Ezikyo

44 Wambwezhezhe jibiji ku kibelo kya pangye ya nzubo ya Lesa kyajinga ku musela,+ kabiji kibelo kyajinga kya kushinka.+ 2 Kepo Yehoba añambijile’mba: “Kino kibelo kikekalangatu kya kushinka. Kechi bakekishinkulapo ne, kabiji kafwako muntu nangwa umo ukatwelelako ne; mambo Yehoba, Lesa wa Isalela watwelela konka,+ onkao mambo, kino kibelo kikekalangatu kya kushinka. 3 Nangwa byonkabyo, kinemanga ukekala monka na kuja kajo ku meso a Yehoba,+ mambo aye ye kinemanga. Ukatwelela ku kibelo kiji ku kibamba kya pa kibelo kyatala ku kibelo ne kulupukila konka.”+

4 Ponkapo wandupwijile ku kibelo kyajinga ku kabeta ka ku bulenge ne kuntwala kulutwe ya nzubo ya Lesa. Byo nakenkentele, namwene’mba lukumo lwa Yehoba lwakumbana nzubo ya Yehoba.+ Onkao mambo, naponene panshi kinkuvumene.+ 5 Kepo Yehoba añambijile’mba: “Obewa mwana muntu, teshako muchima,* umone ne kutelekesha bulongo bintu byonse byo nsakukubuula pa mambo a malamuna ne mizhilo ya pa nzubo ya Yehoba. Utesheko bingi muchima kutala ku kibelo kya nzubo ya Lesa kwa kutwelela ne ku bibelo byonse bya kulupukilako.+ 6 Wafwainwa kubuula kisaka kya Isalela kya milengulwila amba, ‘Nkambo Mfumu Yehoba waamba’mba: “Anweba kisaka kya Isalela, mwakizhamo kuba bintu byatama. 7 Bantu bafuma ku byalo bingi babula kuya ku mukanda wa ku muchima ne babula kuya ku mukanda bo mutwezha mu nzubo yami, bazhilulula nzubo yami. Anweba mulambula kajo kami, mafuta ne mashi saka muzhilulula lulayañano lwami na mambo a bintu byonse bya bunya byo muba. 8 Kechi mwalama bulongo bintu byami byazhila ne.+ Pakuba anweba mupa bantu bangi mingilo ya mu nzubo yami.”’

9 “‘Nkambo Mfumu Yehoba waamba’mba: “Kafwako muntu ungi wikala mu bena Isalela wabula kuya ku mukanda wa ku muchima ne wabula kuya ku mukanda ukatwela mu nzubo yami ne.”’

10 “‘Bino bena Levi bansatukijile+ kimye bena Isalela kyo bangalukijilemo ne kongolokela ku bankishi* babo ba bunya, nkebakambula na mambo a bubi bwabo. 11 Kabiji bakekala ke ba mingilo ba kulama bibelo bya ku nzubo ya Lesa+ ne kwingijila ponka pa nzubo ya Lesa. Bakepayilangako bantu banyama ba milambo ya kusoka ne kutapisha bitapisho, kabiji bakekala ke bakwingijila bantu. 12 Na mambo a kuba baingijilenga bantu ku meso a bankishi babo ba bunya ne kwikala kya kwituntulako kyalengejile bena Isalela kulenga mambo,+ o ene mambo o nebatanyikila kuboko kwami na luchipo, kabiji nkebakambula na mambo a bubi bwabo,’ byo byaamba Nkambo Mfumu Yehoba. 13 Kechi bakeya kwi amiwa na kuñingijila mwingilo wa buñanga nangwa kukwata ku bintu byami byazhila nangwa bintu byonse byazhijisha ne, kabiji kikebalenga bingi bumvu na mambo a bintu bya bunya byo baubile. 14 Nangwa byonkabyo, nkebapa mwingilo wa bukalama bwa pa nzubo ya Lesa ne kwingila mingilo ijimo, ne bintu byonse byo bafwainwa kwingila monka.’+

15 “Nkambo Mfumu Yehoba waamba’mba, ‘Bañanga bena Levi ba mu kisemi kya kwa Zadoki+ baingijilenga mingilo mu nzubo yami kimye bena Isalela kyo bangalukijilemo,+ bakeya kwi amiwa na kuñingijila kabiji bakemana kwi amiwa na kulambula mafuta+ ne mashi.+ 16 Abano bo bakatwela mu nzubo yami ne kwiya na kuñingijila ku tebulu wami,+ kabiji bakengilanga mingilo yami yo nkebapa.+

17 “‘Byo bakatwela mu bibelo bya mu kipango kya mukachi, bafwainwa kuvwala bivwalo bya linenyi.+ Kechi bafwainwa kuvwala bivwalo bya boya bwa mikooko pa kwingijila mu bibelo bya ku kipango kya mukachi nangwa mukachi kakyo ne. 18 Bafwainwa kupombakanya bisapi bya linenyi ku mitwe kabiji bafwainwa kuvwala tuputula twalepa twa kisapi kya linenyi.+ Kechi bafwainwa kuvwala bivwalo bikebalengelanga kusulwila ne. 19 Saka bakyangye kulupukila mu kipango kya pangye, ko kuba’mba mu kipango mwaikala bantu, bafwainwa kuvuula bivwalo byabo bya kwingijilamo+ ne kwibitula mu bibamba byazhila* bya kujiilamo.+ Umvwe bapwisha, bafwainwa kuvwala bivwalo bikwabo kuchina’mba bakazhijika bantu na bivwalo byabo. 20 Kechi bafwainwa kutenda mitwe yabo+ nangwa kwikala na nsuki yalepa ne. Bafwainwa kukepesha bulongo nsuki ya ku mitwe yabo. 21 Bañanga kechi bafwainwa kutoma binyu pa kutwela mu kipango kya mukachi ne.+ 22 Kabiji kechi bafwainwa kusongola mwanamukazhi wafwilwa nangwa ye bakana ne;+ pakuba abo bafwainwa kusongola kisungu wa mu kisaka kya Isalela nangwa mwanamukazhi wafwilwa wajinga muka ñanga.’+

23 “‘Bafwainwa kufunjisha bantu bami kuyuka mwapusena bintu byazhila ne byabula kuzhila; kabiji bakebafunjisha mwapusena bintu byatama ne byawama.+ 24 Bafwainwa kwikala bamitonyi ba kuchiba mambo;+ bafwainwa kuchibila mambo monka mwayila mizhilo yami.+ Bafwainwa kulama mizhilo ne malamuna ami aamba pa bijiilo byami byonse+ kabiji bafwainwa ne kuzhijika masabado ami. 25 Kechi bafwainwa kufwenya kwipi na mubiji wa muntu wafwa ne, inge bauba kino bakezhilulula. Nangwa byonkabyo, bakezhilululatu inge awo mubiji wa bashabo, bainabo, mwanabo wa mulume, mwanabo wa mukazhi, kolojabo nangwa nyenga yabo wabula kusongolwa.+ 26 Ñanga inge bamutokesha, bafwainwa kumubajila moba atanu na abiji pa kuba’mba atendeke kwingila mingilo. 27 Pa juba jo akatwela mu mpunzha yazhila na kwingijilamo, ko kuba’mba mu kipango kya mukachi, akalambule mulambo wa bubi,’+ byo byaamba Nkambo Mfumu Yehoba.

28 “‘Kino kyo kikekala kya buswanyi kyabo:+ Amiwa yami kya buswanyi kyabo. Kechi mwafwainwa kwibapa bya bunonshi bya mu Isalela ne, mambo amiwa yami kya bunonshi kyabo. 29 Abo bakaja mulambo wa kajo,+ mulambo wa bubi ne mulambo wa mambo,+ kabiji kintu kyonse kyo bakapananga mu Isalela kikekala ke kyabo.+ 30 Kajo katanshi konse kawama ne bya bupe byenu byonse byo mukapananga, bikekalanga bya bañanga.+ Kabiji mwafwainwa kupana ne bunga bwa nkapankapa bwa kajo kenu ka nsomo ku bañanga.+ Kino kikalengela ba mu bisemi byenu kwikala na bibusa.+ 31 Bañanga kechi bafwainwa kuja ñonyi nangwa nyama wifwila nangwa ye bantabaula ne.’+