Ezikyo
12 Yehoba wañambijile jikwabo amba: 2 “Obewa mwana muntu, ubena kwikala mu bantu basatuka. Baji na meso, pano bino kechi bamona ne, kabiji baji na matwi, bino kechi bomvwa ne,+ mambo ke bantu basatuka.+ 3 Obewa mwana muntu, longa bipe bya kusenda mu buzha. Pa kuya, ukaye mute saka bakutala. Byo ukafumanga mu nzubo yobe kuya mu buzha ku mpunzha ikwabo, ukayenga saka bakutala. Kampe bakayuka kino mo kyatala nangwa kya kuba abo bo bansatuki. 4 Lupula bipe byobe byo walonga bya kusenda mu buzha mute saka bakutala. Kabiji mabanga wimane lwendo nobe muntu ye babena kutwala mu buzha saka bakutala.+
5 “Usabe kipenze pa lubumbulu wa nzubo yobe ne kulupwilapo bipe byobe saka bakutala.+ 6 Ubike bipe byobe pa kipuzhi ne kulupuka nabyo saka pakifita saka bakutala. Uzhike pa meso kuba’mba ubulenga kumona panshi, mambo amiwa mbena kukwalula kwikala kayukilo ku bena Isalela.”+
7 Naubijile monka mo bankambizhizhe. Nalupwile bipe byami bya kusenda mu buzha mute, kabiji mabanga nasabile kipenze pa lubumbulu na kuboko. Byo pafichile nalupwile bipe byami ne kwibisenda pa kipuzhi ne abo saka batalako.
8 Lukelo Yehoba wañambijile jibiji amba: 9 “Obewa mwana muntu, nanchi bansatuki bena Isalela kechi bakwipuzhapo amba, ‘Ubena kuba ka nenyi?’ 10 Wibabuule’mba, ‘Nkambo Mfumu Yehoba waamba’mba: “Bino byambo bibena kwamba pa kinemanga+ wa mu Yelusalema ne bena Isalela bonse bekala mu muzhi.”’
11 “Wibambile’mba, ‘Yami kayukilo kenu.+ Byonkatu byo nauba, byo byo bakeboba ne abo. Bakebatwala mu buzha mu kyalo kingi.+ 12 Kinemanga wikala nabo ukasenda bipe byanji pa kipuzhi ne kuya saka pakifita. Aye ukasaba kipenze pa lubumbulu ne kulupwilapo bipe byanji.+ Ukazhika pa meso kuba’mba akabulenga kumona panshi.’ 13 Nkamuta bukonde ne aye ukafwamo.+ Kepo nkamutwala ku Babilona, kyalo kya bena Kalodeya, pano bino, aye kechi ukekimona ne; kabiji ukafwila monka.+ 14 Kabiji bantu bonse bo ajinga nabo bamukwashishenga ne bashilikale banji, nkebapalañenya konse konse;+ kabiji nkasomona mpoko ne kwibapangisha.+ 15 Byo nkebapalañenya mu bisaka bya bantu ne mu byalo bingi, po po bakayuka’mba, amiwa yami Yehoba. 16 Pano bino, nkapulushapo bantu bacheche ba mwi abo ku mpoko, ku kipowe kya nzala ne ku mwalo pa kuba’mba bakashimikizhenga byubilo byabo bya bunya ku bisaka bya bantu ko bakapalañena; kabiji po po bakayuka’mba amiwa yami Yehoba.”
17 Kabiji Yehoba wañambijile jibiji amba: 18 “Obewa mwana muntu, wafwainwa kuja kajo kobe saka uzakama ne kutoma mema na moyo ne na bijikila.+ 19 Ubuule bantu ba mu kyalo amba, ‘Nkambo Mfumu Yehoba waambila bangikazhi ba mu Yelusalema baji mu kyalo kya Isalela amba: “Bakaja kajo kabo na bijikila ne kutoma mema na moyo, mambo kyalo kyabo kikashalatu masala+ na mambo a bukapondo bwa bantu bonse bekalamo.+ 20 Mizhi yonse bakeyonauna, ne kyalo kikashalatu masala;+ kepo mukayuka’mba amiwa yami Yehoba.”’”+
21 Kabiji Yehoba wañambijile jikwabo amba: 22 “Obewa mwana muntu, akye kishimpi kyo babena kwamba mu Isalela kyatala mu ka, kya kuba’mba, ‘Moba apwa kala kabiji kafwako bimwesho bikamweka ne’?+ 23 Onkao mambo, wibabuule’mba, ‘Nkambo Mfumu Yehoba waamba’mba: “Nkalekesha ino ñambilo, ne kino kishimpi kechi bakekyambapo jibiji mu Isalela ne.”’ Pano bino, wibambile’mba, ‘Moba afwenya kala pepi,+ ne bimwesho byonse bikamweka.’ 24 Mambo kechi mukamwekapo jibiji kimwesho kya bubela nangwa kwaula kwa bubela* mu bena Isalela ne.+ 25 ‘Nkambo Mfumu Yehoba waamba’mba: “Amiwa Yehoba naamba namba, bintu byonse byo naamba bikafika kechi bikabanda ne.+ Nkafikizha byo naamba mu moba enu+ anweba bena Isalela bamilengulwila.”’
26 Yehoba wañambijile jibiji amba: 27 “Obewa mwana muntu, bantu* ba mu Isalela babena kwamba’mba, ‘Kimwesho kyo abena kumona kikamweka kulutwe, kabiji amba ubena kwaula bintu bikamweka kulutwe.’+ 28 Onkao mambo, wibabuule’mba, ‘Nkambo Mfumu Yehoba waamba’mba: “‘Kafwako byambo byami bikabula kufika ne; bintu byonse byo naamba bikamweka.’ Byo byaamba Nkambo Mfumu Yehoba.”’”