Masalamo

37 Kange uzhingile na mambo a bantu babi

Nangwa kubila kichima bangubabibi ne.+

 2 Bakooma bukiji nobe nsono+

Kabiji bakaleela nobe munyemvu.

 3 Ketekela mwi Yehoba ne kuba bintu byawama;+

Wikale pa ntanda* ne kubila bintu mu bukishinka.+

 4 Sangalela* mwi Yehoba,

Ne aye ukakupa bintu bikeba muchima wobe.

 5 Fikizha jishinda jobe kwi* Yehoba;+

Ketekela mwi aye, ne aye ukakukwasha.+

 6 Aye ukalengela bololoke bobe kusama nobe kyeya kya lukelo,

Ne bunchibamambo bobe bwaoloka bukekala nobe kushinkamana kwa juba.

 7 Uzhindame kwi Yehoba+

Kabiji umutengelenga saka watekanya.

Kange uzhingile na mambo a muntu

Uba bintu byatama byo afuukula ne.+

 8 Kange uzhingile nangwa kubuuka bukaji ne;+

Kange uzhingile ne kuba bintu byatama* ne.

 9 Mambo bantu babi bakebonauna,+

Bino aba baketekela mwi Yehoba bakaswana ntanda.+

10 Kwashalatu pacheche, babi kechi bakekalako ne;+

Ukatajisha po baikalanga,

Kabiji kechi bakekalapo ne.+

11 Pakuba bakimote bakaswana ntanda,+

Kabiji bakasangalelanga mu kuvula kwa mutende.+

12 Muntu mubi ulangulukila byatama muntu waoloka;+

Umushenkela ku meno.

13 Bino Yehoba ukamuseka,

Mambo wayuka’mba juba ja lufu lwanji jikafika.+

14 Babi basomona mapoko abo ne kuvwemuna* mata abo a mukanda

Kuba’mba baponeshe panshi wamanama ne muyanji,

Ne kwipaya boba baji mu jishinda jaoloka.

15 Bino mapoko abo akaasa michima yabo bene;+

Mata abo a mikanda akachimauka.

16 Bintu bicheche biji na muntu umo waoloka byawama

Kukila bintu byavula biji na bantu babi bavula.+

17 Mambo maboko a mubi akachimauka,

Bino Yehoba ukakwasha waoloka.

18 Yehoba wayuka bintu bipitamo* bantu babula kaneneno,

Kabiji buswanyi bwabo bukekala myaka ne myaka.+

19 Mu kimye kya bya malwa, kafwako ukebalengesha bumvu ne;

Mu kimye kya kipowe kya nzala bakekala na kajo kavula.

20 Pakuba babi bakavila;+

Balwanyi ba Yehoba bakonaika nobe munyemvu wawama;

Bakazhimañanatu nobe bwishi.

21 Muntu mubi ukongola kabiji kechi ubwezha ne,

Pakuba muntu waoloka upana* na muchima yense.+

22 Bantu bo bapesha kwi Lesa bakaswana ntanda,

Bino aba bo afinga bakafwa.+

23 Yehoba ubuula* muntu byo afwainwa kwenda+

Umvwe jishinda ja muntu jamutokela ku muchima.+

24 Nangwa kya kuba wituntula, kechi ukapona ne,+

Mambo Yehoba umukwata ku kuboko* kwanji.+

25 Najinga mwanyike pano luno nakota,

Bino kechi nakimonapo kala muntu waoloka bamulekelela,+

Nangwa baana banji saka bapitamo na kukeba kajo ne.+

26 Aye kimye kyonse ukongwesha na lusa,+

Ne baana banji bebapesha.

27 Leka kuba bintu byatama, ubenga byawama,+

Kabiji ukekala myaka ne myaka.

28 Mambo Yehoba watemwa bunchibamambo bwaoloka,

Kabiji kechi ukalekelela bantu banji ba kishinka ne.+

Kimye kyonse bakazhikijilwanga;+

Pakuba ba mu kisemi kya bantu babi bakafwa.+

29 Baoloka bakaswana ntanda,+

Kabiji bakekalangamo myaka ne myaka.+

30 Kanwa ka muntu waoloka kabulañana maana,*

Ne lujimi wanji wamba pa bunchibamambo bwaoloka.+

31 Mizhilo ya Lesa wanji iji mu muchima wanji;+

Maulu anji kechi aketuntula ne.+

32 Muntu mubi utajisha muntu waoloka,

Kukeba’mba amwipaye.

33 Bino Yehoba kechi ukamupana mu kuboko kwa mubi ne+

Nangwatu kumuzhachisha pa kumuchibila mambo ne.+

34 Ketekela mwi Yehoba ne kulondela jishinda janji,

Ne aye ukakutumbijika kuba’mba ukaswane ntanda.

35 Namwene mubi wakanama

Saka akoma nobe kichi kyafunkama kiji pa mushiji po kyamenejile.+

36 Bino ponkapotu wafwile kabiji kechi wamwekelepo jibiji ne;+

Natwajijile na kumukeba, bino kechi namutaaine ne.+

37 Tai muchima muntu wabula kaneneno,*

Ne kutalanga pa muntu waoloka,+

Mambo bwikalo bwanji bwa kulutwe bukekala bwa mutende.+

38 Bino bantu bonse ba mizhilulwila bakebonauna;

Babi bakebepaya.+

39 Yehoba+ ye upulusha bantu baoloka;

Aye ye nsakwa yabo mu kimye kya bya malwa.+

Ukebapokolola ku babi ne kwibapulusha,

Mambo bafyama mwi aye.+