Yelemiya

36 Mu mwaka wa buna wa bukalama bwa mfumu wa Yuda aye Yehoyakimu+ mwana wa kwa Yosiya, Yehoba waambijile Yelemiya amba: 2 “Tola muvungilo* unembemo byambo byonse byo nakubuula pa bena Isalela, pa bena Yuda+ ne bisaka byonse bya bantu,+ kufumatu kimye kitanshi kyo nesambile ne obewa mu moba a kwa Yosiya kufika ne lelo jino.+ 3 Kampe bena Yuda byo bakomvwa bya malwa byonse byo mbena kukeba kwibaletela, bakalapila ne kuleka byubilo byabo byatama, kya kuba ne amiwa nkebalekelako bubi bwabo ne mambo abo.”+

4 Ponkapo Yelemiya waichile Baluka+ mwana wa kwa Neliya, kabiji Yelemiya waambile byambo byonse Yehoba byo amubuujile, ne Baluka wibinembele mu muvungilo.*+ 5 Kepo Yelemiya abuujile Baluka amba: “Amiwa bankasa kabiji kechi nakonsha kuya ku nzubo ya Yehoba ne. 6 Onkao mambo, obewa yobe wafwainwa kutwela ne kutanga na jiwi ja peulu byambo bya Yehoba biji mu muvungilo byonka byo nakubuujile kunemba. Ukebitange ku bantu pa nzubo ya Yehoba saka bomvwa pa juba ja kuzhikilwa na nzala; kabiji ukebitange ne ku bena Yuda bonse beya kufuma mu mizhi yabo. 7 Apo kampe Yehoba ukomvwa milombelo yabo ya kulomba bukwasho, kabiji bonse pa muntu pa muntu kampe bakaleka mashinda abo atama, mambo Yehoba wibazhingijila bingi bano bantu.”

8 Onkao mambo, Baluka mwana wa kwa Neliya waubile byonse byamukambizhe ngauzhi Yelemiya; watangile byambo bya Yehoba byajinga mu muvungilo* na jiwi ja peulu pa nzubo ya Yehoba.+

9 Kabiji mu mwaka wa butanu wa bukalama bwa mfumu wa bena Yuda aye Yehoyakimu+ mwana wa kwa Yosiya, mu ñondo wa butanu na buna, bantu bonse ba mu Yelusalema ne bantu bonse baishile mu Yelusalema kufuma mu mizhi ya Yuda, batayile mbila ya kuba’mba bazhikilwe na nzala kwi Yehoba.+ 10 Baluka watangile byambo byamubuujile Yelemiya byajinga mu muvungilo* na jiwi ja peulu pa nzubo ya Yehoba, mu kibamba* kya kwa Gemaliya+ mwana wa kwa Shafwana+ muntu ukopolola* byambo, mu kipango kya peulu, pa kibelo kya katataka kya nzubo ya Yehoba,+ bantu bonse saka bomvwa.

11 Mikaya mwana wa kwa Gemaliya, Gemaliya mwana wa kwa Shafwana byo aumvwine bino byambo byonse bya kwa Yehoba byajinga mu muvungilo, 12 wayile ku nzubo* ya mfumu ne ku munembeshi wa mu kibamba mwa kujiila. Babinemanga* bonse bajinga monka: Mwajinga Elishama+ munembeshi, Delaya mwana wa kwa Shemaya, Elenatana+ mwana wa kwa Akabola,+ Gemaliya mwana wa kwa Shafwana, Zedekiya mwana wa kwa Hananiya ne babinemanga bakwabo bonse. 13 Mikaya wibabuujile byambo byonse byo aumvwine byatangile Baluka mu muvungilo* bantu saka bomvwa.

14 Ponkapo babinemanga bonse batumine Yehuda mwana wa kwa Netaniya, Netaniya mwana wa kwa Shelemiya, Shelemiya mwana wa kwa Kushi kuya kwi Baluka na kumwambila’mba: “Iya na muvungilo ye waji kutanga ku bantu.” Byonkabyo, Baluka mwana wa kwa Neliya washikwile muvungilo ne kuya nanji ko bajinga. 15 Kepo bamwambijile’mba: “Ikala, witutangile na jiwi ja peulu.” Byonkabyo, Baluka watangile.

16 Byo baumvwinetu byambo byonse betajile bene na bene na moyo, kabiji baambijile Baluka amba: “Twafwainwa kumubuula mfumu bino byambo byonse.” 17 Kabiji bashikishe Baluka amba: “Twapopwela tubuule byo wanembele bino byambo byonse. Nanchi wibinembele aye saka amba nyi?” 18 Baluka wibakumbwile’mba: “Amiwa nanembele bino byambo byonse kimye kyo aambilenga, kabiji nebinembele mu muvungilo* na inki.” 19 Babinemanga baambijile Baluka amba: “Yainga mukafyame obewa ne Yelemiya, bantu kange bayuke ko muji ne.”+

20 Kepo batwelele mu kipango mwajinga mfumu kabiji batujile muvungilo mu kibamba kya kwa Elishama munembeshi, kabiji babuujile mfumu byambo byonse byo baumvwine.

21 Onkao mambo, mfumu watumine Yehuda+ kuya na kusenda muvungilo, ne aye wamuletele kufuma mu kibamba kya kwa Elishama munembeshi. Ponkapo Yehuda watangile muvungilo ku mfumu ne ku babinemanga bonse bajinga ku mfumu. 22 Mwajinga mu ñondo* wa butanu na buna, mfumu mo aikele mu nzubo mo aikalanga kimye kya mashika saka ota mujilo pa mbabula. 23 Yehuda inge wapwisha kutanga bipungu bisatu nangwa bina, mfumu wachibilengako lolo lubaji na mupenyi wa munembeshi ne kwikitaya mu mujilo wajinga pa mbabula, kufikatu ne byo asokele muvungilo yense pa mbabula. 24 Kabiji mfumu nangwa bakalume banji bonse byo baumvwine bino byambo byonse, kechi baumvwine moyo nangwa kutabaula bivwalo byabo ne. 25 Nangwa kya kuba Elenatana,+ Delaya+ ne Gemaliya+ basashijile mfumu amba kange asoke muvungilo ne, aye kechi wibomvwijile ne. 26 Kabiji mfumu wakambizhe Yelamela mwana wa mfumu, Selaya mwana wa kwa Azalyela, ne Shelemiya mwana wa kwa Abadeele kuba’mba bakwate Baluka munembeshi ne ngauzhi Yelemiya, pano bino Yehoba wibafiile.+

27 Mfumu byo asokele muvungilo mwajinga byambo byanembele Baluka byaambilenga Yelemiya,+ Yehoba wabuujile Yelemiya jibiji amba: 28 “Tola muvungilo mukwabo unembemo byambo byonka byajinga mu muvungilo mutanshi, Yehoyakimu Mfumu wa Yuda ye asokele.+ 29 Kabiji ukambe bintu bikamwekela Yehoyakimu Mfumu wa Yuda amba, ‘Yehoba waamba’mba: “Obewa wasoka uno muvungilo ne kwamba’mba, ‘Mambo ka o wanembelamo amba: “Mfumu wa Babilona ukeya ne konauna kino kyalo ne kwikishatu mwabula bantu ne banyama”?’+ 30 Onkao mambo, Yehoba waamba bintu bikamwekela Yehoyakimu Mfumu wa Yuda amba, ‘Kafwako muntu nangwa umo ukekala pa jitanda ja Davida ne,+ kabiji kimye kya mute mubiji wanji wafwa ukalaalatu pa mute ne bufuku pa mashika.+ 31 Amiwa nkamupamo mambo ne ba mu kisemi* kyanji ne bakalume banji na mambo a bubi bwabo. Kabiji nkaleta bya malwa byonse byo naambile kwibaletela, bekala mu Yelusalema ne bekala mu Yuda,+ na mambo a kuba kechi bañumvwijile ne.’”’”+

32 Ponkapo Yelemiya watolele muvungilo* mukwabo ne kupa Baluka munembeshi mwana wa kwa Neliya,+ kabiji wanembelemo byambo byonse byaambilenga Yelemiya byajinga mu muvungilo wasokele+ Yehoyakimu Mfumu wa Yuda. Kabiji banembelemo ne byambo bikwabo bipasha na byajinga mu muvungilo mutanshi.