Kubala

26 Kinkunka byo kyapwile,+ Yehoba waambijile Mosesa ne Eleaza mwana wa kwa Alona ñanga amba: 2 “Balai jibumba jonse ja bena Isalela kutendekela pa baji na myaka 20 monka mwayila bikota byabo, mubale bonse bakonsha kwikala bashilikale mu bena Isalela.”+ 3 Byonkabyo, Mosesa ne Eleaza+ ñanga bebambijile mu biselebwa bya Moabu+ byajinga ku Yodano kwipi na Yeliko+ amba: 4 “Balai bantu kutendekela pa baji na myaka 20 kuya peulu, byonkatu Yehoba byo akambizhe Mosesa.”+

Baana ba kwa Isalela bafumine mu kyalo kya Ijipita bajinga: 5 Lubenyi+ mubeji wa kwa Isalela; kabiji baana ba kwa Lubenyi+ bajinga: Hanoki, mwafumine kisemi kya bena Hanoki, Palu, mwafumine kisemi kya bena Palu; 6 Hezelona, mwafumine kisemi kya bena Hezelona, ne Kami, mwafumine kisemi kya bena Kami. 7 Abino byo byajinga bisemi bya bena Lubenyi, ne bantu babo bo banembele bajinga 43,730.+

8 Mwana wa kwa Palu wajinga Eliaba. 9 Baana ba kwa Eliaba bajinga Nemwela, Datanyi ne Abilama. Datanyi ne Abilama bo bo basajile mu jibumba pamo na jibumba ja kwa Kola,+ balwilenga ne Yehoba+ byo batobweshenga Mosesa+ ne Alona.

10 Kabiji mushiji waasamine* ne kwibamina bonse. Pakuba Kola wafwijile pamo na bantu bamutundaikilenga kimye mujilo kyo asokele banabalume 250.+ Kabiji baikala ke kya kwitujimunako.+ 11 Pano bino, baana ba kwa Kola kechi bafwile ne.+

12 Baana ba kwa Shimeona+ monka mwayijile bisemi byabo bajinga: Nemwela, mwafumine kisemi kya bena Nemwela; Yamina, mwafumine kisemi kya bena Yamina; Yakina, mwafumine kisemi kya bena Yakina; 13 Zela, mwafumine kisemi kya bena Zela, ne Shaulo, mwafumine kisemi kya bena Shaulo. 14 Abino byo byajinga bisemi bya bena Shimeona: bajinga 22,200.+

15 Baana ba kwa Gadi+ monka mwayijile bisemi byabo bajinga: Zefona, mwafumine kisemi kya bena Zefona; Hagi, mwafumine kisemi kya bena Hagi; Shuni, mwafumine kisemi kya bena Shuni; 16 Ozinyi, mwafumine kisemi kya bena Ozinyi; Eli, mwafumine kisemi kya bena Eli; 17 Aloda, mwafumine kisemi kya bena Aloda, ne Aleli, mwafumine kisemi kya bena Aleli. 18 Abino byo byajinga bisemi bya baana ba kwa Gadi, ne bantu babo bo banembele bajinga 40,500.+

19 Baana ba kwa Yuda+ bajinga ba Ela ne Onanyi.+ Nangwa byonkabyo, ba Ela ne Onanyi bafwijile mu kyalo kya Kenana.+ 20 Baana ba kwa Yuda monka mwayijile bisemi byabo bajinga: Shela,+ mwafumine kisemi kya bena Shela; Peleze,+ mwafumine kisemi kya bena Peleze, ne Zela,+ mwafumine kisemi kya bena Zela. 21 Baana ba kwa Peleze bajinga: Hezelona,+ mwafumine kisemi kya bena Hezelona, ne Hamula,+ mwafumine kisemi kya bena Hamula. 22 Abino byo byajinga bisemi bya bena Yuda, ne bantu babo bo banembele bajinga 76,500.+

23 Baana ba kwa Isakala+ monka mwayijile bisemi byabo bajinga: Tola,+ mwafumine kisemi kya bena Tola; Puwa, mwafumine kisemi kya bena Puwa; 24 Yashuba, mwafumine kisemi kya bena Yashuba, ne Shimilona, mwafumine kisemi kya bena Shimilona. 25 Abino byo byajinga bisemi bya bena Isakala, ne bantu babo bo banembele bajinga 64,300.+

26 Baana ba kwa Zebuluna+ monka mwayijile bisemi byabo bajinga: Seleda, mwafumine kisemi kya bena Seleda; Elona, mwafumine kisemi kya bena Elona, ne Yalela, mwafumine kisemi kya bena Yalela. 27 Abino byo byajinga bisemi bya bena Zebuluna, ne bantu babo bo banembele bajinga 60,500.+

28 Baana ba kwa Yosefwa+ monka mwayijile bisemi byabo bajinga: Manase ne Efelaimu.+ 29 Baana ba kwa Manase+ bajinga: Makila,+ mwafumine kisemi kya bena Makila; kabiji Makila wasemene Gileada;+ mwi Gileada, mwafumine kisemi kya bena Gileada. 30 Abano bo bajinga baana ba kwa Gileada: Iezela, mwafumine kisemi kya bena Iezela; Heleka, mwafumine kisemi kya bena Heleka; 31 Ashiliela, mwafumine kisemi kya bena Ashiliela; Shekema, mwafumine kisemi kya bena Shekema; 32 Shemida, mwafumine kisemi kya bena Shemida, ne Hefela, mwafumine kisemi kya bena Hefela. 33 Bino Zelofehada mwana wa kwa Hefela kechi wasemenepo baana ba balume ne, wasemenetu baana ba bakazhi+ kabiji mazhina a baana ba kwa Zelofehada+ bajinga Mala, Nowa, Hogala, Milika ne Tiliza. 34 Abino byo byajinga bisemi bya kwa Manase, ne bantu babo bo banembele bajinga 52,700.+

35 Abano bo bajinga baana ba kwa Efelaimu+ monka mwayijile bisemi byabo: Shutela,+ mwafumine kisemi kya bena Shutela; Bekele, mwafumine kisemi kya bena Bekele, ne Tahana, mwafumine kisemi kya bena Tahana. 36 Abano bo bajinga baana ba kwa Shutela: Elana, mwafumine kisemi kya bena Elana. 37 Abino byo byajinga bisemi bya baana ba kwa Efelaimu, ne bantu babo bo banembele bajinga 32,500.+ Abano bo bajinga baana ba kwa Yosefwa monka mwayijile bisemi byabo.

38 Baana ba kwa Benjamina+ monka mwayijile bisemi byabo bajinga: Bela,+ mwafumine kisemi kya bena Bela; Ashibela, mwafumine kisemi kya bena Ashibela; Ahilama, mwafumine kisemi kya bena Ahilama; 39 Shefufama, mwafumine kisemi kya bena Shefufama, ne Hufama, mwafumine kisemi kya bena Hufama. 40 Baana ba kwa Bela bajinga ba Aladi ne Nemani:+ mwi Aladi, mwafumine kisemi kya bena Aladi, ne mwi Nemani, mwafumine kisemi kya bena Nemani. 41 Abano bo bajinga baana ba kwa Benjamina monka mwayijile bisemi byabo, ne bantu babo bo banembele bajinga 45,600.+

42 Abano bo bajinga baana ba kwa Danyi+ monka mwayijile bisemi byabo: Shuhama, mwafumine kisemi kya bena Shuhama. Abino byo byajinga bisemi bya bena Danyi monka mwayijile bisemi byabo. 43 Bisemi byonse bya bena Shuhama, ne bantu babo bo banembele bajinga 64,400.+

44 Baana ba kwa Ashela+ monka mwayijile bisemi byabo bajinga: Imina, mwafumine kisemi kya bena Imina; Ishivi, mwafumine kisemi kya bena Ishivi; Beliya, mwafumine kisemi kya bena Beliya; 45 baana ba kwa Beliya bajinga: Hebela, mwafumine kisemi kya bena Hebela, ne Malakyela, mwafumine kisemi kya bena Malakyela. 46 Jizhina ja mwana wa mukazhi wa kwa Ashela wajinga Sela. 47 Abino byo bisemi bya baana ba kwa Ashela, ne bantu babo bo banembele bajinga 53,400.+

48 Baana ba kwa Nafitali+ monka mwayijile bisemi byabo bajinga: Yazela, mwafumine kisemi kya bena Yazela; Guni, mwafumine kisemi kya bena Guni; 49 Yezela, mwafumine kisemi kya bena Yezela, ne Shilema, mwafumine kisemi kya bena Shilema. 50 Abino byo byajinga bisemi bya bena Nafitali monka mwayijile bisemi byabo, ne bantu babo bo banembele bajinga 45,400.+

51 Bena Isalela bonse bo banembele: bajinga 601,730.+

52 Byo bapwishishe kuba bino, Yehoba waambijile Mosesa amba: 53 “Kyalo ukekyabanye ku bano bantu kwikala buswanyi bwabo monka mwayila mutanchi wa mazhina.*+ 54 Mabumba aji na bantu bavula ukeape kya buswanyi kikatampe, kabiji mabumba aji na bantu bacheche ukeape kya buswanyi kicheche.+ Jibumba jimo jimo ukejipe kya buswanyi kwesakana na kuvula kwa bantu bo banemba. 55 Nangwa byonkabyo, pa kwabanya kyalo bakate bubale.+ Kabiji bakatambule kya buswanyi kyabo monka mwayila mazhina a mikoka ya bashakulu babo. 56 Kya buswanyi kimo kimo pa kwikipana bakate bubale ne kwabanya monka mwayila kubaya nangwa kukepa kwa mabumba a bantu.”

57 Abano bo bena Levi+ bo banembele monka mwayijile bisemi byabo: Geleshona, mwafumine kisemi kya bena Geleshona; Kohati,+ mwafumine kisemi kya bena Kohati, ne Melali, mwafumine kisemi kya bena Melali. 58 Abino byo byajinga bisemi bya bena Levi: kisemi kya bena Libinyi,+ kisemi kya bena Hebulona,+ kisemi kya bena Mali,+ kisemi kya bena Mushi+ ne kisemi kya bena Kola.+

Kohati wasemene Amulamu.+ 59 Jizhina ja muka Amulamu, wajinga Yokebeda,+ mwana wa kwa Levi ye asemejile mu Ijipita. Kabiji Yokebeda wasemene kwi Amulamu, Alona, Mosesa ne Milyama nyenga yabo.+ 60 Kabiji Alona wasemene Nadaba, Abihu, Eleaza ne Itamala.+ 61 Bino Nadaba ne Abihu bafwile na mambo a kuleta kwi Yehoba mujilo ye babujile kwibaswisha.+

62 Baana bonse kutendekela pa baji na ñondo umo kuya peulu bo banembele bajinga 23,000.+ Kechi bebanembejile pamo na bena Isalela ne,+ mambo kechi bafwainwe kwibapapo kya buswanyi mukachi ka bena Isalela ne.+

63 Abano bo bantu bo banembele kwi Mosesa ne Eleaza ñanga kimye kyo banembele bena Isalela mu biselebwa bya Moabu byajinga ku Yodano kwipi na Yeliko. 64 Pa bano bantu bo banembele kechi pajingapo boba bo banembele kwi Mosesa ne Alona ñanga, kimye bena Isalela kyo bebabajile mu kiselebwa kya Sinai ne.+ 65 Mambo Yehoba waambile pe abo amba: “Bakafwila mu kyonka kino kiselebwa.”+ Byonkabyo, kafwako muntu nangwa umo washajilepo pe abo ne, pashajiletu Kaleba mwana wa kwa Yefune ne Yoshua mwana wa kwa Nuni.+