Byubilo bya Batumwa
26 Agilipa+ wamubuujile Paulo amba: “Pano wakonsha kwiambila obe mwine.” Kepo Paulo atanyikile kuboko kwanji ne kutendeka kwiambila mwine amba:
2 “Anweba Mfumu Agilipa, natemwa bingi kuba’mba lelo jino mbena kwiambila mambo ami kwi anweba pa mambo a bintu byonse Bayudea + byo babena kumpelapo mambo, 3 kikatakata byo mwayukisha bulongo bisho byonse bya Bayudea ne mapata abo. Onkao mambo, nalomba namba muntekenye kuba’mba muñumvwe.
4 “Bwikalo bwami bo naikala kufumatu ku bwanyike na balongo* bami ne mu Yelusalema bwayukanyikwa ku Bayudea bonse+ 5 bonka bangyukile kala, inge bakeba bakonsha kwimubuula’mba amiwa najinga mu bupopweshi bwetu bwakilamo kulama mizhilo,+ najinga Mufaliseo.+ 6 Bino mbena kuchibilwa mambo na mambo a kuketekela mulaye Lesa ye alayile bashakulu betu;+ 7 uno ye mulaye muntutu umo mikoka yetu 12 o ibena kutengela kufika kupichila mu kwingila na mukoyo mwingilo wazhila bufuku ne mute. Anweba Mfumu, luno luketekelo Bayudea lo lo babena kumpelapo mambo.+
8 “Mambo ka anweba bantu o mubujila kwitabila’mba Lesa usangula bafwa? 9 Ne amiwa nalangulukilenga’mba nafwainwa kuba bintu byavula bya kulengulula jizhina ja Yesu mwina Nazala. 10 Kino kyo kyo naubilenga mu Yelusalema, ne kutaya bazhijikwa bavula mu tuleya,+ byo natambwile luusa ku bañanga bakatampe;+ kabiji pa kwibepaya, ne amiwa naitabizhenga. 11 Byo nebakabishanga javula mu mashinagoga, nebakanjikizhanga kusankilapo lwitabilo lwabo; kabiji byo nebazhingijile bingi, namanyikilenga ne ba mu mizhi ikwabo.
12 “Byo nayilenga na kwibamanyika ku Damasakasa na luusa lo bampele bañanga bakatampe ne kuntuma, 13 pa kushinkamana juba, anweba Mfumu, namwene kyeya kyafumine mwiulu kyakijile kusama kwa juba kyansamijile ne bo nayilenga nabo.+ 14 Byo twaponene bonse panshi, naumvwine jiwi saka jiñambila mu Kihebelu amba: ‘Saulo, Saulo, mambo ka o ubena kummanyikila?’ Mambo ubena kusobwela kulu pa mingele ne kwikozha obe mwine. 15 Bino amiwa naipwizhe’mba: ‘Nanchi yenu bañanyi, Nkambo?’ Nkambo wakumbwile’mba: ‘Amiwa yami Yesu ye ubena kumanyika. 16 Bino imana. Kino kyo kyo namwekela kwi obewa kuba’mba nkusale kwikala kalume kabiji kamonyi wa bintu byo wamona ne bintu byo nkakulengela kumona pa mambo a amiwa.+ 17 Kabiji nkakupokolola ku bano bantu ne ku bisaka bya bantu, ko mbena kukutuma+ 18 na kwibalabisha meso+ kuba’mba bafumemo mu mfishi+ ne kwiya ku kyeya+ ne kufumamo mu bulume bwa kwa Satana+ ne kwalulukila kwi Lesa, pa kuba’mba Lesa akebalekeleko mambo abo+ ne kutambula buswanyi mukachi ka boba bo bazhijika na mambo a kungitabila.’
19 “Onkao mambo, anweba Mfumu Agilipa, kechi nalengulwile kimwesho kya mwiulu ne, 20 bino nayile patanshi ku ba mu Damasakasa+ kepo ne ku ba mu Yelusalema,+ ne ku ba mu kyalo kyonse kya Yudea ne ku bisaka bya bantu, na kwibabuula kuba’mba bafwainwa kulapila ne kwalulukila kwi Lesa kupichila mu kwingila mingilo imwesha kulapila.+ 21 O ene mambo Bayudea o bankwachijile mu nzubo ya Lesa ne kukeba kungipaya.+ 22 Nangwa byonkabyo, na mambo a kuba natambula bukwasho kwi Lesa, natwajijila kufika ne lelo jino kushimuna mambo awama ku bacheche ne ku bakatampe, kwa kubula kwamba bintu bingi, kanatu byonka byaawile Bangauzhi ne byanembele Mosesa amba bikafika+— 23 bya kuba’mba Kilishitu ukamanama+ kabiji byo akekala mutanshi kusanguka mu bafu,+ ukasapwila mambo a kyeya ku bano bantu ne ku bisaka bya bantu.”+
24 Paulo byo akyambilenga bino bintu mu kwilamwina, Fesatusa wabijikile’mba: “Obewa Paulo usakukonya! Kufunda byavula kusakukulengela kukonya!” 25 Bino Paulo waambile’mba: “Anweba wa Buneme Fesatusa, amiwa kechi nakonya ne, bino mbena kwamba byambo bya bukine na milanguluko yalumbuluka. 26 Kabiji mfumu ye mbena kwambako saka nakasuluka wayukishatu bulongo bino bintu; amiwa nashiinwa’mba kafwako kintu nangwa kimo kya mu bibye kyo abula kuyuka ne, mambo kafwako kintu nangwa kimo kyaubiwe ku mbaji ne.+ 27 Anweba Mfumu Agilipa, nanchi mwaitabila Bangauzhi nyi? Nayuka namba mwaitabila.” 28 Bino Agilipa waambijile Paulo amba: “Mu kakimyetu kacheche usakungitabisha kwikala mwina Kilishitu.” 29 Ponkapo Paulo waambile’mba: “Mbena kulomba kwi Lesa kuba’mba nangwa mu kakimye kacheche nangwa mu kimye kyabaya, kechi anweba yenkatu ne, bino ne bonse bañumvwa lelo jino bakekale byonka byo nji, kufumyakotu ino minyololo.”
30 Kepo mfumu aimene, ne aye kitumbafumu ne Belenise ne banabalume bo baikele nabo. 31 Bino byo balupukilenga batendekele kwisamba mulwabo amba: “Uno muntu kafwako kintu kyo auba kya kumwipayilapo nangwa kya kumukashila minyololo ne.”+ 32 Agilipa waambijile Fesatusa amba: “Uno muntu inge kechi walombele’mba mambo anji atwalwe kwi Kesala ne, inge twamukasulula.”+