Itanshi ya kwa Yoano
4 Balongo bami, kange mwitabilengatu byambo byonse byumvwanyika nobe byafuma kwi Lesa ne,+ bino saka mwibyeseka bino byambo byonse ne kumona kana byafuma kwi aye nangwa ne,+ mambo bangauzhi bavula ba bubela bapalañena pano pa ntanda.+
2 Abino byo byo mwakonsha kuyuka byambo byafuma kwi Lesa: Byambo byonse byamba pe Yesu Kilishitu amba waishile kwikala muntu, byo byafuma kwi Lesa.+ 3 Bino byambo byonse bibula kwamba pe Yesu, kechi byafuma kwi Lesa ne.+ Kabiji bino byo byambo bya kwa yewa ulengulula Kilishitu ye twaumvwine’mba ubena kwiya,+ kabiji wafika kala pano pa ntanda.+
4 Anweba baana mwi ba kwa Lesa, kabiji mwibashinda,+ mambo awa uji mwi anweba+ wakila yewa uji mu ba pano pa ntanda.+ 5 Abo bo ba pano pa ntanda;+ o ene mambo o bambila bintu bya pano pa ntanda kabiji ba pano pa ntanda nabo bebomvwa.+ 6 Atweba twi ba kwa Lesa. Yense wayuka Lesa ye witumvwa;+ yense wabula wa kwa Lesa kechi witumvwa ne.+ Monka muno mo mo tuyukila byambo bya kine byafuma kwi Lesa ne byambo bya bubela byabula kufuma kwi Lesa.+
7 Anweba batemwe, twitemwenga atwe bene na bene,+ mambo butemwe bwafuma kwi Lesa, kabiji yense utemwañana ye wasemwa kwi Lesa kabiji ye wayuka Lesa.+ 8 Pakuba yense ubula kutemwañana kechi wamuyuka Lesa ne, mambo Lesa butemwe.+ 9 Monka muno mo mwamwekela butemwe bwa Lesa kwi atweba, kuba’mba Lesa watumine Mwananji yenkawa umotu+ pano pa ntanda pa kuba’mba tukekale na bumi kupichila mwi aye.+ 10 Buno butemwe kechi bulumbulula’mba atweba yetu twamutemenwe Lesa ne, bino aye ye witutemenwe ne kutuma Mwananji kwikala kitapisho* kya mambo etu+ kuba’mba tupwane ne Lesa.+
11 Anweba batemwe, umvwe Lesa witutemenwe byonka bino, ne atweba twafwainwa kwitemwa atwe bene na bene.+ 12 Kafwako muntu nangwa umo wakimonapo kala Lesa ne.+ Umvwe saka twitemwa atwe bene na bene, Lesa wikala mwi atweba ne butemwe bwanji bulumbulukila mwi atweba.+ 13 Muno mo mo tuyukila’mba tuji mwi aye ne aye mwi atweba, mambo witupa mupashi wanji. 14 Kabiji atweba twimwena na meso ne kushimuna’mba, Tata watumine Mwananji kwikala Mupulushi wa ba pano pa ntanda.+ 15 Yense witabila’mba Yesu Kilishitu ye Mwana Lesa,+ Lesa wikala mu yewo muntu ne aye wikala mwi Lesa.+ 16 Kabiji twayuka ne kwitaba abwa butemwe Lesa bo etutemwa.+
Lesa butemwe,+ awa wikala mu butemwe ye wikala wa kwa Lesa ne Lesa wikala mu yewo muntu.+ 17 Monka muno, butemwe mo mo bwalumbulukila mwi atweba, kuba’mba tukakasuluke pa kwamba+ mu juba ja kije, mambo byonkatu biji yewa, ne atweba byo byo tuji pano pa ntanda. 18 Butemwe kechi buba moyo ne,+ bino butemwe bwalumbuluka bupwisha moyo, mambo moyo witulengela kubula kukasuluka. Kine awa uba moyo kechi walumbuluka mu butemwe ne.+ 19 Atweba tutemwañana, mambo aye ye wajinga mutanshi kwitutemwa.+
20 Umvwe muntu waamba’mba, “Amiwa natemwa Lesa,” bino saka ashikwa mulongo wanji, ye wa bubela.+ Mambo awa wabula kutemwa mulongo wanji+ ye amona na meso, kechi wakonsha kutemwa Lesa ye abula kumona ne.+ 21 Kabiji tuji na uno mukambizho wafuma kwi aye wa kuba’mba, yense watemwa Lesa wafwainwa ne kutemwa mulongo wanji.+