Byubilo bya Batumwa
11 Batumwa ne balongo bajinga mu Yudea baumvwine’mba bantu ba mu bisaka bya bantu nabo batambwila mambo a Lesa. 2 Onkao mambo, Petelo byo afikile ku Yelusalema, aba batundaikilenga mukanda+ batendekele kumulengulula,* 3 ne kwamba’mba: “Wayile mu nzubo ya bantu babujile mukanda ne kuja nabo.” 4 Ponkapo Petelo watendekele kwibalumbulwila byo kyajinga, amba:
5 “Najinga mu muzhi wa Yopa na kulomba kabiji mu kimwesho namwene kintu* kyajinga nobe kisapi kya linenyi kikatampe kyafuminenga mwiulu saka bekikwata ku makonka ana ne kwikikizhizha po najinga.+ 6 Byo nekitajishe, namwenepo mitundu ya banyama ba maulu ana, bikalaba panshi ne bañonyi. 7 Kabiji naumvwine ne jiwi saka jiñambila’mba: ‘Petelo, imana wipaye uje!’ 8 Bino naambile namba: ‘Ine Nkambo, mambo nkyangye kujapo bintu bya muzhilo ne biji na biko.’ 9 Jiwi kufuma mwiulu jañambijile ja bubiji amba: ‘Kileke kutela bintu byatokesha Lesa amba biji na biko.’ 10 Kino kyamwekele jisatu, kabiji byonse bebitwajile mwiulu. 11 Kabiji pa kyonkakya kimye kwaishile banabalume basatu baimene ku nzubo mo twajinga, bo batumine kwi amiwa kufuma ku Kesalea.+ 12 Onkao mambo, mupashi wañambijile kuya nabo kwa kubula kuzhinauka. Bino bano balongo batanu na umo twayile nabo, ne kukatwela mu nzubo ya uno muntu.
13 “Uno muntu witubuujile byo amwene malaika saka aimana mu nzubo yanji ne kumwambila’mba: ‘Tuma banabalume ku Yopa na kwita Shimona utelwa’mba Petelo,+ 14 ne aye ukakubuula bintu byonse bikakulengela obewa ne ba mu nzubo yobe bonse kupuluka.’ 15 Bino byo natendekele kwamba, mupashi wazhila waikijile pe abo byonkatu byo etwikijile ne atweba patanshi.+ 16 Ponkapo navulukile byambo byaambanga Nkambo amba: ‘Yoano wabatizhenga mu mema,+ pakuba anweba mukabatizhiwa na mupashi wazhila.’+ 17 Byonkabyo, umvwe Lesa wibapele bupe buntutu bumo byonka byo etupele atweba twaitabila mwi Nkambo Yesu Kilishitu, nanchi amiwa inge nakonsheshe kukanya Lesa kuba kyaswa muchima wanji nyi?”+
18 Byo baumvwine bino bintu, bekilekele kumupachika,* batumbijikile Lesa ne kwamba’mba: “Kine, Lesa walengela bantu ba mu bisaka bya bantu lkulapila kuba’mba bekale na bumi.”+
19 Aba bapalañenejilemo+ na mambo a lumanamo lwabuukile pe Setepena, bayile ne kukafika ku Fenesha, Kipilusa ne Antioka, bino basapwijilenga mambo a Lesa ku Bayudea bonkatu.+ 20 Nangwa byonkabyo, banabalume bamo baishile ku Antioka kufuma ku Kipilusa ne Kilene batendekele kwamba ku bantu baambanga Kingiliki, saka basapwila mambo awama a Nkambo Yesu. 21 Kabiji kuboko kwa Yehoba* kwajinga pe abo, ne bantu bavula baitabijile ne kwalulukila kwi Nkambo.+
22 Nkuwa yabo yafikile ku kipwilo kyajinga mu Yelusalema, kabiji batumine Banabasa+ kuba’mba akafike ne ku Antioka. 23 Byo afikile ne kumona lusa lukatampe lwa Lesa, wasekejile bingi ne kwibatundaika bonse kutwajijila kwikala mwi Nkambo na muchima yense;+ 24 mambo aye wajinga muntu wawama kabiji wayujile mupashi wazhila ne lwitabilo. Ne jibumba jikatampe jaitabijile mwi Nkambo.+ 25 Onkao mambo, wayile ku Talasusa na kukeba Saulo.+ 26 Byo amutaaine, waishile nanji mu Antioka. Kabiji mwaka yense bakonkenanga pamo mu kipwilo ne kufunjisha bantu bavula, kabiji monka mu Antioka na lutangijilo lwa Lesa kyo kimye kitanshi baana ba bwanga kyo batelelweba’mba bena Kilishitu.+
27 Mu oa moba, bangauzhi+ baishile kufuma mu Yelusalema ne kuya ku Antioka. 28 Ngauzhi umo wa jizhina ja Agabusa+ waishile kabiji mupashi wazhila wamulengejile kwamba’mba, kukekala kipowe kya nzala kikatampe pano pa ntanda ponse,+ ne kya kine kyamwekele mu moba a Kaludiusa. 29 Onkao mambo, baana ba bwanga pa muntu pa muntu bafuukwilepo kupana bintu byo bakonsheshe kupana,+ ne kutuma kajo ka kutuuka+ ku balongo baikelenga mu Yudea; 30 kabiji baubile byonkabyo, bekapaine kwi Banabasa ne Saulo+ kuba’mba bekatwale ku bakulumpe mu kipwilo.