Ku Bena Tesalonika
5 Kabiji anweba balongo bami, kechi kyafwainwa kwimunembela pa mambo a bimye ne moba atongolwa ne. 2 Mambo anwe bene mwayukishatu’mba juba ja Yehoba*+ jikeya nobe ngivi bufuku.+ 3 Kimye byo kikafika po bakamba’mba: “Mutende ne luzhikijilo!” ponkapotu lonaiko lukebasolomokela,+ nobe bisanso bifikila mwanamukazhi waimita, kabiji kechi bakapuluka ne. 4 Bino anweba balongo bami, kechi muji mu mfishi ne, kya kuba’mba aja juba jikemufikile byonka byo jakonsha kufikila bangivi ne, 5 mambo anweba bonse mwi baana ba kyeya kabiji baana ba mute.+ Kechi twi baana ba bufuku nangwa ba mfishi ne.+
6 Byonkabyo, kechi tulaale tulo byonka byuba bantu bakwabo ne,+ bino tulabenga+ ne kwikala bajimuka.+ 7 Mambo aba balaala, balaala bufuku, kabiji aba bapendwa, bapendwa bufuku.+ 8 Pakuba atweba byo tuji ba mute, twikalenga bajimuka ne kuvwala pa kyaji kyela kya lwitabilo ne butemwe ne kuvwala ku mutwe kampompo ka luketekelo lwa lupulukilo.+ 9 Mambo Lesa kechi witusajile’mba tukamone bukaji bwanji ne, bino amba tukapuluke+ kupichila mwi Nkambo yetu Yesu Kilishitu. 10 Aye witufwijile+ kuba’mba tukekale nanji nangwa tubena kulaba nangwa twalaala.*+ 11 Onkao mambo, itundaikainga* ne kwikomesha anwe bene na bene,+ byonkatu byo mubena kuba.
12 Kabiji anweba balongo bami, twimusashijila’mba, saka mwi banemeka aba babena kwingila na ngovu mukachi kenu, kwimutangijila mwi Nkambo ne kwimufunda; 13 kabiji saka mwibalangulukilako mu butemwe na mambo a mwingilo wabo.+ Ikalainga mu mutende anwe bene na bene.+ 14 Kabiji anweba balongo bami, twimukambizha’mba, jimunaiko* ba kyendeende,+ tekeneshai bantu bapopomenwa,* koseshai babula kukosa ne kwikala batekanya ku bantu bonse.+ 15 Kange muleke muntu nangwa umo ashinkanye na mukwabo wamulenga mambo ne,+ bino kimye kyonse mwafwainwa kwiubilanga byawama anwe bene na bene ne ku bantutu bakwabo.+
16 Saka musekela kimye kyonse.+ 17 Lombainga kimye kyonse.+ 18 Mu bintu byonse saka musanta.+ Kino kyo kyaswa muchima wa Lesa kwi anweba mwi Kilishitu Yesu. 19 Kange mukanyenga mupashi kwingila mwi anweba ne.+ 20 Kabiji kange mulengululenga bungauzhi ne.+ 21 Monai’mba bintu byonse bijitu bulongo;+ kakachilai ku kyawama. 22 Kanai misango yonse ya bubi.+
23 Lesa wa mutende emuzhijike mu byonse. Kabiji mupashi ne mweo ne mubiji wenu bikale byawama saka mwibilama kwa kubula kaneneno mu kimye kya kwikalapo Nkambo yetu Yesu Kilishitu.+ 24 Awa ubena kwimwita ye wa kishinka, kabiji ukebyuba.
25 Balongo bami, saka mwitulombelako.+
26 Imunai balongo bonse na kwifyompa kwazhila.
27 Mbena kwimusashijila mwi Nkambo namba ino nkalata bakeitange ku balongo bonse.+
28 Lusa lukatampe lwa Nkambo yetu Yesu Kilishitu lwikale pe anweba.