Yelemiya

43 Yelemiya byo apwishishe kubuula bantu bonse bino byambo byonse byafumine kwi Yehoba Lesa wabo, ko kuba’mba byambo byonse Yehoba Lesa wabo byo amutumine amba abuule 2 Azaliya mwana wa kwa Hoshaya, Yohanana+ mwana wa kwa Kalea ne bantu bonse belundumikilenga, baambijile Yelemiya amba: “Bintu byo ubena kwamba bya bubela! Yehoba Lesa wetu kechi wakutuma kuba’mba wambe’mba, ‘Kange muye na kwikala ku Ijipita ne.’ 3 Pano bino, Baluka+ mwana wa kwa Neliya ubena kukutundaika kuba’mba witupane mu kuboko kwa bena Kalodeya kuba’mba betwipaye nangwa kwitutwala na kwikala mu Babilona.”+

4 Onkao mambo, Yohanana mwana wa kwa Kalea, bakulumpe ba bashilikale bonse ne bantu bonse kechi bakookejile byaambile Yehoba amba bafwainwa kushala mu kyalo kya Yuda ne. 5 Pakuba Yohanana mwana wa kwa Kalea ne bakulumpe ba bashilikale bonse basendele bena Yuda bonse bashajilemo babwelele kuba’mba bekale mu kyalo kya Yuda kufuma mu bisaka byonse bya bantu mo bebapalañenyejile.+ 6 Basendele banabalume, banabakazhi, baana, baana ba bakazhi ba mfumu ne bantu bonse* Nebuzaladana+ mukulumpe wa bakasopa bo ashijile Gedaliya+ mwana wa kwa Ahikama,+ Ahikama mwana wa kwa Shafwana+ pamo ne ngauzhi Yelemiya ne Baluka mwana wa kwa Neliya. 7 Kabiji bayile mu kyalo kya Ijipita mambo kechi bakookejile byaambile Yehoba ne, kabiji bakafikile ne ku Tapanesa.+

8 Ponkapo Yehoba waambijile Yelemiya mu Tapanesa amba: 9 “Senda mabwe akatampe mu kuboko kobe ne kwiafya pakachi ka matafwali o bashimikila bukonde pa kibelo kya nzubo ya kwa Felo mu Tapanesa, banabalume Bayudea saka batalako. 10 Kabiji ukebabuule’mba, ‘Yehoba wa mabumba, Lesa wa Isalela waamba’mba: “Amiwa mbena kutuma Nebukaneza mfumu wa Babilona kalume wami,+ kabiji nkabika jitanda janji peulu ya ano mabwe o nafya kabiji ukatandubwilapo tente wanji wa bufumu.+ 11 Kabiji ukeya ne konauna kyalo kya Ijipita.+ Awa yense wafwainwa kufwa ku kinkunka, ukafwa ku kinkunka, ne yense wafwainwa kuya mu buzha, bakamutwala mu buzha kabiji yense wafwainwa kufwa ku mpoko, ukafwa ku mpoko.+ 12 Amiwa nkasoka mazubo a balesa ba bena Ijipita,+ kabiji Nebukaneza ukebasoka ne kwibatwala mu buzha. Ukepombakanya kyalo kya Ijipita byonkatu kafunga byo epombakanya kivwalo kyanji, kabiji ukafumamo mu mutende.* 13 Kabiji ukakundaula mashiki* a Bete-shemeshi* aji mu kyalo kya Ijipita ne kusoka mazubo a balesa ba bena Ijipita.”’”