Ku Bena Loma
8 Onkao mambo, bonse baji mwi Kilishitu Yesu kechi bazhatwa ne. 2 Mambo muzhilo wa mupashi upana bumi kupichila mwi Kilishitu Yesu wimukasulula+ ku muzhilo wa bundengamambo ne wa lufu. 3 Akya kintu kyabujile kuba Mizhilo+ na mambo a kubula kukosa kwa mubiji,+ Lesa wikyubile kupichila mu kutuma Mwananji+ mu mubiji wa bantu bandengamambo+ kuba’mba afumyepo bundengamambo, onkao mambo, wazhachishe bundengamambo ku mubiji, 4 pa kuba’mba tufikizhe bikebewa byaoloka bya Mizhilo+ kupichila mu kubula kwenda mu buntunshi, poso mu mupashi.+ 5 Mambo aba benda mu buntunshi bata muchima ku bintu bya buntunshi,+ bino aba benda mu mupashi bata muchima ku bintu bya mupashi.+ 6 Mambo kuta muchima ku bintu bya buntunshi kuleta lufu,+ pakuba kuta muchima ku bintu bya mupashi kuleta bumi ne mutende;+ 7 mambo kuta muchima ku bintu bya buntunshi kulengela kwikala mulwanyi ne Lesa,+ mambo buntunshi kechi bunekenena mizhilo ya Lesa ne, kabiji kechi bwakonsha ne. 8 Onkao mambo, aba benda mu buntunshi kechi bakonsha kutokesha Lesa ku muchima ne.
9 Nangwa byonkabyo, anweba mwenda mu mupashi,+ kechi mu buntunshi ne, umvwe mupashi wa Lesa kine uji mwi anweba. Bino umvwe muntu kechi uji na mupashi wa Kilishitu ne, ko kuba’mba kechi ye wa kwa Kilishitu ne. 10 Bino umvwe Kilishitu uji mwi anweba,+ ko kuba’mba mubiji wafwa na mambo a bundengamambo, bino mupashi ye mumi na mambo a bololoke. 11 Pano inge mupashi wa yewa wasangwile Yesu mu bafu uji mwi anweba, yenkawa wasangwile Kilishitu Yesu+ mu bafu ukalengela ne mibiji yenu ifwa kwikala yumi+ kupichila mu mupashi wanji uji mwi anweba.
12 Onkao mambo, balongo bami kechi twi bazha ba buntunshi kuba’mba twendenga mu buntunshi ne;+ 13 umvwe saka mwenda mu buntunshi kine mukafwa; bino umvwe mwaipaya byubilo bya mubiji+ na mupashi, mukekala na bumi.+ 14 Mambo bonse bo batangijila ku mupashi wa Lesa, bo baana ba Lesa.+ 15 Mambo kechi mwatambwile mupashi wa buzha uleta moyo ne, bino mwatambwile mupashi wa kwimutongola kwikala baana, kabiji yenka uno mupashi witulengela kwamba’mba: “Abba,* Tata!”+ 16 Uno mupashi ushimuna pamo na mupashi wetu+ kuba’mba twi baana ba Lesa.+ 17 Umvwe twi baana, ko kuba’mba twi banswanyi—banswanyi ba Lesa, ba kuswana+ pamo na Kilishitu—inge twamanama nanji+ kuba’mba tukatumbijikilwe nanji pamo.+
18 Mambo nalanguluka namba lumanamo lwa pa kino kimye kechi lwaesakana pamo na lukumo lukasololwa mwi atweba ne.+ 19 Mambo bilengwa bibena kutengela na muchima yense kusololwa kwa baana ba Lesa.+ 20 Mambo bilengwa byonse bebyalwile ke byatu,+ kechi na kyaswa muchima wabyo bine ne, bino kupichila mu yewa wibyalwile kuba’mba bikale na luketekelo, 21 ne kuba’mba bilengwa bikapokololwe ku buzha+ bwa bubole ne kwikala na bwana bwa bene bwa lukumo lwa baana ba Lesa. 22 Mambo twayuka’mba, bilengwa byonse bibena kubinza ne kumvwa misongo kufikatu ne lelo. 23 Kechi kino kyonkatu ne, bino ne atweba nangwa kya kuba twatambwila bya nsomo, ko kuba’mba mupashi, tubena kubinza+ byo tubena kutengela na muchima yense kwitutongola kwikala baana,+ kwitukasulula ku mibiji yetu kupichila mu bukuzhi. 24 Mambo betupokolwele na mambo a luno luketekelo; bino luketekelo lumweka kechi lo luketekelo ne, mambo inge muntu wamona kintu kyo aketekela, abya utwajijila kwikiketekela nyi? 25 Bino umvwe twaketekela+ kintu kyo tubula kumona,+ twikipembelela na muchima yense saka twachinchika.+
26 Byonkabyo, mupashi naye witukwasha mu kubula kukosa kwetu;+ mambo lukatazho ke lwa kuba’mba kechi tuyuka kintu kyo twafwainwa kulomba kwesakana na byo tubena kukeba ne, bino mupashi witusashijilako na mibinzo yo tukankalwa kulumbulula. 27 Bino awa ukebakeba mu michima+ yonse, uyuka byaambiwa kupichila mu mupashi, mambo wibasashijilako bazhijikwa monka mwayila kyaswa muchima wa Lesa.
28 Twayuka’mba, Lesa ulengela mingilo yanji yonse kuyila mumo kuba’mba aba bamutemwa bamone byawama, bonkaba bo baita monka mwayila kyaswa muchima wanji;+ 29 mambo aba bo ayukile patanshi wibatongwejile jimo amba bakapashe Mwananji,+ pa kuba’mba ekale mubeji+ wa balongo bavula.+ 30 Kabiji aba bo atongwejile jimo+ bo bo aichile;+ ne boba bo aichile bo bo atelele’mba baoloka.+ Kabiji aba bo atelele’mba baoloka, bo bo atumbijikile.+
31 Pano tusakwamba’mba ka pa bino bintu? Umvwe Lesa uji ne atweba, ñanyi uketushinda?+ 32 Byo kiji kuba’mba kechi wakaine kupana Mwananji na mambo a atweba bonse ne,+ nanchi aye pamo na mwananji, kechi uketupa na muchima yense bintu bikwabo byonse nenyi? 33 Ñanyi ukashiina bo basala kwi Lesa?+ Lesa ye wibatela’mba baoloka.+ 34 Ñanyi wakonsha kwibazhachisha? Kilishitu Yesu ye wafwile, yenka ye basangwile, waikala ku kilujo kya Lesa,+ kabiji yenka witusashijilako.+
35 Ñanyi uketwabanya na butemwe bwa Kilishitu?+ Nanchi bya malwa nangwa bulanda nangwa kumanyikwa nangwa nzala nangwa bwamba nangwa kizumba nangwa mpoko nyi?+ 36 Byonka byo kyanembwa’mba: “Na mambo a anweba babena kwitwipaya juba jonse; tuji nobe mikooko yo bakeba kwipaya.”+ 37 Bino mu bino bintu byonse tubena kushinda+ kupichila mwi aye witutemenwe. 38 Mambo amiwa nashiinwa kuba’mba lufu nangwa bumi nangwa bamalaika nangwa makafulumende nangwa bintu bijipo luno nangwa bintu bikeya nangwa bintu biji na bulume,+ 39 nangwa bula bwa mwiulu nangwa bwa panshi nangwatu kilengwa kikwabo, kechi byakonsha kwitwabanya na butemwe bwa Lesa buji mwi Kilishitu Yesu Nkambo yetu ne.