Byubilo bya Batumwa

⁷ Bino ñanga mwine mukatampe wamushikishe’mba: “Nanchi bino bintu byo ibyo nyi?” 2 Setepena wakumbwile’mba: “Anweba bakwetu, balongo bami ne bashetu, ntelekai. Lesa wa lukumo wamwekele ku mushakulu wetu Abalahama byo ajinga mu Mesopotamya saka akyangye kuya na kwikala mu Halana,+ 3 kabiji wamwambijile’mba: ‘Fumako ku balongo bobe ne ku kyalo kyobe uye na kwikala mu kyalo kyo nkakubuula.’+ 4 Ne aye wafuminemo mu kyalo kya bena Kalodeya ne kukekala mu Halana. Konkakwa shanji byo afwile,+ Lesa wamwambijile kufumako ne kwiya na kwikala mu kino kyalo mo mubena kwikala anweba.+ 5 Bino Lesa kechi wamupelepo kya buswanyi mu kino kyalo nangwa pa kunyanta kulu kwanji ne, nangwa byonkabyo, wamulayile kumupa kino kyalo kwikala ke kyanji ne kya baana* banji,+ nangwa kya kuba kechi wakijingapo na mwana ne. 6 Kabiji Lesa wamwambijile’mba, baana* banji bakekala bwenyi mu kyalo kingi kabiji bakebanonka buzha ku bantu ne kwibamanyika* myaka 400.+ 7 Lesa waambile’mba, ‘Akya kisaka kyo bakekalako buzha nkekizhachisha+ kabiji mu kuya kwa kimye, bakafumamo ne kwiya na kuñingijila mwingilo wazhila mu kyonka kino kyalo.’+

8 “Kabiji Lesa wamupele ne lulayañano lwa mukanda,+ ne kusema wasemene Izaka+ ne kumutwala ku mukanda pa juba ja butanu na busatu,+ kabiji Izaka wasemene Yakoba, ne Yakoba naye wasemene mitwe* ya bisemi 12. 9 Ino mitwe ya bisemi yaubijile Yosefwa+ kichima ne kumupotesha ku Ijipita.+ Bino Lesa wajinga nanji,+ 10 kabiji wamupokolwele mu malwa onse ne kumulengela kubilwa bibusa ne kumupa maana byo ajinga kwi Felo mfumu wa Ijipita. Ne Felo wamutongwele kwikala wa kutangijila bena Ijipita ne nzubo yanji yonse.+ 11 Bino mwaponene kipowe kya nzala kikatampe mu kyalo kyonse kya Ijipita ne Kenana, ajinga malwa akatampe, ne bashakulu betu kechi bajinga na kajo ne.+ 12 Bino Yakoba waumvwine’mba mu kyalo kya Ijipita muji kajo, kabiji watumineko patanshi bashakulu betu.+ 13 Byo babweleleko ja bubiji, Yosefwa wisolwele ku balongo banji, ne kisemi kya kwa Yosefwa kyayukanyikilwe kwi Felo.+ 14 Onkao mambo, Yosefwa watumineko jiwi ne kumwita Yakoba shanji ne balongo banji,+ bantu* bonse pamo bajinga 75.+ 15 Onkao mambo, Yakoba wayile ku Ijipita+ ne kufwila konkakwa,+ ne bashakulu betu nabo bafwile.+ 16 Bebatwajile ku Shekema ne kukebazhiika mu kilende kyapotele Abalahama na mali a siliva ku baana ba kwa Hamola mu Shekema.+

17 “Mulaye Lesa ye alayile Abalahama byo ajinga pepi kufika, bantu bavujilenga ne kusemununa mu Ijipita, 18 kufikatu ne kimye kyo paswaine mfumu ungi mu Ijipita wabujile kuyuka Yosefwa.+ 19 Uno mfumu wajimukijile kisaka kyetu ne kukanjikizha bashetu kutaya twana twabo twalukeke kuba’mba tubule kwikala na bumi.+ 20 Pa kyonkakya kimye, Mosesa naye wasemekelwe, kabiji walambile bingi ku meso a Lesa. Ne aye bamulamine* mu nzubo ya bashanji pa bañondo basatu.+ 21 Bino byo bamutayile,*+ mwana wa mukazhi wa kwa Felo wamutolele ne kumukomesha kwikala mwananji.+ 22 Byonkabyo, Mosesa bamufunjishe maana onse a bena Ijipita. Kabiji wajinga bingi na bulume mu byo aambanga ne kuba.+

23 “Byo afikizhe myaka 40, wakebele* kuya na kupempula* balongo banji bena Isalela.+ 24 Byo amwene umo saka bamuyanjisha, wamukwashishe ne kushinkanya kupichila mu kwipaya mwina Ijipita. 25 Aye walangulukilenga’mba balongo banji basakukwatakanya amba Lesa ukebapulusha kupichila mwi aye, bino kechi bakwatakenye ne. 26 Juba jalondejilepo, Mosesa waishile kwi abo kimye kyo balwilenga kabiji waesekele bingi kwibapwanya pamo ne kwibambila’mba: ‘Anweba bakwetu, mwi balongo na balongo. Mambo ka o mubena kulwila?’ 27 Bino awa wapuminenga mukwabo wamushinjikile ne kumwambila’mba, ‘Ñanyi wakutongola kwikala kalama kabiji wa kwituchibila mambo? 28 Nanchi ubena kukeba kungipaya byonka byo waipayile mwina Ijipita kesha nyi?’ 29 Mosesa byo aumvwine kino, wanyemene ne kukekala bwenyi mu kyalo kya Mijanyi, ko akasemejile baana babiji.+

30 “Byo papichile myaka 40, malaika wamwekele kwi aye mu kiselebwa kya Mutumba wa Sinai mu mujilo wateemenenga mu kipupu kya miba.+ 31 Mosesa byo ekimwene, wakuminye bingi. Bino byo afwenyenyenga kwipi amba ekimweshe, waumvwine jiwi ja Yehoba* amba: 32 ‘Amiwa yami Lesa wa bashakulu bobe, Lesa wa Abalahama, Lesa wa Izaka kabiji Lesa wa Yakoba.’+ Mosesa watendekele kuzakama kabiji kechi wakebele kutalako jibiji ne. 33 Yehoba* wamwambijile’mba: ‘Vuula makwabilo ku maulu obe, mambo pa mpunzha po waimana pazhila. 34 Namona kumanama kwa bantu bami baji mu Ijipita, kabiji naumvwa mibinzo+ yabo kabiji naiya namba nebapokolole. Pano iya, nkutume ku Ijipita.’ 35 Uno yenka Mosesa ye bakaine ne kwamba’mba: ‘Ñanyi wakutongola kwikala kalama kabiji wa kwituchibila mambo?’+ Lesa ye ye atumine+ kwikala kalama kabiji mupokolweshi kupichila mwi malaika wamwekele kwi aye mu kipupu kya miba. 36 Uno muntu ye wafumishe bena Isalela+ mu Ijipita+ byo aubile bya kukumya* ne biyukilo mu Ijipita ne pa Kalunga Kachila+ ne mu kiselebwa pa myaka 40.+

37 “Uno ye Mosesa waambijile bena Isalela amba: ‘Lesa ukemutongwela ngauzhi uji nobe amiwa kufuma mu balongo benu.’+ 38 Uno ye waishile kwikala mukachi ka kipwilo mu kiselebwa kabiji malaika+ waambile kwi aye+ pa Mutumba wa Sinai ne na bashakulu betu, kabiji watambwile byambo byumi kwi Lesa bya kwimupa anweba.+ 39 Bashakulu betu bakaine kumukookela ne kumulengulula+ kabiji babwezhezhe michima yabo ku Ijipita,+ 40 ne kwambila Alona amba: ‘Tulengele balesa basakwitutangijilanga. Mambo kechi twayuka kintu kyamwekela uno Mosesa witufumishe mu kyalo kya Ijipita ne.’+ 41 Onkao mambo, mu oa moba balengele mwana ñombe ne kutapisha kitapisho ku nkishi kabiji batendekele kusekelela kintu kyo balengele na maboko abo.+ 42 Onkao mambo, Lesa wibavundamijile ne kwibaleka’mba bengijilenga bintu bya mwiulu,+ byonka byo kyanembwa mu buku wa Bangauzhi amba: ‘Anweba ba mu nzubo ya Isalela, nanchi mwapaine milambo ne bitapisho kwi amiwa pa myaka 40 mu kiselebwa nyi? 43 Bino mwasendele tente wa Moloka+ ne kabangabanga ka lesa Lefani, bipashañano byo mwalengele kuba’mba mwibipopwelenga. Onkao mambo, amiwa nkemutwala kwalepa kukila Babilona.’+

44 “Bashakulu betu bajinga na tente wa lushimuno mu kiselebwa, byonka Lesa byo akambizhe kimye kyo abuujilenga Mosesa kumufiika monka mwayijile kifwanyikizho kyo amwene.+ 45 Kabiji bashakulu betu basendele uno tente kimye kyo bayile ne Yoshua ku kyalo kya bisaka bya bantu+ Lesa byo apangilemo bashakulu betu saka bamonako.+ Awa tente waikelenga monkamwa kufikatu ne mu moba a kwa Davida. 46 Davida bamubijile bibusa kwi Lesa kabiji walombele kuba’mba ashimike mwa kwikala Lesa wa Yakoba.+ 47 Nangwa byonkabyo, Solomone ye wamushimikijile nzubo.+ 48 Pano bino, Mwine Wakila kechi wikala mu mazubo o bashimika na maboko ne,+ byonka byaamba ngauzhi amba: 49 ‘Mwiulu jo jitanda jami+ kabiji ntanda jo jitebe po nyanta maulu ami.+ Nzubo ya mutundu ka yo mukanshimikila? Bino byo byaamba Yehoba.* Nangwa mpunzha yami ya kukokolokelamo iji pi? 50 Nanchi maboko ami kechi o alengele bino bintu byonse nenyi?’+

51 “Anweba mwauma mashingo, ba michima ne matwi abula kuya ku mukanda, kimye kyonse mukanya mupashi wazhila; byonka byaubile bashakulu benu, ne anweba byo byo muba.+ 52 Ñanyi ngauzhi bashakulu benu ye babujile kumanyika?+ Baipayile aba bonse baambijilenga jimo kwiya kwa muntu waoloka,+ anweba ye mwasolwele ne kwipaya,+ 53 kabiji mwatambwile Mizhilo yo bemupele kupichila mu bamalaika,+ bino kechi mwiilama ne.”

54 Byo baumvwine kino, bazhingijile* bingi kabiji batendekele kumushenkela ku meno. 55 Bino Setepena byo ayujile mupashi wazhila, watajile mwiulu ne kumona lukumo lwa Lesa ne Yesu saka aimana ku kuboko kwa kilujo kya Lesa,+ 56 kabiji waambile’mba: “Talai! Namona jiulu jashinkuka ne Mwana muntu+ waimana ku kuboko kwa kilujo kya Lesa.”+ 57 Byo baumvwine kino, babijikile ne kushinka maboko mu matwi abo ne kumuvundumukila bonse. 58 Byo bamutayile pangye ya muzhi, batendekele kumwasa mabwe.+ Bakamonyi+ batujile bivwalo byabo bya peulu ku maulu a nsongwalume watelwanga’mba Saulo.+ 59 Byo bamwashilenga mabwe, Setepena walombele’mba: “Nkambo Yesu, tambulai mupashi wami.” 60 Byo afukamine panshi, wabijikile’mba: “Yehoba,* kange mwibamanyike bano bantu na mambo a buno bubi ne.”+ Byo apwishishe kwamba bino, waponejile mu tulo twa lufu.