Yoba
32 Onkao mambo, bano banabalume basatu balekele kumwambila Yoba, mambo mwine washiinwe’mba waoloka.*+ 2 Bino Elihu mwana wa kwa Balakela mwina Buza+ wa mu kisemi kya kwa Lama wazhingijile bingi. Wamuzhingijile bingi Yoba mambo wimwenenga amba waoloka kukila Lesa.+ 3 Kabiji wazhingijile balunda basatu ba kwa Yoba mambo kechi bamwambijilenga byambo byawama ne, bino baambile’mba Lesa watama.+ 4 Elihu wapembelejile kumwambila Yoba, mambo abo bajinga bakulumpe pe aye.+ 5 Elihu byo amwene’mba aba banabalume basatu kechi bajinga na bya kwamba byawama ne, wazhingijile bingi. 6 Onkao mambo, Elihu mwana wa kwa Balakela mwina Buza watatwile kwamba’mba:
Onkao mambo, nemunemekele ne kuzhindamatu,+
Kabiji nachiine kwimubuula bintu byo nayuka.
7 Nalangulukile namba, ‘Baji na moba avula bambe,
Ne baji na myaka yavula babulañane maana.’
8 Bino mupashi wazhila uji mu bantu,
Muya wa wa Bulume Bonse, ye wibapa milangwe.+
9 Kukoma* kechi ko kulengela muntu kwikala na maana ne,
Kabiji bakote kechi bo bonkatu bayuka bintu byaoloka ne.+
10 Onkao mambo, naamba namba, ‘Ntelekai,
Ne amiwa nsakwimubuula bintu byo nayuka.’
11 Umvwai! Napembelejilenga byambo byenu;
Natelekelenga byo mwisambilenga+
Byo mwakebelenga byambo bya kwamba.+
12 Nemutelekeshe bingi,
Bino kafwako nangwa umo wamushinawina* Yoba
Nangwa kukumbula bulongo byambo byanji ne.
13 Onkao mambo, kange mwambe’mba, ‘Twataana maana ne;
Lesa ye wamukana, kechi muntu ne.’
14 Kechi waambijilenga amiwa ne,
Onkao mambo, kechi nsakumukumbula mwayila byambo byenu ne.
15 Bakankamanatu, kechi baji na mwa kumukumbwila ne;
Kechi bajinga na bya kwamba ne.
16 Napembelela, bino abo kechi batwajijila kwamba ne;
Baimanatu nzoo konkakwa, kwa kubula mukumbu.
17 Onkao mambo, ne amiwa nsakwamba;
Nsakwamba bintu byo nayuka,
18 Mambo nji na byambo byavula bingi;
Mupashi wazhila uji mwi amiwa ye wandengela’mba ñambe.
19 Muchima wami uji nobe binyu byabula pa kupemena,
Nobe mafukuta a biseba a katataka a binyu ajitu pepi kusabika.+
20 Ndekai ñambe pa kuba’mba mpemenwe!
Nsakwasamika kanwa kami ne kukumbulapo.