Erinyighitha Ebitsuku by’Olhubuthu?” omwa kitabu Questions Young People Ask—Answers That Work, Volume 1, esura 25.