Yehova ni Nyamuhanga w’obuyithondeke. (1 Abanya Korinto 14:33, 40) Neryo obo kwesi n’abandu biwe batholere ibabya omwa buyithondeke. Ekithunga ky’Ekikrisitayo kithondekenie kithi? Thwanga wathikya thuthi omw’ihiraho obuyithondeke obo?

1. Nindi oyuli muthwe w’ekithunga?

‘Kristo awithe ehamuli oko kanisa’ ni bugha ambu ekithunga. (Abanya Efeso 5:23) Iniane elhubulha, akasondolha emibiiri y’abandu ba Yehova omwa kihugho kyosi. Yesu mwahiraho “omughombe oyutheleghulha n’ow’amenge”​—egurupu nyike y’abasyakulhu abakulire bunyakirimu kandi abasibwe mwa Akathunga Akakasondolha. (Soma Matayo 24:45-47.) Ng’abakwenda ab’omwa kighana ky’erimbere n’abasyakulhu e Yerusalemu, Akathunga Akakasondolha kakaha ebithunga by’obusondoli omwa kihugho kyosi. (Emibiri 15:2) Aliwe abalhume aba ibo si b’abasondoli b’ekithunga kya Nyamuhanga. Bakayikethera Yehova erilhabira omwa Kinywe kiwe eribaha obusondoli, kandi bakaghondera Kristo ng’omuthwe w’ekithunga.

2. Abasyakulhu bawithe lhukwamirwaki?

Abasyakulhu ni balhume Bakristayo abakulire bunyakirimu abakakangiriraya ebiri omwa Masako n’erilisya abandu ba Yehova omw’ibawathikya n’eribahimba. Sibali thuhawa busana n’ebyo bakakolha. Aliwe, bakakolha “omw’iyihayo embere sya Nyamuhanga; si busana n’erianza erighoba erithatholere, aliwe omwa muthima w’erikolha.” (1 Petero 5:1, 2, NWT) Abasyakulhu bakawathikibawa n’abaghombe bawathikya, abo obuthuku bwangana hika, nabu ibatholera erikolha ng’abasyakulhu.

Akathunga Akakasondolha kakasombolha abandi basyakulhu erikolha ng’abalebererya b’omuthimbo. Bakabungira ebithunga muthina-muthina erihabyo obusondoli n’eribihira mw’omuhwa. Bakasombolha abasyakulhu n’abaghombe abawathikya, abatholere ibaberererya ebyo Amasako akabayithaghako.​—1 Timoteo 3:1-10, 12; Tito 1:5-9.

3. Obuli Mwema awithe lhukwamirwaki?

Abosi omo kithunga ‘bakapipa erina ly’Omwami Mukulhu,’ Yehova, omw’isangira omwa mihindano y’ekithunga n’omw’ithulira erikwamana n’emibere eyo balimu.​—Soma Esyonyimbo 148:12, 13.

THASYIGHA BINGYI

4. Yesu ni musondoli oyukahumulikanaya

Yesu akathukokaya omo lhwanzo. Soma Matayo 11:28-30, mwanakania okwa kibulyo kino:

• Yesu ni musondoli oyuli athi, kandi anzire ithwayowa thuthi?

EVIDIYO: Abasyakulhu Bakawathikaya e Nepal Yabiriwa Omusiki (4:56)

E Biblia yikakangiriraya ndeke-ndeke abasyakulhu nga batholere ibakolha bathi omubiiri wabu.

Soma Isaya 32:2 na 1 Petero 5:1-3, mwanakania okwa bibulyo bino:

• Eriminya ngoku abasyakulhu bakalengaho erihumulikania abandi nga Yesu kikaleka iwayowa wuthi?

• Ni sindi nzira syahi esyo abasyakulhu bakagherererayamu Yesu?

5. Abasyakulhu bakakangiriraya omw’ibya ky’erileberyako ekyuwene

EVIDIYO: Abasyakulhu Bakasondolha! (7:39)

Yesu abirihiriraho abakasondolha omwa kithunga b’olhulengo. Soma Matayo 23:8-12, mwanakania okwa kibulyo kino:

• Abasyakulhu, e Biblia yikabahiriraho lhulengoki? Wukalengekanaya abakulhu b’amadini bakanaghendera okwa bya Biblia yikabugha ebi?

1. Abasyakulhu bakalhangira bathi bakabya ibanaghumire bunyakirimu, kuthya n’ab’omw’eka yabu

2. Abasyakulhu bakatsomana abosi omwa kithunga

3. Abasyakulhu bakathulira mughulhu wosi

4. Abasyakulhu ni bakangirirya. Kandi bakawathikaya omw’ikolha obuyonzo n’eyindi mibiiri

6. Thwangana ghenda-ghendania n’obusondoli bw’abasyakulhu

E Biblia yikathuha enzumwa ngulhu eyangaleka ithwaghenda-ghendania n’obusondoli bw’abasyakulhu. Soma Abaebrania 13:17, mwanakania okwa bibulyo bino:

• Busana naki e Biblia yikathubwira yithi thutholere ithwowa n’erikenga abakasondolha? Eki wukakilhangira wuthi?

Soma Luka 16:10, mwanakania okwa kibulyo kino:

• Busana naki ni kikulhu erighenda-ghendania n’obusondoli bw’abasyakulhu nibya n’omo myatsi eyikabya nga ni mike-mike?

OMWA BIKUHI

Yesu ni muthwe w’ekithunga. Thukatsema erighenda-ghendania n’obusondoli bw’abasyakulhu abakakolha omw’isi siwe kundi bakathuhumulikanaya n’erithuhiriraho eky’erileberyako kibuya.

Eriyibukya

• Nindi oyuli muthwe w’ekithunga?

• Abasyakulhu bakawathikaya bathi ekithunga?

• Olhukwamirwa lhw’obuli muramya wa Yehova ni lhwahi?

MINYA BINGYI

Lhangira ekikakanganaya ngoku Akathunga Akakasondolha n’abandi basyakulhu batsomene kutsibu Abakristayo munabwire.

Erighumya Balikyethu Eyo Mubiiri Wethu Aghanibirwe (4:22)

Minya omubiiri w’abalebererya b’omuthimbo nga ni wahi.

Engebe y’Omulebererya w’Omuthimbo Omwa Kyalu (4:51)

Soma okwa lhukwamirwa lhw’abakali omwa kithunga.

“Abema ba Yehova Bakanalighira Abakali Erikangirirya?” (The Watchtower, Okwomwenda 1, 2012)

Minya abasyakulhu nga bakakolha bathi kutsibu erihimba abikirirya balikyabo.

“Abasyakulhu Abakristayo Ni Bakoli Balikyethu Busana n’Erithuha Etseme” (The Watchtower, Okwokubanza 15, 2013)

1. N’ihabulha lyahi erya Biblia yikaha abiba?

Yehova abirisombolha omulhume eribya muthwe w’eka yiwe. (Soma Abanya Efeso 5:23.) Yehova anzire omulhume iniabya akathwamu ebikendi ghasira eka yiwe. E Biblia yikahabulha abiba yithi: ‘Mwanze abakali benyu.’ (Abanya Efeso 5:25) Ekyo kikamanyisayaki? Omulhume oyuwithe olhwanzo akathwalha mukali wiwe omo lhukeri, iban’eka n’omwa bandu. Akamutheghaya oko byanga mukolha nabi kandi akalengaho kutsibu erimutsomana kinyamubiri n’omw’iyowa. (1 Timoteo 5:8) Ekikulhu kutsibu, akasondolha omw’itsomana ebiyithawa biwe eby’obunyakirimu. (Matayo 4:4) Ng’eky’erileberyako, anganasaba n’erisoma haghuma e Biblia na mukali wiwe. Omulhume amatsomana mukali wiwe omo lhwanzo, akasighalha iniane bughuma ndeke na Yehova.​—Soma 1 Petero 3:7.

Yesu ya Muthwe w’ekithunga ky’Ekikristayo. (Abanya Efeso 5:23) Munabwire, Yesu iniane omwa kitsumbi kiwe elhubulha, anemusondolha abakamukwama abali okwa kihugho erilhabira omwa “mughombe oyuthereghulha n’ow’amenge.” (Soma Matayo 24:45.) Kundi “omughombe” asombolhawa na Yesu iyuwene-wene, awithe obuthoki bulebe aliwe atholere iniaghondera Kristo kandi iniakolera baghalha bobu Kristo. Omughombe oyo nindi? Omughombe akathutsomana athi?