Zefwaniya
1 Bino byo byambo bya Yehoba byaishile kwi Zefwaniya* mwana wa kwa Kushi, Kushi mwana wa kwa Gedaliya, Gedaliya mwana wa kwa Amaliya, Amaliya mwana wa kwa Hezekiya mu moba a kwa Yosiya+ mwana wa kwa Amonyi+ mfumu wa Yuda amba:
2 Yehoba waamba’mba,+ “Nkapyanga bintu byonse biji pano pa ntanda.”
3 Yehoba waamba’mba, “Nkapyanga bantu ne banyama.
Nkapyanga bañonyi ne masabi a mu kalunga ka mema,+
Ne bya kwituntulako*+ pamo na babi;
Kabiji nkafumyapo bantu pano pa ntanda.
4 “Nkatanyika kuboko kwami ne kulwa na Yuda
Ne kulwa na bangikazhi ba mu Yelusalema,
Kabiji mu ino mpunzha nkafumyamo byonse bya kuvulukilako* Baela,+
Mazhina a bañanga ba balesa bangi pamo na bañanga,+
5 Ne boba bafukamina bintu bya mwiulu pa misemi,+
Ne boba bafukama ne kwamba’mba ba kishinka kwi Yehoba+
Bino saka bamba’mba bo bakishinka kwi Malakama;+
6 Ne boba baleka kulondela Yehoba+
Ne boba babula kukeba Yehoba nangwa kumwipuzha.”+
7 Ikalaitu nzoo kwi Nkambo Mfumu Yehoba, mambo juba ja Yehoba jijitu pepi.+
Yehoba wanengezha kitapisho; wazhijika bo aita.
8 “Pa juba ja kitapisho kya Yehoba nkebatotolwesha babinemanga,
Baana ba mfumu,+ ne bonse bavwala bivwalo bya ku byalo bingi.
9 Kabiji pa joja juba, nkatotolwesha yense ukanjila pa mutuntamo,*
Aba bayuzha mazubo a bankambo yabo na bukapondo ne bujimbijimbi.
10 Yehoba waamba’mba, “Pa joja juba,
Kukomvwanyika muteto ku Kibelo kya Masabi,+
Mabingo ku mwanzo wa bubiji wa muzhi,+
Ne kiwowo kikatampe ku tutumbatumba.
11 Wowakanai anweba bangikazhi ba mu Makiteshi,*
Mambo basulu* bonse bebepaya;*
Aba bonse bapima siliva bebonauna.
12 Pa kyokya kimye, nkapikita bulongo Yelusalema na malampi,
Kabiji nkatotolwesha babula kutako muchima ku bintu,* bonka bamba mu michima yabo amba,
‘Yehoba kechi ukoba kyawama ne, kabiji kechi ukoba kyatama ne.’+
13 Bakebapukula bunonshi bwabo ne mazubo abo bakeonauna.+
Bakashimika mazubo, bino kechi bakekalamo ne;
Kabiji bakajimba miñanzañanza, bino kechi bakatomako binyu byao ne.+
14 Juba jikatampe ja Yehoba jijitu pepi!+
Jijitu pepi kabiji jibena kupelawizha bingi kwiya!+
Kilulumo kya juba ja Yehoba kilengesha bingi moyo.+
Jo juba babilobo jo bakataminamo miteto.+
15 Aja juba jo juba ja bukaji bukatampe,+
Juba ja bya malwa ne lumanamo,+
Juba ja kinkunkwila ne lonaiko,
Juba ja mfishi ne mfishi ikatampe,+
Juba ja makumbi ne mfishi ine yafiitatu bwi,+
16 Juba ja kuvuma kwa lusengo ne kiwowo kya nkondo,+
Ya kulukuka mizhi ya masakwa akosa ne byamba byalepa bya pa makonka.+