Yelemiya
21 Yelemiya watambwijile byambo kufuma kwi Yehoba kimye Mfumu Zedekiya+ kyo atumine Pashula+ mwana wa kwa Malakiya ne Zefwaniya+ ñanga, mwana wa kwa Maaseya kwi aye na kumwambila’mba: 2 “Tulombeleko kwi Yehoba, mambo Nebukaneza Mfumu wa Babilona ubena kulwa ne atweba.+ Kampe Yehoba uketubilapo kintu kimo kimwesha bulume bwanji, ne kumulengela kufuma kwi atweba.”+
3 Yelemiya wibambijile’mba: “Mumubuule Zedekiya amba, 4 ‘Yehoba Lesa wa Isalela waamba’mba: “Amiwa mbena kulengela byela bya nkondo biji mu maboko enu kwimwalukilamo* byo mubena kwingijisha kulwilako na mfumu wa Babilona+ ne na bena Kalodeya baji pangye ya nsakwa babena kulwa ne anweba. Kabiji nkebakonkanya pamo mukachi ka uno muzhi. 5 Kabiji amiwa nkalwa nenu+ byo nkatanyika kuboko kwami kwa bulume pe anweba na bukaji saka nazhingila bingi.+ 6 Nkonauna bekala mu uno muzhi, ko kuba’mba bantu ne banyama. Bakafwa ku mwalo* mukatampe.”+
7 Yehoba waamba’mba: ‘“Pa kupwisha kuba bino, Zedekiya Mfumu wa bena Yuda, bakalume banji, ne bantu ba mu uno muzhi bakapuluka ku bikola, ku mpoko ne ku kipowe kya nzala, nkebapana mu kuboko kwa kwa Nebukaneza Mfumu wa Babilona, kwa balwanyi babo ne mu kuboko kwa boba bakebelenga konauna bumi* bwabo.+ Aye ukebepaya na mpoko. Kechi ukebomvwina bulanda, kwibobila kifyele nangwa lusa ne.”’+
8 “Kabiji ukambile bano bantu amba, ‘Yehoba waamba’mba: “‘Amiwa mbena kwimubikila jishinda ja bumi ne ja lufu. 9 Aba bakashala mu uno muzhi bakafwa ku mpoko, ku kipowe kya nzala ne ku kikola. Pano bino, awa ukalupuka ne kwipana aye mwine ku bena Kalodeya babena kulwa ne anweba, kechi ukafwa ne, kabiji bumi* bwanji bukekala nobe kintu kyo apukula.”’*+
10 Yehoba waamba’mba, “‘“Mambo amiwa nafuukulapo kuleta bya malwa pa uno muzhi kechi nkamuletela bintu byawama ne.+ Bakamupana mu maboko a mfumu wa Babilona+ kabiji ukamusoka na mujilo.”+
11 “‘Ambila ba mu kisemi kya mfumu wa mu Yuda amba: Umvwai byaamba Yehoba. 12 Anweba ba mu kisemi kya Davida, Yehoba waamba’mba:
“Chibainga mambo monka mo aolokela kimye kyonse lukelo,
Ne kukwasha muntu ye baangata bintu kya lunkanankana ku muntu wa bujimbijimbi,+
Kuchina’mba bukaji bwami bwakambuka nobe mujilo+
Ne kuteema kya kuba’mba kafwako muntu nangwa umo wakonsha kumuzhimya ne
Na mambo a byubilo byenu byatama.”’+
13 Yehoba waamba’mba, ‘Amiwa nemuzhingijila anweba mwikala mu kimpachiko,*
Ne anweba mwikala mu muzhi waikela pa mabwe.’
‘Kwi anweba mwamba’mba: “Ñanyi uketulukuka?
Kabiji amba ñanyi ukalukuka mizhi yetu?”
14 Yehoba waamba’mba, ‘Amiwa nkemukambula
Monka mwayila byubilo byenu.+
Kabiji nkambula mujilo mu jisaka janji,
Ne uno mujilo ukasoka bintu byonse bijimo.’”+