Ibya n’Abanzire Yehova

Busana naki thutholere ithwabya n’abanzire Yehova? Kundi abathukabya nabu bangana leka ithwakolha ebyuwene kutse ebithuwene. (Emi 13:20) Ng’eky’erileberyako, Omwami Yoasi “mwakolha ebibuya omo meso w’Omwami Mukulhu” omughulhu abya akabya haghuma n’omuhereri Mukulhu ya Yehoyada. (2Emy 24:2) Yehoyada abere abiriholha, Yoasi mwasighania Yehova busana n’amanywani mabi.—2Emy 24:17-19.

Omwa kighonye ky’erimbere, omukwenda Paulo mwalinganisya ekithunga ky’Ekikrisitayo ‘ng’enyumba nene’ n’abali omwa kithunga ‘ng’ebibindi n’ebibo,’ kutse ebindu ebikakolesibawa eka. Thukasighalha ‘bibindi by’omubiiri owene’ omughulhu thukayitheghaya okw’ibya n’obunywani bwa hakuhi-hakuhi n’omundu wosi-wosi, nibya n’omwangabya ini w’okw’ithwe kutse ow’omwa kithunga, oyukakolha ebikaponesaya Yehova. (2Tim 2:20, 21) Busana n’ekyo, ambi kwesi ithwalholha embere erinywana abanzire Yehova n’abakathuhira mw’omuhwa ow’erimukolera.

MULEBAYE EVIDIYO IGHA ERIGHANA OBUNYWANI N’ABANDU BABI, NERYO MWANAKANIA OKWA BIBULYO BINO:

• Thwanga yisanga thuthi ithwabiribya n’abandu babi?

• Ngoku thulyalhangira omwa vidiyo, ni kyahi ekya wathikaya balikyethu basathu eriyithwa okwa bandu babi?

• Ni misingyi yahi ye Biblia eyanga kuwathikya erisombolha ndeke abanywani?