Ezikyo
35 Kabiji Yehoba wañambijile jikwabo amba: 2 “Obewa mwana muntu, tala ku Seila+ kyalo kya mitumba ne kwaula bintu bikekimwekela.+ 3 Wikibuule’mba, ‘Nkambo Mfumu Yehoba waamba’mba: “Nakuzhingijila obewa Seila kyalo kya mitumba kabiji nkatanyika kuboko kwami pe obewa ne kukwalula ke masala.+ 4 Nkonauna mizhi yobe kabiji ukekala masalatu;+ po po ukayuka’mba amiwa yami Yehoba. 5 Mambo obewa wakanamine bingi,+ kabiji wapaine bena Isalela kuba’mba bebatape na mpoko byo bapichilenga mu bya malwa, kimye kyo bebakambwile japelako.”’+
6 “Onkao mambo, Nkambo Mfumu Yehoba waamba’mba, ‘Byonkatu byo nji na bumi, nkalengela bantu kukwipaya ne mashi obe akakushinkamana.+ Byo kiji kuba’mba washikilwe bantu bo waipayile, ko kuba’mba mashi abo akakunankama.+ 7 Amiwa nkalula Seila kyalo kya mitumba kushalatu masala,+ kabiji nkepaya muntu yense ukapitangamo ne yewa ukabwelangamo. 8 Nkakumbanya bantu bafwa pa mitumba yakyo; ne boba bo bakatapa na mpoko bakalaalazhama pa tutumbatumba tobe, mu bimpachiko byobe ne pa mikola yobe yonse. 9 Amiwa nkakuzhiya, ne mu mizhi yobe kechi mukekalapo muntu jibiji ne;+ kabiji po po ukayuka’mba amiwa yami Yehoba.’
10 “Mambo obewa waambile’mba, ‘Bino bisaka bya bantu bibiji ne byalo bibiji bikekala ke byami, kabiji bino byonse tukebitambula kwikala ke byetu’+ nangwa kya kuba Yehoba uji monka. 11 ‘Onkao mambo, byonkatu byo nji na bumi,’ byo byaamba Nkambo Mfumu Yehoba, ‘byonkatu byo wibazhingijile ne kwibobila kichima na mambo a kwibashikwa, ne amiwa nkakuba byonkabyo;+ kabiji byo nkakuzhachisha, bantu po po bakangyuka. 12 Kabiji ukayuka’mba amiwa Yehoba naumvwa bintu byonse byatama byo waambilenga pa mambo a mitumba ya Isalela amba, “Yashajiletu masala kabiji betupele amba twiyonaune.” 13 Kabiji waambilenga na bwitote pe amiwa ne kwamba bintu byavula byatama pe amiwa,+ byonse nebyumvwine.’
14 “Nkambo Mfumu Yehoba waamba’mba: ‘Ntanda yonse ikasekela byo nkakwalula ke masala. 15 Byonkatu byo wasangalele kimye kyo baonawine kya buswanyi kya bena Isalela, byo byo nkakuba ne obewa.+ Obewa Seila kyalo kya mitumba, ko kuba’mba bena Edomu bonse,+ ukashalatu masala, kabiji bantu bonse po po bakayuka’mba amiwa yami Yehoba.’”