Yoba
9 Yoba wakumbwile’mba:
2 “Pano po po nayuka namba kino kya kine.
Bino umvwe muntu ufwa uji na mambo ne Lesa, wakonsha kubinga byepi?+
3 Umvwe muntu wakeba kwipachika nanji,*+
Awo muntu kechi wakonsha kukumbulapotu nangwa bumo pa biumbi bya mepuzho anji ne.
4 Aye uji na muchima wa maana ne bulume bukatampe.+
Ñanyi wakonsha kulwa nanji, ne byatama byabula kumumwekela?+
5 Aye utuntulula* mitumba kwa kubula muntu nangwa umo kuyuka;
Wiifulamika na bukaji bwanji.
6 Aye usunkenya ntanda po yaikala,
Kya kuba ne mashiki ayo asunkena.+
7 Aye ukambizha juba kuleka kusama
Ne kuvweta pa kyeya kya tubangabanga;+
8 Utanyika jiulu bunke bwanji,+
Ne kwenda peulu ya manyaki akatampe a pa kalunga ka mema.+
9 Walengele mwala wanshansha utelwa’mba Asha,* ne Kesilu* ne Kima,*+
Ne mwala wanshansha uji mwiulu* ku kabeta ka ku bulenge;
10 Aye uba bintu bikatampe ne bya kubula kukonsha kuyuka,+
Bintu bya kukumya bya kukankalwa kubala.+
11 Aye wakonsha kupita po nji, kabiji kechi nakonsha kumumona ne;
Wakonsha kumpitaila, bino kechi nakonsha kumuyuka ne.
12 Umvwe wavutula kintu, ñanyi wakonsha kumukanya?
Ñanyi wakonsha kumwambila’mba, ‘Ki ka kyo mubena kuba?’+
14 Kikakilamo umvwe namukumbula
Nafwainwa kusala byambo byawama pa kwamba nanji!
15 Nangwa kechi natamisha ne, kechi nakonsha kumukumbula ne.+
Nakonshatu kumusashijila aye mutonyi wami* kuba’mba angubile lusa.
16 Umvwe namwita, nanchi wakonsha kungitaba nyi?
Kechi naketekela’mba wakonsha kumvwa jiwi jami ne,
17 Mambo aye wampuma na bya malwa
Kabiji walengela bilonda byami kuvula pa kubula mambo.+
18 Aye kechi wanswisha kuba’mba mpemenweko ne;
Watwajijilatu na kundetela bintu byatama.
19 Inge paji uji na bulume, aye ye wakosa.+
Inge paji uchiba mambo mo aolokela, aye waamba’mba: ‘Ñanyi wakonsha kuntotolwesha?’*
20 Umvwe mambo mfwao, kanwa kami kasakunzhachisha;
Nangwatu inge nalama bulumbuluke bwami,* aye wakonsha kumfwisha nao.*
22 Kyo kimotu. O ene mambo o naambila namba,
‘Aye wonauna wabula mambo ne mubi pamo.’
23 Umvwe muyulo waipayañana kya kubazhimukilatu,
Aye wakonsha kuseka yewa wapelelwa wabula mambo.
Umvwe kechi iye uba kino ne, pano ñanyi wikyuba?
25 Moba a bumi bwami abena kunyema lubilo kukila binyema muluwe;+
Abena kunyema lubilo kwa kubula kumonapo byawama.
26 Enda nobe bwato bo balenga na mambanga,
Kabiji nobe mpungu byo asuumukila pa kintu kyo akeba kukwata.
27 Umvwe naamba’mba, ‘Kechi nkavuluka kwijizhanya kwami ne,
Kilungi kyami kikaluka ne kwikala na lusekelo,’
28 Nkachina na mambo a misongo yami yonse,+
Kabiji nayuka namba kechi mwakonsha kumbingisha ne.
29 Mukantaana na mambo.*
Pano mambo ka o nsakwikatezhanga kyatutu?+
30 Umvwe naowa mu mema achimba abena kusunguluka,
Kabiji natokesha maboko ami mu nambwa,*+
31 Anweba mwakonsha kuntwezha mu kimbo,
Kya kuba ne bivwalo byami byankana.
32 Mambo aye kechi muntu nobe amiwa kya kuba’mba namukumbula,
Ne kuya nanji ku kije ne.+