Kwi Titusa
2 Pakuba obewa wambenga bintu monka mwayila lufunjisho lwawama.*+ 2 Banabalume bakulumpe bekale na byubilo byawama, bashiñama, balanguluka bulongo, bakosa mu lwitabilo, mu butemwe ne kuchinchika. 3 Kabiji banabakazhi bakulumpe nabo bekale na mushingi, kechi baluntepentepe ne, kechi banonkwa buzha ku binyu ne, bafunjishi ba byawama, 4 kuba’mba bafunde* bansongwakazhi kutemwa bamwatawabo, kutemwa baana babo, 5 kulanguluka bulongo, kwilama bulongo, kwingila ku mazubo* abo, kwikala bawama, ne kunekenena bamwatawabo+ pa kuba’mba mambo a Lesa abule kunenwa bibi.
6 Kabiji bansongwalume nabo saka wibafunjisha kwikala na milanguluko yawama,+ 7 mu bintu byonse wikale wa kumwenako mu mingilo yawama. Saka ufunjisha bintu byawama* na kuteshako muchima yense,+ 8 kwingijisha ñambilo yawama* ibula kulengululwa,+ pa kuba’mba aba balengulula bakomvwe bumvu ne kubula kwikala na kintu nangwa kimo kyatama kya kwitunenenapo.+ 9 Bakalume banekenenenga bankambo yabo mu bintu byonse+ ne kweseka kwibatokesha ku muchima, kechi kwibalengulula ne, 10 kechi kwibebila ne,+ bino bamweshe bukishinka bwa kine, pa kuba’mba mu bintu byonse balengele lufunjisho lwa Mupulushi wetu aye Lesa, kutotwa.+
11 Mambo lusa lukatampe lwa Lesa lwamweka kabiji lwaleta lupulukilo ku bantu bonse.+ 12 Lwitufunjisha kukana byubilo bya bumbulwa kwakamwa Lesa ne bya kusakasaka bya pano pa ntanda+ kabiji lwitulengela kulanguluka bulongo, ne kwikala baoloka ne kumwesha munema wa kunemeka Lesa mu buno bwikalo,*+ 13 byo tubena kutengela alwa luketekelo lwa lusekelo+ ne kumweka kwa lukumo lwa Lesa wa bulume ne kwa Mupulushi wetu aye Yesu Kilishitu. 14 Aye wipaine mwine na mambo a atweba+ kuba’mba etukasulule*+ ku bubi bonse ne kwitokeshesha mwine bantu baikala kya bunonshi kyanji, ba mukoyo mu kwingila mingilo yawama.+
15 Saka wamba bino bintu ne kufunjisha* ne kukajipila na luusa lonse.+ Kange uleke muntu nangwa umo akulengulule ne.