Yelemiya
14 Yehoba wabuujile Yelemiya pa mambo a kyashi amba:+
2 Yuda ubena kujila+ ne binzhilo byanji byaonaika.
Byapona panshi na mambo a bulanda,
Kabiji mabingo aji mu Yelusalema aumvwanyika.
3 Babinemanga babo batuma bakalume babo kuya na kutapula mema.
Byo baya ku bizhiba* bataana mema kafwamo.
Babwelatu na milondo yabo yabulamo mema.
Kibalenga bumvu kabiji balefulwa,
Kabiji bevweta ku mitwe yabo.
4 Mushiji byo auba milala,
Na mambo a kubula mvula mu kyalo,+
Banjimi baakamwa bingi ne kwivweta ku mitwe yabo.
5 Kabiji nsebula uji mungye usha mwananji ye asema katataka
Na mambo a kubula nsono.
6 Bambongolo ba mungye bemana pa tutumbatumba pabula kintu nangwa kimo.
Bakokatu mwela wa kukoka nobe balubwala;
Meso abo akooka na mambo a kubula munyemvu.+
7 Nangwa kya kuba bubi bwetu bwitushiina,
Anweba Yehoba, ubaipo kimo na mambo a jizhina jenu.+
Mambo kubula bukishinka kwetu kwabaya,+
Kabiji atweba twimulenga mambo.
8 Anweba ye baketekelamo bena Isalela, Mupulushi+ wabo mu kimye kya bya malwa,
Mambo ka o mwaikela nobe mwenyi mu kyalo,
Nobe kañenda ulaajila pakachi inge bwayila?
9 Mambo ka o mwaikela nobe muntu wakumya,
Kabiji nobe kilobo ubula kupulusha bantu banji?
Kange mwitushe ne.
10 Yehoba waamba pa bano bantu amba: “Batemwatu kwendauka;+ kechi batula maulu abo panshi ne.+ Onkao mambo, Yehoba kechi umwena lusekelo mwi abo ne.+ Aye ukavuluka bubi bwabo kabiji ukebakambula na mambo a bundengamambo bwabo.”+
11 Kepo Yehoba añambijile’mba: “Kange ulombe byawama kuba’mba biye pa bano bantu ne.+ 12 Umvwe bazhikilwa na nzala, kechi nteleka ku misashijilo yabo ne,+ kabiji umvwe bapana milambo yabo yonse ya kusoka ne milambo ya kajo, kechi mmwena lusekelo mu bino bintu ne,+ mambo nkebonauna na mpoko, ne na kipowe kya nzala ne na mwalo.”*+
13 Ponkapo naambile namba: “Mama, umvwai anweba Nkambo Mfumu Yehoba! Bangauzhi babena kwambila bantu amba, ‘Mpoko ne kipowe kya nzala kechi bikeya pe anweba ne, bino Lesa ukemupa mutende wa kine mu kino kyalo.’”+
14 Kepo Yehoba añambijile’mba: “Bangauzhi babena kwaula bya bubela mu jizhina jami.+ Amiwa kechi nebatuma nangwa kwibakambizha nangwa kwibambilapo kintu ne.+ Babena kwaula ne kwimubuula kimwesho kya bubela, bintu bya kulutwe byatutu ne bya bujimbijimbi bikeba michima yabo.+ 15 Onkao mambo, pa mambo a bangauzhi babena kwawila mu jizhina jami bo nabujile kutuma kabiji babena kwamba’mba mpoko nangwa kipowe kya nzala kechi bikeya mu kino kyalo ne, Yehoba waamba’mba: ‘Bano bangauzhi bakafwa ku mpoko ne ku kipowe kya nzala.+ 16 Ne bantu bo babena kwawila bino bintu bakebatayaika mu mikwakwa ya mu Yelusalema na mambo a kipowe kya nzala ne na mambo a mpoko, kya kuba kafwako muntu nangwa umo ukebazhiika ne,+ abo, bakazhi babo, baana babo ba balume ne baana babo ba bakazhi, mambo nkebaletela bya malwa monka mwayila byubilo byabo.’+
17 “Wafwainwa kwibabuula’mba,
‘Mu meso ami mulukumukengatu mipolo bufuku ne mute kwa kubula kuleka,+
Mambo mwana wa mukazhi wa balongo bami bamuchimuna ne kumuchakakanya,+
Kabiji uji na kilonda kyabaya bingi.
18 Inge nalupuka pangye ya muzhi ne kutajisha,
Mmona boba bo baipaya na mpoko!+
Kabiji inge natwela mu muzhi,
Mmona bikola byaiya na mambo a kipowe kya nzala!+
Mambo bangauzhi ne bañanga baya na kupitañana mu kyalo kyo babula kuyuka.’”+
19 Nanchi kine mwamukana Yuda nangwa anweba* mwashikwa Ziona nyi?+
Mambo ka o mwitukambwila kya kukankalwa kubukwa?+
Twatengejilenga mutende, bino kafwako kyawama kyaishile ne,
Ne kimye kya kubukwa, bino kwaishiletu bintu bilengesha moyo!+
21 Na mambo a jizhina jenu, kange mwitukane ne;+
Kange mulengulule jitanda jenu ja lukumo ne.
Vulukai kabiji kange monaune lulayañano lo mwalayañene ne atweba ne.+
22 Nanchi bankishi batutu ba bisaka bya bantu bakonsha kunokesha mvula nyi?
Nangwa meulu ene bunke bwao akonsha kunokesha miso ya mvula nyi?
Anweba Yehoba Lesa wetu, nanchi kechi yenu bonkatu nenyi?+
Twaketekela mwi anweba,
Mambo anweba yenu yenka mwauba bino bintu byonse.