Buku wa Bubiji wa Bamfumu
12 Mu mwaka wa butanu na bubiji wa bukalama bwa kwa Yehu,+ Yehoashi+ mo mo aikele mfumu, kabiji walamine mu Yelusalema myaka 40. Jizhina ja inanji wajinga Zibya wa ku Belesheba.+ 2 Yehoashi waubilenga byaoloka kwi Yehoba mu moba onse o bamufunjishenga kwi Yehoyada ñanga. 3 Nangwa byonkabyo, mapunzha atuntama+ kechi beonawine ne, kabiji bantu batapishenga ne kusoka bya kufutumuna pa mapunzha atuntama.
4 Yehoashi waambijile bañanga amba: “Mutambulenga mali onse o baleta ku nzubo ya Yehoba a mulambo wazhila,+ mali o bebatongwela pa muntu pa muntu,*+ ne mali o bapana kwesakana na mutengo wa muntu, ne mali onse apana muntu ku nzubo ya Yehoba na muchima wanji yense.+ 5 Bañanga bakeatambule ku bantu bonse babena kupana* ne kwiengijisha kuwamishishamo ino nzubo, ponse paonaika.”*+
6 Mu mwaka wa bu 23 wa bukalama bwa kwa Yehoashi, bañanga saka bakyangye kuwamisha nzubo ponse po yaonaikile.+ 7 Onkao mambo, Mfumu Yehoashi waichile Yehoyada+ ñanga ne bañanga bakwabo ne kwibambila’mba: “Mambo ka o mwabujila kuwamisha ino nzubo po yaonaika? Pano kilekai kutambula mali ku boba beapana kanatu inge mukeengijisha kuwamishishamo nzubo.”+ 8 Kabiji bañanga baswile ne kwikileka kutambula mali ku bantu kuba’mba bakabule kwikala na mwingilo wa kuwamisha nzubo.
9 Kepo Yehoyada ñanga ashikwile kilambwilo+ ne kusabapo jiso pa kizhiko ne kwikibika kwipi na kya kusokelapo bitapisho ku kilujo konka kwa kutwelela mu nzubo ya Yehoba. Kabiji bañanga balaminenga kibelo mo mo babikilenga mali onse o baletelenga ku nzubo ya Yehoba.+ 10 Inge bamona’mba mali avula mu kilambwilo, munembeshi wa mfumu ne ñanga mwine mukatampe baiyanga na kwiatolamo* ne kubala mali o baletanga ku nzubo ya Yehoba.+ 11 Mali o babajilenga beapananga ku boba bo batongwele kutangijila mwingilo wa ku nzubo ya Yehoba. Abo nabo beapananga ku bakalipentala ne ku bantungi baingijilenga ku nzubo ya Yehoba,+ 12 ne ku bantungi ba mabwe ne ku basongelenga mabwe. Kabiji bapotele bichi ne mabwe a kusonga a kuwamishisha nzubo ya Yehoba po yaonaikile, kabiji baingijishe mali ne ku bintu bikwabo byonse byo baingijishe pa kuwamisha ino nzubo.
13 Nangwa byonkabyo, kafwako mali o baletele ku nzubo ya Yehoba o baingijishe kulengelamo mashomeka a siliva, ne bya kuzhimyako mujilo, ne michiba, ne matolompita+ nangwa bipetu bya ngolode nangwa bya siliva bya ku nzubo ya Yehoba ne.+ 14 Beapainengatu ku boba baingijilenga, kabiji beengijishe kuwamishishamo nzubo ya Yehoba. 15 Aba banabalume bo bapele mali a kufweta ba mingilo, kechi bebakalakenyenga ne, mambo bajinga ba kishinka.+ 16 Nangwa byonkabyo, mali a milambo ya mambo ne mali a milambo ya bubi+ kechi bealetelenga ku nzubo ya Yehoba ne; ajinga a bañanga.+
17 Pa kyonkakya kimye Hazela+ mfumu wa Silya po po ayile na kulwa na muzhi wa Gata,+ kabiji wamushinjile, kepo afuukwilepo kuya na kulukuka* Yelusalema.+ 18 Ponkapo Yehoashi Mfumu wa Yuda washikwile milambo yazhila yonse yazhijikile bashakulu banji bamfumu ba mu Yuda ba Yehoshafwata, ne Yeholama ne Ahaziya, kabiji wabikilepo ne milambo yanji yazhila ne ngolode yonse yajinga mo balaminanga bya buneme mu nzubo ya Yehoba ne mu nzubo* ya mfumu, ne kwibituma kwi Hazela mfumu wa Silya.+ Onkao mambo, Hazela wafumineko ku Yelusalema.
19 Bintu bikwabo byapichilemo Yehoashi, byonse byo aubile, nanchi kechi byanembwa mu buku wa bintu byapichilengamo bamfumu ba mu Yuda nenyi? 20 Nangwa byonkabyo, bakalume banji bamwalukijilemo+ kabiji Yehoashi bamutapijile ku nsakwa yakosa ya pa Kituntaulo,*+ ku jishinda jaya ku Shila. 21 Bakalume banji abo ba Yozaka mwana wa kwa Shimeata ne Yehozabada mwana wa kwa Shomela bo bamwipayile.+ Bamuzhiikile ko bazhiikile bashakulu banji mu Muzhi wa Davida, kabiji mwananji aye Amaziya waswaine pa bufumu.+