Yelemiya

32 Byambo byaishile kwi Yelemiya kufuma kwi Yehoba mu mwaka wa bu 10 wa bukalama bwa kwa Zedekiya Mfumu wa Yuda, ko kuba’mba mwaka wa bu 18 wa bukalama bwa kwa Nebukaneza.+ 2 Pa kyokya kimye, bashilikale ba mfumu wa Babilona bazhokolokele Yelusalema, kabiji ngauzhi Yelemiya bamushinkijile mu Kipango kya kwa Kasopa+ kyajinga mu nzubo* ya mfumu wa Yuda. 3 Mambo Zedekiya Mfumu wa Yuda wamushinkijilemo,+ ne kumwambila’mba, “Mambo ka o ubena kwawila amba, ‘Yehoba waamba’mba: “Nkapana uno muzhi mu kuboko kwa mfumu wa Babilona, ne aye ukamushinda,+ 4 kabiji amba Zedekiya Mfumu wa Yuda kechi ukanyema bena Kalodeya ne, mambo aye bakamupana mu kuboko kwa mfumu wa Babilona, ne aye ukesamba nanji kanwa na kanwa saka betala.”’+ 5 “Yehoba waamba’mba, ‘Ukatwala Zedekiya ku Babilona, kabiji ukekala konkakwa posotu ne byo nkalangulukapo bya kumuba. Nangwa mukatwajijila kulwa na bena Kalodeya, kechi mukebashinda ne.’”+

6 Yelemiya waambile’mba: “Yehoba wañambila’mba, 7 ‘Hanamela mwana bashobe* ba Shaluma, ukeya ko uji ne kukwambila’mba: “Pota bujimi bwami buji mu Anatota,+ mambo yobe uji na luusa lwa kwibupota.”’”+

8 Hanamela mwana batata waishile kwi amiwa mu Kipango kya kwa Kasopa monkatu mwaambijile Yehoba kabiji wañambijile’mba: “Nakusashijilapo, pota bujimi bwami buji mu Anatota mu kyalo kya Benjamina, mambo obewa yobe uji na luusa lwa kwibuswana ne kwibupota. Bupote bwikale bobe.” Ponkapo nayukile kuba’mba Yehoba ye waambile kino.

9 Onkao mambo, napotele bujimi bwajinga mu Anatota kwi Hanamela mwana batata. Napimine mali+ a mashekele* atanu na abiji ne mali a siliva jikumi. 10 Ponkapo neanembele pa nkalata ya lupoto+ ne kubikapo katetesho, kabiji naichile bakamonyi+ ne kupima mali pa kipimo. 11 Nasendele nkalata ya lupoto yo babikilepo katetesho monka mwayijile mukambizho ne mizhilo, pamo ne yoya yo babujile kubikapo katetesho. 12 Kabiji napaine nkalata ya lupoto kwi Baluka+ mwana wa kwa Neliya,+ Neliya mwana wa kwa Maseya, Hanamela mwana batata saka amonako, ne bakamonyi banembeleko mazhina abo, ne Bayudea bonse baikele mu Kipango kya kwa Kasopa saka bamonako.+

13 Amiwa nakambizhe Baluka saka bajipo namba: 14 “Yehoba wa mabumba, Lesa wa Isalela waamba’mba, ‘Tambula ano makalata, nkalata ya lupoto, yo babikapo katetesho ne yo babula kubikapo katetesho wiabike mu mulondo pa kuba’mba bakealaminemo pa kimye kyabaya.’ 15 Mambo Yehoba wa mabumba, Lesa wa Isalela waamba’mba, ‘Mazubo, majimi ne majimi a miñanzañanza bakeapota jibiji mu kino kyalo.’”+

16 Ponkapo byo napele Baluka mwana wa kwa Neliya nkalata ya lupoto, nalombele kwi Yehoba namba: 17 “Umvwai! Anweba Nkambo Mfumu Yehoba! Anweba mwalengele jiulu ne ntanda na bulume bwenu+ ne na kuboko kwenu kwakosa. Kafwako kintu nangwa kimo kyakatazha kwi anweba ne, 18 anweba mumwesha butemwe bubula kwaluka ku bantu bavula, pano bino mutwika baana mambo a bashabo,+ anweba yenu Lesa wa kine, wakila kabiji wa bulume, yenka uji na jizhina ja kuba’mba Yehoba wa mabumba. 19 Anweba mupana mafunde kabiji muba bintu bikatampe,+ meso enu amona bintu byonse byuba bantu+ ne kubila muntu yense monka mwayila mashinda anji ne byubilo byanji.+ 20 Mwamwesheshe biyukilo ne kuba bya kukumya mu kyalo kya Ijipita byayuka bantu kufika ne lelo jino, kabiji mwalengejile jizhina jenu kutumbalala mu bena Isalela ne mu bantu+ byonkatu byo kiji ne lelo. 21 Kabiji mwafumishe bantu benu bena Isalela mu kyalo kya Ijipita na biyukilo, na bya kukumya, na kuboko kwenu kwa bulume kabiji kwakosa ne na bintu bilengesha moyo.+

22 “Mu kuya kwa kimye, mwibapele kino kyalo kyo mwachipile kupa bashakulu babo,+ kyalo kyavula mukaka ne buki.+ 23 Ne abo baishile ne kwikitambula kwikala ke kyabo, nangwa byonkabyo, kechi bemukookejile nangwa kulondela mizhilo yenu ne. Kechi baubilepo kintu nangwa kimo pa byo mwibakambizhe ne, o ene mambo o mwibaletejile bino bya malwa byonse.+ 24 Talai! Bantu baiya balenga mishiime yalepa kuzhokoloka nsakwa kuba’mba bashinde muzhi,+ kabiji na mambo a mpoko,+ kipowe kya nzala ne na mwalo* mukatampe,+ muzhi bakamushinda ku bena Kalodeya babena kulwa nanji; bintu byonse byo mwaambile byamweka, monka mo mwibimwena. 25 Pakuba anweba Nkambo Mfumu Yehoba mwañambila’mba, ‘Pota bujimi na mali kabiji wite bakamonyi,’ nangwa kya kuba muzhi bakamupana mu kuboko kwa bena Kalodeya.”

26 Ponkapo Yehoba waambijile Yelemiya amba: 27 “Amiwa yami Yehoba, Lesa wa bantu bonse. Nanchi kujipo kintu kyo nakonsha kukankalwa kuba nyi? 28 Onkao mambo, Yehoba waamba’mba, ‘Amiwa mbena kupana uno muzhi ku bena Kalodeya ne mu kuboko kwa Nebukaneza Mfumu wa Babilona, kabiji ukamushinda.+ 29 Kabiji bena Kalodeya babena kulukuka uno muzhi, bakeya ne kusoka uno muzhi+ pamo na mazubo aji na misemi bantu po bapainanga bitapisho kwi Baela kabiji po baitulwilanga ne milambo ya binyu ku balesa bangi kuba’mba banzhingijishe.’+

30 Yehoba waamba’mba, “‘Mambo kufumatu ku bwanyike bwabo bena Isalela ne bena Yuda bauba bintu byatama kwi amiwa;+ bena Isalela banzhingijisha bingi na mingilo ya maboko abo. 31 ‘Mambo uno muzhi kufumatu juba jo bamushimikile kufika ne lelo jino, undengela kuzhingila ne kuba bingi bukaji,+ kya kuba nafwainwa kumufumya ku meso ami,+ 32 na mambo a bubi bonse bwauba bena Isalela ne bena Yuda ne kunzhingijisha, abo bene, bamfumu babo,+ babinemanga babo,+ bañanga babo, bangauzhi babo+ ne bantu ba mu Yuda ne bangikazhi ba mu Yelusalema. 33 Batwajijile kumvundamina ne kufya bilungi byabo;+ nangwa kya kuba nebafunjishenga kimye kyonse,* kafwako nangwa umo mwi abo waumvwine ne kulondela byo namufunjilengako ne.+ 34 Kabiji babikile bankishi babo ba bunya mu nzubo itelwa pa jizhina jami, kuba’mba beizhilulule.+ 35 Kabiji bashimikile ne mapunzha atuntama a kwa Baela mu Kimpachiko kya Mwana wa kwa Hinomu*+ kuba’mba basokenga* baana babo ba balume ne ba bakazhi mu mujilo kwibapana kwi Moleka,+ kintu kyo nabujile kwibakambizha+ kabiji kyabujilepotu nangwa kwiya mu muchima* wami kuba’mba bobe kino kintu kya bunya ne kulengela bena Yuda kulenga mambo.’

36 “Onkao mambo, Yehoba Lesa wa Isalela waamba pa uno muzhi ye mubena kwamba’mba bakamupana mu kuboko kwa mfumu wa Babilona kuba’mba afwe na mpoko, na kipowe kya nzala ne na kikola kikatampe. 37 ‘Umvwai, amiwa nkebakonkanya pamo kufuma mu byalo byonse mo nebapalañenyejile na mambo a kuzhingila ne na bukaji bwami bukatampe,+ kabiji nkebabwezha mu ino mpunzha ne kwibekazha ku matwi nzoo.+ 38 Kabiji bakekala bantu bami, ne amiwa nkekala Lesa wabo.+ 39 Nkebalengela kwikala na muchima umo+ ne kuyuka jishinda jimo kuba’mba bakangakamwenga kimye kyonse ne kumona byawama, abo pamo na baana babo.+ 40 Kabiji nkalayañana nabo lulayañano lwa myaka+ lwa kuba’mba kechi nkaleka kwibobila byawama ne;+ kabiji nkebalengela kungakamwa mu michima yabo kuba’mba bakabule kungalukamo.+ 41 Kabiji nkasekela ne kwibobila byawama+ kabiji nkebajimba mu kino kyalo+ na muchima wami yense ne na mweo* wami yense.’”

42 “Mambo Yehoba waamba’mba, ‘Byonkatu byo naleta bya malwa pa bano bantu, byo byo nkaleta ne bintu byonse byawama byo mbena kwibalaya.+ 43 Kabiji majimi bakeapota jibiji mu kino kyalo+ nangwa kya kuba mubena kwamba’mba: “Kyashalatu masala mwabula bantu ne banyama, kabiji amba bekipana ku bena Kalodeya.”’

44 “‘Majimi bakeapota na mali, bakanemba makalata a lupoto ne kubikapo katetesho kabiji baketa bakamonyi kufuma mu kyalo kya Benjamina,+ mu mapunzha azhokoloka Yelusalema, mu mizhi ya mu Yuda,+ mu mizhi yaikela ku mitumba, mu mizhi yaikela mu binkunenke+ ne mu mizhi ya ku kabeta ka ku bulenge, mambo amiwa nkabwezha bantu babo bo batwajile mu buzha,’+ byo byaamba Yehoba.”