24 Kabiji bamupopele pa kichi ne kwabana bivwalo byanji bya peulu kupichila mu kuta bubale kuba’mba bayuke usakwibisenda.+

34 Bino Yesu waambile’mba: “Tata, balekelaiko mambo, mambo kechi bayuka kyo babena kuba ne.” Kabiji batele bubale kuba’mba babane bivwalo byanji.+

23 Bashilikale byo bapwishishe kumupopa Yesu pa kichi, bashikwile bivwalo byanji bya peulu ne kwibyabanyapo pana, awu kyanji awu kyanji, kabiji bashikwile ne kivwalo kyanji kya mukachi. Bino kino kivwalo kya mukachi kechi kyajinga na mifumo ne, mambo bekipikwile kufumatu kwiulu kufika ne kunshi. 24 Onkao mambo, beambijile bene na bene amba: “Kange twikitabule ne, bino twayai tute bubale pa kuba’mba tuyuke usakwikisenda.”+ Kyajinga bino kuba’mba kinembelo kifike kyaamba’mba: “Beabenye bene bivwalo byami kabiji batele bubale pa kivwalo kyami.”+ Onkao mambo, bashilikale baubile bino bintu.